Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara ri nakke,
2 "He tau, pabattui mae ri karaeng Tirus apa Kupaua, iNakke, Batara Kaminang Tinggia, mae ri ia, angkana, ‘Tampoko ampaui kalennu angkana rewatako ammarentaya ri tangnga-tangngana tamparanga. Akkulleko nukana kalennu rewata, mingka u’rangi, angkanaya ikau poro tau biasajako bawang.
3 Nukapangi kalennu la’bi cara’dekangngangko na Danel, sa’genna tena rahasia kacokkoang mae ri kau.
4 Nupakei kacara’dekannu siagang pammahannu untu’ appasse’re barang-barang, bulaeng, siagang pera’.
5 Memang, ikau cara’dekko a’danggang siagang kamma-kamma anne kalumanynyang kalupepeang mako; nampa anjo kakalumanynyangngannu napa’jari tampo mako!’"
6 Nakana Batara Kaminang Tinggia, "He Tirus, lanri nukanana kalennu sangkamma Allata’ala, lakkiringA’ tantara battu ri bansa maraeng, ia sannaka palla’na, untu’ anbundukiko. Lanaancuruki ke’nanga sikontu kagammarrannu le’baka nugappa lanri kacara’dekannu siagang pammahannu.
7 (28:6)
8 Lanibunoko siagang lanitarawangko lalang ri tamparanga.
9 Jari, punna narapi’mo anjo wattua, maka akkulle ijako angkana angkanaya ikau Allata’alako? Ri dallekanna ngaseng sikamma tau ambunoako a’nassami angkanaya ikau tau biasa jako.
10 Ikau lamateko sangkamma tau hina, lanri nibunoko ri bansa maraeng, tenaya natappa’ ri Allata’ala. INakke, Batara Kaminang Tinggia, anne akkana."
11 Nakana pole Batara ri nakke,
12 "He tau, appiraungko untu’ karaeng Tirus. Pabattui apa Kupaua, iNakke, Batara Kaminang Tinggia, mae ri ia angkana, ‘Le’bakko a’jari pangngebarang ri apa nikanaya sangga; riolo ikau sanna’ cara’de’nu siagang gammarakko.
13 Tampa’ pammantangannu ri Eden, iamintu kokonNa Allata’ala. Pakeannu nibelo-beloi sangka’ rupa paramata: paramata batu delima siagang intang, topasa’, batu pirusu’, batu yaku’, ratna, campaka, batu nilang, samru’ siagang batu alkali eja. Belo-belo bulaennu jai todong. Anjo barang-barang kammaya nipareki untu’ ikau ri allo nipa’jarinu.
14 Malaeka’ appakamallaka laKuboliki anjoreng untu’ anjagaiko. Ammantangko irate ri bulu’ matangkasakKu siagang a’jappako ri tangnga-tangngana batu paramata accilla’-cillaka.
15 Panggaukannu sangga baji’na baku’nu nipa’jari sa’gennu appakkaramula a’gau’ ja’dala’.
16 Tenamo sawenu napakamma a’balu-balu’, siagang iaminjo angngerangko mange ri katerassanga siagang dosaya. Jari kubongka mako battu ri bulu’ matangkasakKu, siagang malaeka’ pajaganu angngembako battu ri tangnga-tangngana anjo paramata accillaka.
17 Tanja’nu gammaraka angngerangko mae ri tampoa siagang anjo masahoro’nu a’jari saba’ nuppanggaukang tolo. Lanri kammana anjo, Kupatappasakko naung ri buttaya siagang Kupa’jariko pappakainga’ mae ri karaeng-karaeng maraenga.’"
18 Nakana Batara, "He Tirus, ikau nura’massi tampa’-tampa’ ibadanu lanri kasalang siagang kajekkongang nugaukanga ri wattunnu a’balu’-balu’. Lanri kammana anjo nakutunuko sa’gennu a’jari sallappara’ buttaya. Sikontu tau ancinikiako poro au mami nacini’.
19 Ikau lanynya’ mako untu’ satunggu-tungguna. Sikontu bansa angngassengiako a’jari annekkere’ kabusuki napakamma malla’ langkasia’ tongi sare kammaya anjo."
20 Nakana Batara ri nakke,
21 "He tau, tunrai kota Sidon.
22 Pabattui mae ri pandudu’na angkana iNakke, Batara Kaminang Tinggia, angkana ri ke’nanga, ‘INakke anne musunnu Sidon. LanapaleceA’ taua lanri tindakangKu mae ri kau. Ri wattunna Kuhukkung pandudu’nu, naassemmi pandudu’nu angkanaya iNakkemi Batara matangkasaka.
23 LappabattuA’ garring, siagang laKulappassangi assolong ceraka ri sikamma oloannu. Lanibundukiko ri musu battu ri kere-keremae, siagang pandudu’nu lanibunoi. Jari nuassemmi angkanaya iNakkemi Batara.’"
24 Nakana Batara, "Sikamma pa’rasangang singngampi’na Israel le’baka anghinai, tenamo nala’jari rapang katinting anno’do’ mae ri Israel. La’jari sadaraki ke’nanga angkanaya iNakke Batara Kaminang Tinggia."
25 Nakana Batara Kaminang Tinggia, "LaKupasse’rei tu Israel battu ri sikamma pa’rasangang bella tampa’na ke’nanga Kupasiara’, siagang sikontu bansaya lanaassengi angkanaya matangkasakKa’. Bansa Israel lammantangi ammotere’ ri butta kalenna ke’nanga, iamintu butta le’baka Kupassareang mae ri atangKu Yakub.
26 Lattallasaki ke’nanga siagang amang anjoreng, siagang ambangung balla’ siagang appareki koko-koko anggoro’. LaKuhukkungi sikamma bansa singngampi’na ke’nanga le’baka anghinai ke’nanga sa’genna a’jari amang Israel. Na naassemmi ke’nanga angkanaya iNakke Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA