Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri tenanapa nibage-bagei anjo buttaya untu’ a’jari butta pisaka mae ri tunggala’ sukua, musti nisa’laki se’re bageang untu’ Batara. La’buna anjo tampaka musti 12,5 kilometere’, siagang sangkara’na 10 kilometere’. Sikontu anjo tampaka nipa’jari matangkasaki.
2 Untu’ Balla’Na Batara, nipasadiai sipa’gang anjo tampaka, iamintu appa’ pasagi, sa’rinna massing-massing 250 metere’, siagang nikulilingi ri parang 25 metere’ sangkara’na siagang anjoremmi musti nipaenteng Balla’Na Batara.
3 Tawaruanna anjo tampaka, iamintu la’buna 12,5 kilometere’ siagang sangkara’na 5 kilometere’, musti nipasadiai untu’ ambangungi Balla’Na Batara, iamintu tampa’ kaminang matangkasaka.
4 Anjo tampaka matangkasaki, siagang nipasadiai untu’ sikamma imang tugasaka anggaukangi ibadaya ri Balla’Na Batara. Sipa’gang battu ri anjo tampaka la’jari tampa’ untu’ balla’na ke’nanga, na sipa’gang pole untu’ Balla’Na Batara.
5 Sipa’gang pole battu ri anjo tampaka iamintu 12,5 kilometere’ la’buna siagang 5 kilometere’ sangkara’na musti nipasadiai untu’ tu Lewi anjamaya lalang ri Balla’Na Batara. Anjorengi lanibangung kota-kota akkullea napammantangngi ke’nanga.
6 Pantaranganna anjo tampa’ matangkasaka, musti nia’ todong nisa’la’ tampa’ 12,5 kilometere’ la’buna siagang 2,5 kilometere’ sangkara’na untu’ se’re kota akkullea napammantangngi inai-nai mamo battua ri bansa Israel.
7 Untu’ patugasa’ pamarentaya musti nipasadiang tongi tampa’. Anjo tampaka a’la’baki battu ri pa’baeng-baeng bageang lau’na tampa’ nisa’laka untu’ Batara, sa’genna mange ri Tamparang Tangngaya, siagang battu ri pa’baeng-baeng bageang rayana anjo tampa’ nisa’laka untu’ Batara sa’genna pa’baeng-baeng irayana anjo pa’rasanganga. Jari la’buna sangkammai siagang la’buna tampa’ nipassareanga mae ri kalase’renna suku-suku bansa Israel.
8 Anjo tampaka a’jari napatangi sikamma patugasa’ pamarentaya ri Israel, sollanna tenamo najallakkangi ummakKu, passangalinna napassareangi anjo tampa’ la’binnaya untu’ a’jari napatang suku-suku Israel.
9 Nakana Batara Kaminang Tinggia, "He sikamma patugasa’ pamarentana Israel, angganna’mi dosa-dosanu! Pamarimi anjo tindakannu appaero’-eroka siagang anjallakkangai ra’yaka. Gaukammi apa annabaya siagang adeleka. Tea sikaliko bongkai pole ummakKu battu ri tampa’na ke’nanga. INakke, Batara Kaminang Tinggia, amparentakangi anjo mae ri kau.
10 Pakei timbangang siagang pa’baku’ annabaya:
11 Se’re efa’ untu’ a’baku apa-apa kalotoroka musti sangkammai bonena siagang se’re bat untu’ ambakuki apa-apa assolonga. Patokanna iamintu musti se’re homer. Jari, anjo sikamma pa’bakuka musti kammai anne: 1 homer = 10 efa’ = 10 bat.
12 Timbangannu musti kammai anne: 1 sikal = 20 gera 1 mina = 60 sikal
13 Iaminne dasara’na ukkuranga untu’ ampattantui sikamma gandung passarea: gandung: 1/60 bageang battu ri wassele’ alle polenu jawawut: 1/60 bageang battu ri wassele’ alle polenu minynya’ zaitun: 1/100 bageang battu ri wassele’ poko’-pokoka. (Ukkuruki situru’ ukkurang bat: 10 bat = 1 homer = 1 kor) gimbala’: 1 gimbala’ battu ri 200 kayunna gimbala’ Musti assareko koro’bang gandung, koro’bang nitunu siagang koro’bang passiamakkang, sollanna nanipammopporang dosa-dosanu. INakke, Batara Kaminang Tinggia ampassareangi anne parentaya.
14 (45:13)
15 (45:13)
16 Sikontu pandudu’na pa’rasanganga musti naerangi anjo sikamma passarea mae ri patugasa’ ammarentaya ri Israel.
17 Iami musti ammalli olo’-olo’ untu’ koro’bang nitunu siagang bahang-bahang untu’ koro’bang gandung siagang koro’bang anggoro’ untu’ sikontu bansa Israel ri allo-allo lompoa, iamintu allo lompo Bulang Beru, allo Pammari-mariang, siagang allo lompo maraengannaya. Musti appasadiai koro’bang untu’ pammopporang dosa, koro’bang gandung, koro’bang nitunu, siagang koro’bang passiamakkang untu’ appala’ popporo’ lanri ri dosana bansa Israel."
18 Nakana Batara Kaminang Tinggia ri umma’Na, "Ri tanggala’ se’re bulang se’re, musti nutangkasi BallakKu na nuassare sikayu sapi laki rungka, ia tenaya caca’na.
19 Imanga musti naallei cera’na anjo koro’bang pannangkasi dosaya, nampa napasapu ri sikamma pakke’bu’na BallakKu, kammayatompa ri appa’ panyingkulu’na tampa’ pakkoro’bangnganga siagang ri benteng-benteng pakke’bu’ lompo a’lampa mangea ri paranglakkeng bageang lalanga.
20 Gaukang tongi kammaya anjo ri tanggala’ tuju anjo bulanga, untu’ sikamma tau le’baka a’gau’ dosa mingka tena nakunjungi yareka tena naassengi. Kammami anjo caranu nanujagaimo katangkassanna BallakKu.
21 Ri tanggala’ sampulo angngappa’ bulang se’re, musti nupakalompoi Allo Passua’-suarranna Paskaya. Tuju allo sikontu taua musti angnganrei roti tenaya nammake pa’gambang.
22 Ri allo makase’rea, patugasa’ pamarentaya musti assarei sikayu sapi laki untu’ koro’bang pannangkasi dosa mae ri kalenna siagang mae ri sikontu ra’yaka.
23 Lalang nigaukanna anjo passua’-suarranga, lalang tuju allo sallona, tunggala’ allo musti assarei mae ri Batara tuju kayu sapi laki siagang tuju kayu gimbala’ laki ia tenaya caca’na nampa natunu akkayu. Tunggala’ allo musti assare tongi sikayu bembe laki untu’ koro’bang pammopporang dosa.
24 Pantaranganna anjo, musti nipassareang tongi gandung 17,5 litere’ untu’ tassikayua sapi laki, siagang 3 litere’ minynya’ zaitun untu’ tassikayua gimbala’ laki.
25 Ri passua’-suarrang allo lompo Pa’ballakang Leko’-leko’, ia nipakaramulaya ri tanggala’ sampulo allima bulang tuju, tunggala’ allo lalang tuju allo sikamma patugasaka musti assarei koro’bang sangkamma, iamintu koro’bang pammopporang dosa, koro’bang nitunu, koro’bang gandung siagang minynya’ zaitun."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA