Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakanamo pole Batara ri nakke,
2 "He tau, pappicinikangi mae ri Yerusalem sikamma panggaukang kodi le’baka nagaukang ke’nanga."
3 Batara Kaminang Tinggia nasuroa’ ampabattui anne pasanga mae ri Yerusalem, angkana, "He Yerusalem, ikau lassukko ri butta Kanaan. Manggenu tu Amori siagang amma’nu tu Het.
4 Ri wattunnu lassu’, tena ampolongangko pocci’nu, yareka anje’nekko, yareka ansapuiko ce’la, yareka angkalimbukiko kaeng.
5 Tena manna sitau mangngamaseang ri kau sa’genna ero’ anggaukangi anjo sikammaya passala’ mae ri kau. Ri wattunnu lassu’, tena nia’ ansayangko, ba’lalo nipelakko mae ri kokoa.
6 Nampa allaloMa’ naKucinikko ammokki’ lalang ri pangngammeang cera’nu, mingka tena naKulappassangko mate.
7 AngngalleA’ je’ne’ nampa Kubissai ceraka ri kalennu. Kusossoroki bukkulennu siagang minynya’ zaitun. Kupakalompoko sanrapang lamung-lamung copponga. Longkoroki pattimbonu, sehakko siagang tinggiko, siagang a’jariko rapang se’re baine lolo. Appakkaramulai attimbo susunnu siagang la’bui uu’nu, mingka assolarakko. Ri wattungKu allalo poleang, Kucini’mi angkanaya narapi’mi wattunnu untu’ a’bayuang. Kuka’rangi jubaKu mae ri kalennu assolaraka siagang Kupa’janjiammi pangngaingKu mae ri kau. Iyo, appare’Ma’ kana passikko’ janji angkanaya laKubuntingiko, siagang iNakke lampatangko. INakke, Batara Kaminang Tinggia, anne akkana.
8 (16:7)
9 (16:7)
10 Nampa Kupipakeiko ro’ nisulang, sapatu battu ri kukkulu’ alusuka, passikko’ ulu battu ri kaeng lenang siagang juba sa’be.
11 Kubelo-beloiko siagang paramata, rante siagang ponto-ponto.
12 Kusareiko cincing ka’muru, anting-anting siagang songko’ ga’gaya.
13 Kammami anjo batenu a’belo-belo bulaeng siagang pera’; pakeannu battu ri kaeng lenang siagang sa’be nisulang. Akkulleko angnganre roti battu ri tarigu kaminang bajika, siagang je’ne’ bani kammayatompa minynya’ zaitun. Ga’ganu teai sipato’ siagang a’jariko rapang baine karaeng.
14 Sikontu bansaya napalecei kaga’gannu, siagang iNakkemi ampa’jariko ga’ga sikali. INakke, Batara Kaminang Tinggia, anne akkana.
15 Mingka ikau nupake salai kaga’gannu kammayatompa kabaukang arennu. Attinroko siagang bura’ne sambarang niaka allalo.
16 Sipa’gang pakeannu nupakei untu’ ambelo-beloi tampa’ panynyombanga mae ri barhalaya. A’jariko baine pasundala’ siagang nupassareangi kalennu mae ri sikamma tu bura’nea.
17 Battu ri belo-belo bulaeng siagang pera’ Kupassareanga mae ri kau, apparekko patung-patung tu bura’ne, nampa a’gau’ bawangko siagang ia anjo patung-patunga.
18 Nupipakei anjo patung-patunga siagang pakeang nisulang le’baka Kupassareang mae ri kau. Nupassareangi mae ri ke’nanga minynya’ zaitun siagang dupa nugappaya battu ri Nakke.
19 Kusareko kanre-kanreang battu ri tarigu kaminang bajika, bani siagang minynya’ zaitun kaminang tenaya bengkoro’na. Mingka kabusu’na anjo nupassareangi mae ri anjo barhalaya untu’ ampakasannangi pa’mai’na ke’nanga. INakke, Batara Kaminang Tinggia, anne akkana.
20 Nampa nupassareangi ana’-anatta, bura’ne siagang baine a’jari koro’bang mae ri barhala-barhalaya. Maka tanggannakkapi angkanaya tena namajarre’ pa’mai’nu mae ri Nakke?
21 Maka musti nualle tongi ana’-anakKu nampa nukoro’bangkang ke’nanga mae ri barhala-barhalaya?
22 Lalang ri katallassannu anjo appakaringi’-ringika salaku pasundala’, manna sike’de’ tanuu’rangi ri wattunnu ca’di riolo, ri wattunnu assolara’ ammokki’ niamme ri cera’ kalennu."
23 Nakana Batara Kaminang Tinggia, "Cilakako ikau! Tojeng, cilakako! Le’bakko anggaukangi anjo sikontu kaja’dallanga.
24 Nampa pole ri lapanganna kotaya siagang ri birinna tunggala’ aganga appaentengko tampa’-tampa’ untu’ anynyomba ri barhalaya siagang untu’ assundala’.
25 Nura’massi kaga’gannu. Nupappirarangi kalennu mae ri sikamma bura’ne allaloa, siagang tenammari-marinu a’gau’ bawang.
26 Mesir nuaganga singngampi’, anjo sannaka lalena, le’ba’mi nuagang sikatinroang. Nupakkunjung-kungjungiangi assundala’ untu’ ampakalarroA’.
27 Kamma-kamma anne angngalleA’ tindakang untu’ anghukkungko siagang angngallei barakka’ le’baka Kupassareang mae ri kau. Kupassareangko mae ri tu Filistin ammusuako siagang a’ringi’-ringika ancinikko anggaukangi anjo panggaukang ra’masa’nu.
28 Mingka tenapa nasangga nusa’ring pakkasia’nu; lanri kammana anjo, nuondang-ondangi pole tu Asyur. A’jariko pasundala’na ke’nanga, mingka tena tompa nasangga nusa’ring pakkasia’nu mae ri ke’nanga.
29 Nampa a’jariko pasundala’ mae ri tu Babel, anjo bansa padangganga. Mingka tena todong nakkulle ke’nanga ampassanggai baji’na pakkasia’nu."
30 Nakana Batara Kaminang Tinggia, "Kabusu’na anjo nugaukangi salaku pasundala’ tenaya siri’na.
31 Ri tana lapanna kotaya siagang ri biring-biring aganga appaentengko tampa’-tampa’ untu’ anynyomba barhala siagang assundala’. Mingka ikau tena nusangkamma pasundala’ samaraka parallua ri doe’.
32 Ikau sangkammako baine ampa’gau’ salangi tu bura’nenu nu’gau’ bawang siagang bura’ne maraeng.
33 Se’rea pasundala’ tuli nibayaraki, mingka kabalekanna ikau assarei hadia sikamma tu bura’ne nuaganga assikatinroang, ba’lalo nunyonyoki ke’nanga siagang doe’ sollanna battu ngaseng angngagangko assikatinroang.
34 Ikau pasundala’ mara’-maraengko. Tena ampassako a’jari pasundala’. Tena nibayarakko, ba’lalo ikaumi a’bayara’. Memang, ikau mara’-maraeng sikaliko."
35 He Yerusalem, pasundalaka, pilangngeri apa kananNa Batara Kaminang Tinggia, angkana, "Le’ba’mi nusungke bajunnu, siagang salaku pasundala’ nupassareammi kalennu mae ri sikamma tanrinnu siagang mae ri anjo barhala-barhalanu appakaringi’-ringika. Ana’-ana’nu nubunoi siagang nukoro’bangkangi mae ri anjo barhala-barhalaya.
36 (16:35)
37 Lanri kammana anjo, sikontu tanrinnu laKupasse’rei, baji’ nanungaia kammayatompa tenaya nungai. Lammentengi ke’nanga antammuliliko siagang lanapasulu’ ngasengi ke’nanga care-carenu, sa’genna akkulle ke’nanga anciniki kalennu assolara’.
38 LaKuhukkungko lanri passundallang siagang pammunoang le’baka nugaukang. Lalang nassuKu siagang larroKu laKuhukkung mateko.
39 LaKupassareangko mae ri anjo sikamma tanrinnu, nampa ke’nanga lanaruntungi sikamma tampa’nu assundala’ siagang anynyomba ri barhala. Kabusu’na pakeannu siagang belo-belonu lanarampasa’ ngasengi ke’nanga, sa’gennu a’jari assolara’.
40 Lanasuroi ke’nanga tau jaia assambilako batu, siagang angkere’-kereki kalennu siagang pa’dang.
41 Lanatunui ke’nanga sikamma balla’nu nampa nasuro sikamma tubai’-bainea anciniki anjo hukkunganga. Kammami anjo bateKu lampamariko ri gau’ bawannu. Tenamo nula’bage-bage hadia mae ri sikamma tanrinnu.
42 Le’bappi anjo sikammaya nampa naung larroKu, siagang la’jari sannamMa’ ammotere’. Tenamo Kulalarro pole siagang akkimburu.
43 LaKuhukkungko lanri tenana nanuu’rangi antekamma bateKu amparakaiko ri wattunnu lolo ija. NupakanassuA’ lanri sikontu anjo panggaukang ja’dalaka. Angngapa nanutambai ija anjo sikontu panggaukang appakaringika siagang gau’ bawang? INakke, Batara Kaminang Tinggia, anne akkana."
44 Nakana Batara, "He Yerusalem, lanapitabaiko taua paruntu’ kana angkanaya, ‘Sangkamma amma’na, kamma tomminjo ana’ bainena.’
45 Memang, ikaumi ana’ bainena amma’nu. Tena nangai bura’nenna siagang ana’-ana’ kalenna. Ikau sangkammako sikamma sari’battang bainenu tenaya todong nangai bura’nenna siagang ana’-ana’na. Ikau siagang sari’battannu, iamintu kota-kota niaka ri tammulilinu amma’nu tu Het siagang manggenu tu Amori.
46 Daennu iamintu Samaria ri bageang wara’ siagang sikontu desana. Siagang andi’nu iamintu kota Sodom ri bageang timboro’ siagang sikontu desana.
47 Sanggami pakkasia’nu ampinawangi ke’nanga siagang ampalembai anjo panggaukang appakaringi’-ringi’na ke’nanga? Tenapa! Tasalloami nula’bi panrakkangngang pole nake’nanga.
48 Lanri iNakke, Allata’ala mattallasaka, Nakana Batara Kaminang Tinggia, sari’battannu Sodom siagang desa-desana tale’bakkapi ja’dala’ sangkamma ikau siagang desa-desanu.
49 Sodom siagang desa-desana tampoi lanri jaina parsadiaang kanre-kanreanna kammayatompa akkullei attallasa’ siagang sannang na amang. Mingka tena naparhatikangi ke’nanga tau kasi-asia siagang tau tunaya.
50 Tampoi ke’nanga siagang kapala batui, kammayatompa nagaukangi apa-apa tenaya Kungai. Lanri kammana anjo naKuancuru’ ke’nanga sangkamma le’baka nucini’.
51 Memang Samaria ja’dalaki, mingka dosana tena nabageruanna dosa-dosanu. Panggaukannu bellai la’bi ja’dala’na. Sikamma sari’battang bainenu sanrapangi tau tena salana punna nipassingebarangko. Ikau musti nipakasirikko siagang a’jari hinako!"
52 (16:51)
53 Nakana Batara mae ri Yerusalem, "Sodom siagang Samaria kammayatompa desa-desana laKupa’jari kalumanynyangi ammotere’. Le’baki anjo, nampa mako Kupa’jari kalumanynyang todong.
54 Lanri kammana anjo lasiri’-siri’ mako mae ri kalennu, siagang anjo katunaannu lampappicinikangi mae ri sikamma sari’battannu antekamma la’bi baji’na sarenna ke’nanga.
55 Ke’nanga siagang desa-desana ke’nanga la’jari kalumanynyangi ammotere’, ikau pole siagang desa-desanu.
56 Sai le’bakko angkakkali Sodom ri wattunnu tampo ija
57 siagang tenapa nakaassengang kaja’dallannu? Kamma-kamma anne sangkamma le’ba’ jako siagang ia; ikau nikakkali mako ri tu Edom, tu Filistin siagang sikamma siampi’nu birisika mae ri kau.
58 Musti a’jari sessako lanri sikamma anjo panggaukang appakaringi’nu siagang ra’masaka. INakke, Batara anne akkana."
59 Nakana Batara Kaminang Tinggia, "LaKugaukangi mae ri kau situru’ panggaukannu, lanri nudakkai sumpanu siagang parjanjiannu siagang iNakke.
60 Mingka laKuu’rangi parjanjiang le’baka Kupare’ siagang ikau ri wattu lolonu siagang apparekKa’ parjanjiang siagang ikau ia tappakea satunggu-tungguna.
61 Lanuu’rangi sikamma panggaukannu siagang lasiri’-siriki nusa’ring ri wattunna Kupoterang ammotere’ sikamma sari’battannu mae ri kau. LaKupa’jari ke’nanga rapang ana’-ana’nu, manna pole naanjo kammaya tantamakkai ri parjanjiangKu siagang ikau.
62 LapparekKa’ parjanjiang beru siagang ikau. Na nuassemmo angkanaya iNakke Batara.
63 LaKupammopporangi kasalannu, mingka takkulleako angkaluppai siagang lasiri’-siriki nusa’ring akkanaya. INakke, Batara Kaminang Tinggia, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA