Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kata TUHAN seh man bangku nina,
2 "O manusia si ermasap-masap, turikenlah katangKu, Aku, TUHAN si Erdolat, man raja Tirus, bagenda: Erkiteken ukur meganjang, ikatakenndu maka kam dibata. Ikatakenndu maka kam kundul i bas kursi kemulian si ikeleweti lawit, bali ras dibata. Banci saja nge ipekulah-kulahndu bandu dibata, tapi situhuna labo kam dibata, tapi manusia si ermasap-masap.
3 Iakapndu pentaren kam asangken Daniel, iakapndu la lit rahasia terbuni bandu.
4 Kepentarenndu ras kebeluhenndu mahanca kam bayak, bayak emas ras pirak.
5 Tuhu seh kal beluhndu, erbinaga, seh maka genduari nggo bayak kal kam. Janah erkiteken kebayakenndu nggo meganjang ukurndu.
6 Dage genduari enda me katangKu, Aku, TUHAN si Erdolat: Erkiteken iakapndu bali pentarndu ras dibata,
7 Kusuruh me musuh si kejam nerang kam. Kerina barang-barang si mejile si nggo ipepulungndu arah kebeluhenndu ras kepentarenndu, ikernepkenna kerina.
8 Ibunuhna kam jenari itamakenna i bas kuburen si erlau.
9 Adi nggo reh kalak lako munuh kam, banci denga kin ikatakenndu maka kam dibata? Adi nggo kam petala-tala ras kalak si munuh kam, kam pe manusia biasa nge, manusia si ermasap-masap.
10 Mate me kam desken biang erkiteken ibunuh kalak si deban si la nandai Dibata." Aku, TUHAN si Erdolat, Aku kap si ngataken si enda.
11 Seh ka tole kata TUHAN man bangku nina,
12 "O manusia si ermasap-masap, erceda atelah kam kerna cilaka si nggo nggempangi raja Tirus. Turiken man raja e katangKu, Aku TUHAN si Erdolat Bagenda 'Nai pernah kam jadi usihen si mejile kal. Andiko, seh kal mbarenda pentarndu ras jilendu.
13 Kam ringan i bas peken Eden, peken Dibata. Ipakendu perhiasen si erbage-bage rupana; umpama: rubia ras intan; topas batu pirus, karnelia, ratna, batu sapir, zamrut, batu permata si megara. Barang perhiasen emasndu pe melala.
14 Kerina si e ibahan man gunandu, i bas paksa mula jadindu nari. Malekat si rejin Kusuruh engkawali kam. Kam ringan i bas delengKu si badia janah erdalan i tengah-tengah batu permata si erndilap-ndilap.
15 Tangtang tubuhndu nari lagu langkahndu seh kal ulina. Tapi dungna jahat perbahanenndu.
16 Kuskas kam nukur ras erdaya i bas perbinaganndu, janah si enda mabai kam erdosa janah mahan ate kalak mesui. Emaka Kupaksa kam nadingken delengKu si badia, janah malekat si njagai kam ndai melawes kam i tengah-tengah permata si erndilap-ndilap e nari.
17 Meganjang ukurndu erkiteken jilendu, janah gelarndu si terberita e mahanca kam ngelakoken lagu langkah si bodoh. Erkiteken si e Kudampesken kam ku taneh janah Kubahan kam jadi sada pertenget man raja-raja.'
18 Erkiteken kejahatenndu i bas perbinaganndu, keliamen ibahanndu inganndu ersembah. Emaka kuciluk kam, o kota Tirus, seh rata ras taneh. Genduari kasa kalak si ngenehen kam, abu nari ngenca idahna.
19 Kam nggo lesap, masap seh rasa lalap. Kerina bangsa-bangsa si pernah nandai kam gentar kerina, sabap mbiar ia, ntahsa ia pe jumpa cilaka si nggo engkenai kam."
20 Kata TUHAN seh man bangku nina,
21 "O manusia si ermasap-masap, sumpahilah kota Sidon.
22 Kataken man penduduk kota e katangKu, Aku TUHAN si Erdolat, bagenda: Aku kap musuhndu, o Sidon. Ipuji kalak me Aku erkiteken perbahanenKu man bandu. Tupung Aku ngukum pendudukndu, ietehna me maka Aku kap TUHAN si Badia si ersegat ate nandangi kasa kai si jahat.
23 Kutamaken ku je penakit, janah kupelepas dareh maler arah pasar pasarndu. Iserang me kam i ja nari pe janah pendudukndu mate ibunuh. Kenca bage ietehndu me maka Aku kap TUHAN."
24 Nina TUHAN, "Negeri-negeri si pernah megombang man Israel, si lit i sekelewetna, lanai ndigan pe bagi suga ntah duri si nakiti Israel. Ieteh bangsa-bangsa maka Aku kap TUHAN si Erdolat."
25 Nina TUHAN si Erdolat, "Kubaba me bangsa Israel mulih i bas negeri-negeri si ndauh nari ku ja mbarenda ia Kukerapken. Emaka kerina negeri-negeri meteh maka badia kap Aku. Ringan me bangsa Israel i bas tanehna jine, negeri si Kubereken man Jakup, suruh-suruhenKu.
26 Alu teneng ringan ia i je. Ipajekkenna rumahna, isuanina kebun anggur. Kuukum me kerina negeri-negeri sekelewetna si megombang man bana. Emaka dame me Israel; kenca bage ietehna me maka Aku kap TUHAN, Dibatana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA