Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hata ni Jahowa hu bangku, mangkatahon,
2 “Ale anak ni jolma, hatahon ma bani raja ni Tirus: Sonon do hata ni Tuhan Jahowa: Halani gijang uhurmu, anjaha ihatahon ho: Naibata do Ahu, hundul do Ahu bani hundulan ni Naibata, i tongah-tongah ni laut; hape jolma tumang do ho, sedo Naibata, age pe ninuhurmu pentar ho songon Naibata.
3 Tongon, pentaran do ho ase si Daniel, sagala rusia seng dong na ponop humbam.
4 Marhitei habisukonmu pakon hapentaranmu ipatumpu ho do bam habayakon, janah ipahumpul ho do omas pakon pirak ibagas parartaanmu.
5 Halani buei ni akalmu ibagas partiga-tigaonmu ipabuei ho do artamu, gabe mangenjeng do uhurmu halani habayakonmu.
6 Halani ai sonon do hata ni Tuhan Jahowa: Halani ninuhurmu dos do ho songon Naibata,
7 halani ai, tonggor ma, parohon-Ku ma halak na legan mandorab ho, bangsa na tang sibisangan; sintakon ni sidea do podangni mansedahon hajengeson ni hapentaranmu, anjaha butakanni ma sinalsalmu.
8 Dabuhkonon ni sidea do ho hubagas lubang ai, songon halak na tarbunuh do parmateimu ibagas laut.
9 Ai hatahononmu ope: Naibata do ahu! i lobei ni halak na mambunuh ho, hape sedo Naibata ho, tapi jolma do ibagas tangan ni halak sitikam ho?
10 Maningon matei do ho songon parmatei ni halak na so marsunat, marhitei tangan ni halak na legan; ai Ahu do na manluarhon ai, nini Tuhan Jahowa.”
11 Dob ai roh ma hata ni Jahowa hu bangku, mangkatahon,
12 “Ale anak ni jolma, bahen ma sada doding tangis-tangis pasal raja ni Tirus, anjaha hatahon ma hu bani: Sonon do hata ni Tuhan Jahowa: Ho do usihan ni na gokan dear, gok habisukon anjaha gok bani hajengeson.
13 I Eden hinan do ho marianan, ibagas pohon ni Naibata; bagei-bagei ni batu intan do na manrungkub ho, ai ma batu intan sardis, topas diamant, tarsis, soham, oniks, sapir, rubin ampa samarag; omas do panlongkotanni ai anjaha ai ma ibahen panjagarmu; bani ari panompaonmu do ipasirsir ai.
14 Ho do herub sipanrungkub hupabangkit, bani dolog ni Naibata na mapansing ai do ho hunahkon; i tongah-tongah ni batu na marapuy do ho mardalan-dalan.
15 Seng dong sihataon bam bani haganup dalanmu humbani ari panompaon bam, ronsi jumpah hajahaton bam.
16 Ibagas partiga-tigaonmu na buei ai gabe gok pangodoh-odohon do ho anjaha gok dousa; halani ai Hupabali do ho humbani dolog ni Naibata, anjaha Huripaskon do ho, ale herub sipanrungkub hun tongah-tongah ni batu na marapuy.
17 Mangenjeng do uhurmu halani hinajengesmu; iagouhon do habisukonmu halani hamuliaonmu. Hu tanoh do ho hugijigkon, anjaha hupatontonkon do ho hu lobei ni raja-raja.
18 Halani hinabuei ni hajahatonmu marhitei hagedukon ni partiga-tigaonmu, ipabutak ho do ianan-Ku na mapansing in; halani ai Huparoh do apuy hun tongah-tongahmu, ai ma na mangankon ho, anjaha gabe abuan do ho Hubahen i atas tanoh in i lobei ni haganup na mangidah ho.
19 Haganup halak na mananda ho i tongah-tongah ni bangsa-bangsa, tarsonggot do mangidah ho; jangin do parroh ni ajalmu, seng anjai dong be ho lalab.”
20 Dob ai roh ma hata ni Jahowa hu bangku, mangkatahon,
21 “Ale anak ni jolma, tujuhon ma bohimu dompak Sidon, anjaha manjahai ma ho pasalsi,
22 anjaha hatahon ma: Sonon do hata ni Tuhan Jahowa: Tonggor ma, imbang-Ku do ho ale Sidon, patalaron-Ku ma, hasangapon-Ku i tongah-tongahmu, ase ibotoh sidea, Ahu do Jahowa, anggo hudalankon ma uhum-Hu ijai, anjaha hupatuduhkon hapansingon-Ku bani;
23 ai suruhon-Ku ma sampar hujai ampa pambunuhon bani alamanni; radag ma na tarbunuh i tongah-tongahni, inggot bani, binahen ni podang na mangimbangsi; jadi botohon ni sidea ma, Ahu do Jahowa.
24 Jadi seng dong be bani ginompar ni Israel suga na manojok atap duri-duri na mangugahi humbani ganup simbalog ni sidea; na marmapas ni uhur mangidah sidea; jadi botohon ni sidea ma, Ahu do Tuhan Jahowa.
25 Sonon do hata ni Tuhan Jahowa: Anggo Hupatumpu ma ginompar ni Israel humbani bangsa hamerapan ni sidea, anjaha Hupatalar hapansingon-Ku marhitei sidea ididah bangsa-bangsa, jadi marianan ma sidea bani tanohni, na huberehon ai hubani juakjuak-Ku si Jakob.
26 Jadi sonang ma sidea marianan ijai, anjaha paulion ni sidea ma rumah, anjaha tombeionni pohon anggur. Tongon, sonang ma sidea marianan ijai, anggo Hudalankon ma uhum bani ganup simbalogni, na mapas bani sidea; jadi botohon ni sidea ma, Ahu do Jahowa, Naibata ni sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA