Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makasampulo pammarentahanna Zedekia karaeng Yehuda, iamintu ri taung makasampulona assagantuju pamarentahanna Nebukadnezar karaeng Babel, a’bicarai Batara ri nakke.
2 Anjo wattua tantarana karaeng Babel nabunduki Yerusalem. Nitahanga’ ri parang lakkenna balla’ karaenga
3 ri Karaeng Zedekia lanri nitudua’ le’ba’ ampa’la’bangi kupau angkanaya akkana kammai anne Batara, "LaKupa’biangi karaeng Babel ambetai siagang angngempoi anne kotaya,
4 kammayatompa Karaeng Zedekia tena nalata’lappasa’. Lanipassareangi mae ri karaeng Babel, nampa andallekang ri anjo karaenga kammayatompa a’bicara kalenna siagang ia.
5 Nampa laniengka’ Zedekia mange ri Babel siagang ammantang anjoreng sa’genna Kuhukkung. Manna pole nanabunduki tu Babel, mingka tena nakkulle lambetai. INakke, Batara, anne akkana."
6 Napaui Batara ri nakke
7 angkanaya Hanameel, ana’ bura’nena purinangku Salum, labattui napala’ sollanna kuballi tampa’na ri Anatot ri daera Benyamin. Nasaba’ inakkemi bijanna kaminang a’reppeseka akkullea amballi anjo tampaka.
8 Nampa kamma le’ba’ Napaua Batara, battumi Hanameel mae ri nakke ri parang lakkenna balla’ karaenga, siagang napala’ sollanna kuballi tampa’na. Lanri kammana, tappa’ tojemma’ angkanaya le’ba’ tojemmi a’bicara Batara ri nakke.
9 Jari kuballimi anjo tampaka battu ri Hanameel, sampulo antuju doe’ pera’ ballinna. Akkio’ma’ siapa are sa’bi, siagang ri dallekanna ke’nanga kutekemmi sura’ pammallina, nampa kusare segele’ siagang kutimbangi doe’na.
10 (32:9)
11 Nampa kualle anjo sura’ pammallia le’baka nisare segele’ siagang niaka tattulisi’ sara’-sara’ kammayatompa katantuang-katantuang nipareka. Kualle tommi salinanna sura’ pammalli tenaya nammake segele’,
12 nampa kupassareang anjo ruaya sura’ mae ri Barukh ana’na Neria cucunna Mahseya. Kupassareangi anjo ri dallekanna Hanameel kammayatompa sa’bi-sa’bi le’baka antekengi anjo sura’-suraka, siagang ri dallekanna sikamma tau niaka ammempo anjoreng ri paranglakkenga.
13 Ri dallekanna ngaseng ke’nanga kukana ri Barukh,
14 "Batara Kaminang Koasaya, iamintu Allata’alana Israel, amparentakangi sollanna nualle anne ruaya sura’, baji’ naaslina kammayatompa salinanna, nampa nupantama’ ri se’reang uring niposileoka semeng sollanna attahang sallo.
15 Batara Kaminang Koasaya, iamintu Allata’alana Israel, Nakana angkanaya, balla’, tampa’, siagang koko anggoro’ lanipare’ balukangi sallang."
16 Le’baki kupassareang anjo sura’-sura’ pammallia mae ri Barukh, appala’ doamma’, kukana,
17 "O Batara Kaminang Tinggia, iKattemi ampa’jari langika siagang buttaya lanri koasa siagang kagassingang lompoTa. Tena apa-apa sukkara’ mae ri Katte.
18 Kipappicinikangi pangngamaseang satunggu-tungguTa mae ri assa’bu-sa’bua tau, mingka Kihukkung tongi taua lanri dosana tau toana. IKattemi Allata’ala mala’birika siagang porea; arenTa iamintu Batara Kaminang Koasaya.
19 Hebaki rancana-rancanaTa, siagang appakalannasaki sikontu panggaukanTa; Kiciniki sikontu apa nagaukanga rupataua, siagang Kibalasaki ke’nanga situru’ panggaukanna ke’nanga.
20 Riolo dudu iKatte anggaukangi gau’ appakalannasaka siagang apa-apa tenaya nantama ri akkala’na rupataua ri Mesir, siagang sa’genna pole kamma-kamma anne tuli Kigaukanna, baji’ naritangnga-tangngana tu Israel kammayatompa ri tangnga-tangngana sikontu bansa maraenga. Lanri kammanami anjo NaKimasahoro’ ri kere-keremae.
21 Lanri koasa siagang kagassingang lompoTa Kierangi umma’ Israel assulu’ battu ri Mesir. Kigaukangi gau’-gau’ appakalannasaka siagang gau’-gau’ malompoa appakagegereka ri musu-musua.
22 Pa’rasangang bajika siagang copponga Kipassareang mae ri ke’nanga sangkamma le’baka Kipa’janjiang mae ri boe-boena ke’nanga.
23 Mingka ri wattunna battu ke’nanga mae anrinni ri pa’rasanganga siagang naempoi, tenamo namannuruki ke’nanga ri parenta-parentaTa, kammayatompa taerokai attallasa’ situru’ ajarang-ajaranTa. Sikontu apa Kiparentakanga mae ri ke’nanga tena manna se’re nagaukang ke’nanga. Lanri kammana anjo naKipabattumo sikontu anne balaya mae ri ke’nanga.
24 Le’ba’mi nabangung tu Babel tembo’-tembo’ angkurungai attammulili kotaya untu’ angngallei, na kamma-kamma anne a’bakkami ke’nanga. Pa’bundukang, kacipurang, siagang garring la’jari saba’ ri anne kotaya natu’guru’ mae ri limanna musua. Kiciniki angkanaya sikontu apa Kipaua a’rupa ngasemmi.
25 Mingka manna nakamma mamo, o Batara Kaminang Tinggia, iKatte ansuroa’ amballi anne tampaka ri dallekanna sa’bi-sa’bia, manna nasinampe’ mamo nanialle anne kotaya ri tu Babel."
26 Nampa Nakana Batara ri nakke,
27 "INakkemi Batara, Allata’alana sikontu rupataua. Tena apa-apa sukkara’ mae ri Nakke.
28 Anne kotaya laKulappassangi nikoasai ri Nebukadnezar karaeng Babel siagang pasukanna. Lanaallei ke’nanga anne kotaya,
29 siagang lanatunui sa’genna la’busu’ siagang ngaseng sikamma balla’ napammantangngia tau ampakallarroA’, lanri iratemi ri pattongko’na sikamma anjo ballaka attunu ke’nanga dupa untu’ Rewata Baal, kammayatompa appatiri’ anggoro’ untu’ napassareang mae ri rewata-rewataya.
30 Appakkaramula ri riwaya’na ke’nanga, iamintu tu Israel siagang tu Yehuda tena napakasannangi pa’maikKu. Napanaiki larroKu lanri ri panggaukang-panggaukang ja’dala’na ke’nanga.
31 Appakkaramula ri wattu nibangunna anne kotaya, napakanassu duduMa’ pandudu’na. Le’ba’mi Kupattantu untu’ laKupanraki ke’nanga,
32 lanri sikontu kaja’dallang nagaukanga tu Yehuda siagang Yerusalem, sikamma karaenga, pagawe pamarentaya, imanga, siagang na’bi-na’bina ke’nanga.
33 NabokoiMa’ ke’nanga siagang manna pole tuli Kuajara’ ke’nanga mingka tuli tenana naero’ mappilangngeri siagang tena naero’ angngu’rangi.
34 Ba’lalo balla’ nibangunga untu’ tampa’ anynyomba ri Nakke le’ba’ tommi nara’massi ke’nanga lanri naboli’na anjo barhala-barhala appakaringi’-ringi’na ke’nanga anjoreng ri tampaka.
35 Ambangungi ke’nanga tampa’-tampa’ pakkoro’bangngang untu’ Rewata Baal ri Ka’bung Lappara’ Hinom, nampa napassareang ana’-ana’na ke’nanga a’jari koro’bang mae ri Rewata Molokh. Padahala’, tale’bakai Kusuro ke’nanga anggaukangi anjo kammaya, ba’lalo tale’bakai ammumba lalang ri pikkirangKu angkanaya lanagaukangi ke’nanga anjo panggaukang appakaringi’-ringi’ kammaya siagang napa’jari dorakai tu Yehuda."
36 Batara, Allata’alana Israel, Nakana ri nakke, "Yeremia, nakana bansa Israel lanri pa’bundukang, kacipurang siagang garring natu’guru’ anne kotaya mae ri limanna karaeng Babel. Kamma-kamma anne pilangngeri tongi apa laKupaua.
37 LaKupasse’rei anne bansaya battu ri sikontu pa’rasangang tampa’na ke’nanga Kupasisa’la’-sa’la’ lanri larroKu siagang lussakKu mae ri ke’nanga. LaKuerangi ke’nanga ammotere’ mae anrinni siagang Kukellai ammantang anrinni siagang amang.
38 La’jari ke’nanga ummakKu, siagang iNakke la’jari Allata’alana ke’nanga.
39 LaKusarei ke’nanga poro se’re bawang oloang mange ri katallassanga: iamintu, napakalompoA’ satunggu-tungguna; anjo kammaya langngerangi kabajikang mae ri kalenna ke’nanga, siagang mae ri jari-jarina.
40 LapparekKa’ parjanjiang mannannungang siagang ke’nanga. Tena Kulammari a’gau’ baji’ mae ri ke’nanga. LaKupa’jari mallaki ke’nanga siagang mappakalompoi ri Nakke lalang sikontu nyawana sollanna tena nabella ke’nanga ri Nakke.
41 Lasannangi pa’maikKu a’gau’ baji’ mae ri ke’nanga, naKupammantang ke’nanga anrinni ri anne pa’rasanganga sa’genna satunggu-tungguna.
42 Antekamma bateKu le’ba’ appabattu bala mae ri anne bansaya, kammatommi anjo laKusarei ke’nanga sikontu apa baji’ le’baka Kupa’janjiang mae ri ke’nanga.
43 Nakana taua anne pa’rasanganga a’jarimi sangkamma parang luara’ tenaya nipammantangngi ri tau siagang olo’-olo’, siagang anne pa’rasanganga tu’guru’mi antama ri limanna tu Babel. Mingka iNakke Kukana, sallang sikamma koko-kokoa lanipareki pole balu’-balukang ri anne pa’rasanganga;
44 sura’ pammallina lanitekengi, nisarei segele’, siagang nitekengi ri sa’bi-sa’bi. Anjo kammaya lakajariangi ri daerana Benyamin, ri desa-desa tammulilina Yerusalem, ri kota-kota Yehuda, ri kota-kota ri daera monconga, ri daera bangkeng buluka, siagang ri Yehuda bageang timboro’. Anne bansaya laKupakabajiki ammotere’ katallassanna ri anne pa’rasanganga. INakke, Batara, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA