Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu ka sengko’,
2 "He, manossa se ta’ langgeng, kabala ka rato Tirus apa se ekoca’agi Sengko’, GUSTE Allah Se Mahatenggi ka aba’na, ‘Ba’na masombong nganggep aba’na diba se toju’ e tahta e nga’-tengnga’anna tase’. Olle bai ba’na ba-madiba, tape kaenga’e, ya, ba’na reya pera’ manossa biyasa se bisa mate.
3 Ba’na apangrasa apenterran dhari Danel, sampe’ tadha’ roseya se ta’ ekataowe ba’na.
4 Hekmat ban pangarteyanna ba’na eangguy makompol dunnya emmas ban salaka.
5 Pajat bendher, ba’na penter adagang, ban sateya ba’na la sogi, ban kasogiyanna ba’na jareya andaddiyagi ba’na sombong!’"
6 GUSTE Allah Se Mahatenggi adhabu, "He, Tirus, lantaran ba’na apangrasa padha ban Allah, Sengko’ madhatengnga tantara manca se ce’ kejjemma epanyerranga ba’na. Sabarang se bagus se ekaolle ba’na bi’ hekmat ban pangarteyanna bakal eancora kabbi bi’ reng-oreng jareya.
7 (28:6)
8 Ba’na bakal epateyana sarta ekoburragiya e tase’.
9 Mon jareya la kalakon, ba’ gi’ bisa’a ba’na ngoca’ ja’ ba’na padha ban Allah? E adha’na reng-oreng se mate’e ba’na, nyata ja’ ba’na coma manossa biyasa.
10 Ba’na bakal mateya akantha oreng se nespa tadha’ argana sabab epate’e oreng manca se ta’ kennal ka Allah. Sengko’, GUSTE Allah Se Mahatenggi, la ngoca’."
11 PANGERAN adhabu pole ka sengko’, dhabuna,
12 "He, manossa se ta’ langgeng, mara tangese rato Tirus. Kabala apa se ekoca’agi Sengko’, GUSTE Allah Se Mahatenggi ka aba’na, ‘Ba’na tao daddi lambangnga kasamporna’an. Lamba’ ba’na bicaksana ban gantheng!
13 Bengkona ba’na e Eden, kebbunna Allah. Kalambina ba’na erengga bi’ mamatan acem-macem: bato dalima ban enten, topas, bato pirus, bato yakut, ratna, campaka, mamatan bungo, jamerrut ban mameran. Pareyasan emmassa ba’na bannya’ keya. Rang-barang jareya kabbi pajat esadhiya’agi ka ba’na e bakto ba’na ecepta’agi.
14 Sengko’ nyaba’ malaekat se nako’e e jadhiya epajaga ba’na. Ba’na enneng e attassa Tang gunong se socce ban ajalan e nga’-tengnga’anna mamatan se rap-galiraban.
15 Kalakowanna ba’na samporna molae ba’na ecepta’agi sampe’ ba’na molae alako jahat.
16 Ba’na repot ban orosan juwal belli, ban jareya se ngeba ba’na ka jalan kakerrasan ban dusa. Daddi bi’ Sengko’ ba’na eojuk dhari Tang gunong se socce, ban malaekat se bi’ Sengko’ epajaga ba’na ngojuk ba’na dhari nga’-tengnga’anna mamatan se rap-galiraban jareya.
17 Ba’na sombong polana robana bagus ban ba’na atengka padha ban oreng budhu polana ba’na kalonta. Lantaran jareya bi’ Sengko’ ba’na ebanteng ka tana egabay parengeddan ka to-rato laenna.’"
18 Pangeran adhabu, "Ba’na manajjis ngan-kennengnganna kabakteyan polana sakabbinna kasala’an ban karoceyanna ba’na e dhalem ajuwal belli. Daddi bi’ Sengko’ ba’na eobbar sampe’ daddi rampa bi’ tana. Reng-oreng se padha ngabas ka ba’na pera’ nangale’e abu.
19 Ba’na la elang mosna salanjangnga. Sa-bangsa se kennal ka ba’na padha tako’ me’-ame’ pas ngalame nasib akantha ba’na keya."
20 PANGERAN adhabu ka sengko’,
21 "He, manossa se ta’ langgeng, mara basto kottha Sidon.
22 Kabala ka pandhudhu’na apa se ekoca’agi Sengko’, GUSTE Allah Se Mahatenggi, ka reng-oreng jareya, ‘Sengko’ reya mosona ba’na, Sidon. Reng-oreng bakal ngalemma Sengko’ polana ba’na se epakantha jareya bi’ Sengko’. E bakto Sengko’ ngokom ba’na, reng-oreng jareya bakal taowa ja’ Sengko’ reya PANGERAN Se Socce.
23 Sengko’ madhatengnga wabah panyaket, ban magiliya dhara e rong-lorongnga ba’na. Ba’na bakal eserranga moso dhari man-dhimman, ban pandhudhu’na ba’na bakal epateyana. Daddi ba’na pas tao ja’ Sengko’ reya PANGERAN.’"
24 PANGERAN adhabu, "Ra-nagara tatangga se tao ya-nyeya Isra’il, la ta’ daddi dhuri se nyake’e Isra’il pole. Kabbi la apangrasa ja’ Sengko’ reya GUSTE Allah Se Mahatenggi."
25 GUSTE Allah Se Mahatenggi adhabu, "Sengko’ makompola oreng Isra’il dhari ra-nagara se jau e kennengnganna reng-oreng jareya epabalessadan bi’ Sengko’, ban sa-bangsa bakal taowa kabbi ja’ Sengko’ reya socce. Bangsa Isra’il bakal ngennengngana pole tanana dibi’, tana se bi’ Sengko’ la ebagi ka Yakub Tang abdi.
26 Bangsa Isra’il jareya bakal odhi’a aman e jadhiya ban maddegga ko-bengkona sarta agabaya bun-kebbun anggur. Sengko’ ngokoma sakabbinna nagara tatanggana se la ya-nyeya Isra’il, sopaja Isra’il daddiya aman. Mon la kantha jareya sa-bangsa tatanggana jareya bakal padha’a tao ja’ Sengko’ reya PANGERAN Allahna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA