Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sabellunna tana egi-bagi menangka tana sangkolan ka saneyap suku, kodu epesa sabagiyan kaangguy PANGERAN. Tana Jareya lanjangnga kodu dhubellas kilo satengnga, lebarra sapolo kilo. Saantero dhaera jareya enyata’agi socce kabbi.
2 Kaangguy Padalemman Socce esadhiya’agi dhari tana jareya sabagiyan se masagi empa’, okoran lanjangnga ban lebarra padha dhu ratos saeket meter, ekalenglenge lon-talon se lebarra sagame’ meter, e jadhiya Padalemman Socce jareya kodu epaddek.
3 Saparona tana jareya, se lanjangnga dhubellas kilo satengnga ban lebarra lema kilo, kodu esadhiya’agi kaangguy maddek Padalemman Socce, iya reya dhaera se paleng socce.
4 Tana jareya socce, esadhiya’agi kaangguy para imam se lakona mabadha kabakteyan e Padalemman Socce. Sabagiyan dhari tana jareya epamaddegana bengkona para imam, ban sabagiyanna pole epamaddegana Padalemman Socce.
5 Tana se saparona, se rajana dhubellas kilo satengnga kale lema kilo kodu esadhiya’agi kaangguy reng-oreng Lewi se alako e Padalemman Socce. E jadhiya epaddeggana tha-kottha se olle ekennengnge reng-oreng Lewi jareya.
6 Salaenna tana se socce jareya, kodu epalaene tana se lanjangnga dhubellas kilo satengnga ban lebarra dhu kilo satengnga, kaangguy kottha se olle ekennengnge sapa’a bai dhari bangsa Isra’il.
7 Kaangguy pangobasa se marenta kodu esadhiya’agi tana keya. Tana jareya malanjang molae dhari bates bara’na dhaera se etantowagi kaagem ka Pangeran malolo gella’ sampe’ ka Tase’ Tengnga, ban dhari bates temorra dhaera se etantowagi kaagem ka Pangeran malolo jareya sampe’ ka bates temorra nagara jareya. Daddi lanjangnga padha ban lanjangnga sala settong bagiyanna tana se ebagi ka ku-suku Isra’il.
8 Tana jareya daddi andhi’na pangobasa se marenta e tana Isra’il, sopaja ta’ nendhes Tang ommat pole, tape mala’ magi dhaera karena jareya epadaddi andhi’na ku-suku Isra’il.
9 GUSTE Allah Se Mahatenggi adhabu, "La cokop sa-dusana ba’na, he, para pangobasana Isra’il! Mara ambuwi tengkana ba’na se ngala’ sakarebba dibi’ ban nendhes ra’yat jareya. Mara lakone sabarang se bendher ban adil. Ja’ sampe’ ba’na ngojuk Tang ommat dhari tanana pole. Sengko’, GUSTE Allah Se Mahatenggi marenta’agi jareya ka ba’na.
10 Angguy tembangan ban ker-taker se teppa’:
11 Saefa se epanaker barang kerreng essena kodu padha ban sabat kaangguy naker barang se encer. Ger-ogerra kodu settong homer. Daddi ker-taker jareya kodu kantha reya: 1 homer = 10 efa = 10 bat
12 Tembanganna ba’na kodu kantha reya: 1 syikal = 20 gerra 1 mina = 60 syikal
13 Reya’ dhasarra okoran kaangguy neptebbagi tor-ator: gandum: 1/60 bagiyan dhari hasella se anye jaba: 1/60 bagiyan dhari hasella se anye mennya’ jaitun: 1/100 bagiyan dhari hasella ka-bungka. (Okor menorot bat: 10 bat = 1 homer = 1 kor) dumba: settong sabban dhu ratossa. Ba’na kodu ngatorragi kurban gandum, kurban obbaran, ban kurban salameddan, sopaja sa-dusana esapora. Sengko’, GUSTE Allah Se Mahatenggi se aberri’ parenta reya.
14 (45:13)
15 (45:13)
16 Sakabbinna pandhudhu’na nagara kodu ngeba tor-ator jareya ka pangobasa se marenta Isra’il.
17 Pangobasa jareya se wajib melle ebin se egabaya kurban obbaran ban sabarang se ekaparlo kaangguy kurban gandum ban kurban anggur kaangguy sakabbinna bangsa Isra’il e re-are raja, paraya’anna Bulan Anyar, re-are Sabat ban re-are raja laenna. Pangobasa se marenta e Isra’il jareya se kodu nyadhiya’agi kurban pangamponanna dusa, kurban gandum, kurban obbaran ban kurban salameddan sopaja bangsa Isra’il esapora."
18 GUSTE Allah Se Mahatenggi adhabu ka ommadda, "E tanggal settong bulan settong, ba’na kodu nyocce’e Tang Padalemman kalaban cara ngatorragi sape lake’ se gi’ ngodha se tadha’ calena.
19 Imam kodu ngala’ dhara dhari kurban palebbaranna dusa jareya, dharana jareya kodu ebuliddagi ka ga-canggana labang e Tang Padalemman, bariya keya ka paddu se pa’-empa’ e mezba, ban ka ga-canggana labang saketheng se ka taneyan dhalem.
20 Lakone kantha jareya keya e tanggal petto’ bulan jareya, kaangguy saneyap oreng se agabay dusa tape ta’ etengnget otabana polana ta’ tao. Kalaban cara se kantha jareya ba’na ajaga kasocceyanna Tang Padalemman.
21 E tanggal pa’ bellas bulan settong, ba’na kodu araya’agi Pesta Paska. Pettong are abidda oreng kodu padha ngakan roti se ta’ eragi’i.
22 E are se dha’-adha’na, pangobasa se marenta kodu ngatorragi sape lake’ menangka kurban palebbaranna dusa kaangguy aba’na dibi’ ban kaangguy sakabbinna ra’yat.
23 Saabidda paraya’an se pettong are abidda jareya, sabban are pangobasa jareya kodu ngatorragi ka PANGERAN sape lake’ papetto’ ban dumba lake’ papetto’ se padha tadha’ calena, jareya kabbi kodu eobbar kol-bungkol. Sabban arena pangobasa jareya kodu ngatorragi keya embi’ lake’ settong kaangguy kurban pangamponanna dusa.
24 Laen dhari jareya sabban settong sape lake’ kodu etoro’e gandum petto bellas liter satengnga, ban sabban settong dumba lake’ kodu etoro’e mennya’ jaitun tello liter.
25 E bakto Pesta Ranggun Dhaun, se emolae e tanggal lema bellas bulan petto’, sabban are sampe’ pettong are abidda pangobasa kodu ngatorragi ban-kurban se padha, iya reya kurban pangamponanna dusa, kurban obbaran, ban kurban gandum sarta mennya’ jaitun."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA