Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN adhabu pole ka sengko’,

² "He, manossa se ta’ langgeng, duduwagi ka Yerusalim sabarang kajuba’anna tengkana."

³ GUSTE Allah Se Mahatenggi makon sengko’ manapa’ pessen kantha reya ka Yerusalim, "He, Yerusalim, ba’na lahir e tana Kana’an. Eppa’na ba’na oreng Amori ban ebuna oreng Het.

⁴ E bakto ba’na lahir, tadha’ se ngetthok talena bujella ba’na, otabana se mandhi’i ba’na, otabana se abeddha’i ba’na bi’ buja otabana se ageddhung ba’na bi’ kaen.

⁵ Tadha’ se neser ka ba’na se endha’a ngalakone sala settong dhari se kasebbut jareya ka ba’na. E bakto ba’na lahir tadha’ se neser ka ba’na, la’-mala’ ba’na ebuwang ka teggal.

⁶ Saellana jareya Sengko’ pas lebat, nangale’e ba’na ya’-kaleya’an e dhalem dharana ba’na se ngambang, tape bi’ Sengko’ ba’na ta’ epanneng sampe’ mate.

⁷ Sengko’ ngala’ aeng, dhara e badanna ba’na pas ebaccowe. Kole’na ba’na bi’ Sengko’ ekosodi mennya’ jaitun. Bi’ Sengko’ ba’na eparaja epakantha tamennan se landhu. Ba’na tombu ceppet, baras ban tenggi rampeng, daddi paraban ngodha. Sosona molae raja, obu’na lanjang, tape ba’na abangkang. E bakto Sengko’ lebat pole, Sengko’ nangale’e ja’ ba’na la napa’ baktona kaangguy bur-leburan. Bi’ Sengko’ Tang juba eampar esapo’agi ka badanna ba’na se abangkang, ban Sengko’ ajanjiyagi Tang kataresna’an ka ba’na. Onggu, Sengko’ mabadha parjanjiyan kabin ban ba’na, ban ba’na daddi Tang andhi’. Sengko’, GUSTE Allah Se Mahatenggi la ngoca’.

⁸ (16:7)

⁹ (16:7)

¹⁰ Saellana jareya bi’ Sengko’ ba’na epangangguy kalambi solaman, sapatu dhari kole’ se paleng alos, dhung-kodhung dhari kaen linen ban juba sottra.

¹¹ Bi’ Sengko’ ba’na eeyas ban mamatan, kalong ban lang-gellang.

¹² Bi’ Sengko’ ba’na eberri’i sello’na elong, teng-anteng ban jamang se bagus.

¹³ Daddi ba’na aeyas emmas ban salaka; kalambina ba’na dhari kaen linen ban sottra solaman. Ba’na olle ngakan roti dhari darigu se paleng bagus, ecampore maddu ban mennya’ jaitun. Raddinna ba’na lowar biyasa ban ba’na daddi dinaju rato.

¹⁴ Sa-bangsa padha ngalem robana ba’na se raddin samporna, ban Sengko’ se la maraddin ba’na. Sengko’ GUSTE Allah Se Mahatenggi la ngoca’.

¹⁵ Tape robana ba’na se raddin ban nyamana ba’na se ro’om bi’ ba’na eangguy ta’ bendher. Ba’na tedhung ban lalake’ sapa’a bai se lebat.

¹⁶ Sabagiyan dhari kalambina ba’na bi’ ba’na ekagabay rarengganna kennengnganna panyemba’anna brahala. Ba’na daddi sondel, badanna ebagi ka saneyap oreng lalake’.

¹⁷ Emmas ban salaka baberri’na Sengko’ bi’ ba’na egabay ca-arcana oreng lalake’, saellana jareya ba’na laju alako cemmer ban ca-arca jareya.

¹⁸ Kalambi solaman baberri’na Sengko’ rowa bi’ ba’na epasang ka ca-arca jareya. Ba’na ngeba ka ca-arca jareya mennya’ jaitun ban dupa se etarema ba’na dhari Sengko’.

¹⁹ Bi’ Sengko’ ba’na eberri’i kakanan dhari darigu se paleng bagus, maddu ban mennya’ jaitun se paleng morne. Tape jareya kabbi bi’ ba’na ebagi ka la-brahala jareya polana terro masennengnga atena. Sengko’ GUSTE Allah Se Mahatenggi la ngoca’.

²⁰ Saellana jareya ba’na ngeba na’-ana’na sengko’ ban ba’na, se lalake’ ban babine’, ekurbannagi ka la-brahala jareya. Apa mon pera’ ta’ esto ka Sengko’ monggu ka ba’na gi’ ta’ cokop, ya?

²¹ Me’ ba’na gi’ ngeba Tang na’-ana’ ekurbannagi ka la-brahala jareya?

²² Odhi’na ba’na se nyondel jareya majitjit ate; e dhalem odhi’na ba’na se kantha jareya ba’na ta’ enga’ sakale ka bakto gi’ kene’na lamba’, e bakto ba’na abangkang ya’-kaleya’an e dharana dibi’ se ngambang rowa."

²³ GUSTE Allah Se Mahatenggi adhabu, "Palang ba’na! Palang onggu! Ba’na ngalakone samacemma kajahadan.

²⁴ Ban pole, e lon-alonna kottha ban e penggirra saneyap lorong ba’na maddek kennengnganna panyemba’anna brahala ban pasondellan.

²⁵ Ba’na macemmer raddinna robana. Badanna epatabar ka saneyap lalake’ se lebat, ban tadha’ ambuna ba’na se azina.

²⁶ Messer, tatanggana ba’na se raja napsona bi’ ba’na ebarengnge tedhung. Ba’na pajat nengnget nyondel polana terro mapeggella Sengko’.

²⁷ Sateya Sengko’ la ngangka’ Tang tanang ngokoma ba’na; berkat se la ebagi ka ba’na bi’ Sengko’ ekala’a pole. Bi’ Sengko’ ba’na ebagiya ka oreng Filistin se baji’ ka ba’na ban se ngalennyer nangale’e tengkana ba’na se kotor jareya.

²⁸ Tape ba’na gi’ arassa korang, daddi ba’na gi’ ser-nyerser oreng Asyur. Ba’na daddi sondella oreng Asyur, tape ban reng-oreng jareya ba’na gi’ arassa korang keya.

²⁹ Ba’na laju daddi sondella oreng Babil, bangsa dagang rowa. Tape bangsa jareya ta’ sanggup keya aladine ba’na sopaja ba’na ta’ terrosa arassa korang malolo."

³⁰ GUSTE Allah Se Mahatenggi adhabu, "Ba’na ajalannagi jareya kabbi akantha sondel se ta’ tao todhus.

³¹ E lon-alonna kottha ban e saneyap lorong ba’na maddek kennengngan panyemba’anna brahala ban pasondellan. Tape ba’na banne sondel biyasa se parlo ka pesse.

³² Ba’na akantha binena oreng se akiyanat ka lakena ban alako serong ban lalake’ laen.

³³ Sondel salanjangnga olle bajaran, tape sabaligga ba’na se ari’-berri’ ka se-kakasena, la’-mala’ reng-oreng jareya bi’ ba’na ecacae eberri’i pesse sopaja dhatengnga dhari man-dhimman ekapolonga tedhung bi’ ba’na.

³⁴ Ba’na reya sondel se banneyan ban sondel en-laenna. Tadha’ se maksa nyoro ba’na daddi sondel. Ba’na ta’ ebajari, la’-mala’ ba’na dibi’ se majar. Pajat onggu, ba’na banneyan dhari en-laenna."

³⁵ He, Yerusalim, sondel, mara edhingngagi apa se edhabuwagi GUSTE Allah Se Mahatenggi, "Ba’na mokka’ kalambi, ban menangka sondel ba’na massra’agi badanna ka se-kakasena ban la-brahala se majitjit rowa. Na’-ana’na ba’na bi’ ba’na epate’e, ekurbannagi ka la-brahala jareya.

³⁶ (16:35)

³⁷ Daddi, sakabbinna kakasena ba’na bi’ Sengko’ epakompola, se ekaleburi ba’na ban bariya keya se ekabaji’i. Bi’ Sengko’ epamanjengnga e sakalenglengnga ba’na. Ba’na bakal ebangkangana bi’ reng-oreng jareya, sampe’ reng-oreng jareya padha bisa ngabas badanna ba’na.

³⁸ Bi’ Sengko’ ba’na eokoma polana azina ban mate’e oreng. Tang ate peggel, daddi Sengko’ ngokoma ba’na ban okoman mate.

³⁹ Bi’ Sengko’ ba’na epassra’agiya ka se-kakasena; se-kakasena ba’na jareya bakal magujura sakabbinna kennengngan se bi’ ba’na eangguy nyondel ban nyemba brahala. Kalambi ban pareyasanna ba’na bakal erampasa kabbi bi’ reng-oreng jareya sampe’ ba’na abangkang.

⁴⁰ Se-kakasena ba’na jareya bakal nyorowa oreng sabannya’na agarujuk ba’na ban bato, thok-ngetthok badanna ba’na ban peddhang.

⁴¹ Ko-bengkona ba’na bakal eobbara, reng-oreng babine’an bakal esorowa nenggu ba’na se ajalannagi okoman jareya. Kantha jareya carana Sengko’ maambu zina se elakone ba’na jareya. Ba’na ta’ kera ari’-berri’ ka se-kakasena pole.

⁴² Buru saellana jareya peggella Tang ate bakal terebba, ban Sengko’ bakal ayemma pole. Sengko’ ta’ peggella pole ban ta’ tamburuwana pole.

⁴³ Sengko’ ngokom ba’na polana ba’na ta’ enga’ baramma Sengko’ se arabat ba’na gi’ ngodhana. Ba’na mapeggel Sengko’ polana sakabbinna tengkana se jahat jareya. Arapa tengkana ba’na se majitjit jareya me’ gi’ etambai pole ban lalakon zina? Sengko’, GUSTE Allah Se Mahatenggi la ngoca’."

⁴⁴ PANGERAN adhabu, "He, Yerusalim, reng-oreng bakal ngangguya ca’-oca’an reya ka ba’na, ‘Ana’ tadha’ bidana ban embu’na.’

⁴⁵ Pajat, ba’na ana’na ebuna. Ebuna ba’na baji’ ka lakena ban ka na’-ana’na dibi’. Ba’na padha ban tan-taretan bine’na se baji’ ka lakena ban ka na’-ana’na keya. Ba’na ban tan-taretanna, iya reya tha-kottha e sabingkerra, andhi’ ebu oreng Het ban eppa’na oreng Amori.

⁴⁶ Embugga ba’na Samaria, e bagiyan dhaja, ban sa-disana. Ban ale’na ba’na Sodom e bagiyan lao’, ban sa-disana.

⁴⁷ Apa ba’na la arassa cokop pera’ nerowe tengkana tan-taretanna se majitjit ate jareya? Enja’! Ta’ saapa abidda dhari jareya ba’na la’-mala’ la ajuba’an tengkana dhari tan-taretanna jareya.

⁴⁸ Bit nyamana Sengko’, Allah se odhi’, GUSTE Allah Se Mahatenggi, taretanna ba’na Sodom ban sa-disana gi’ tao atengka se juba’na padha ban tengkana ba’na ban sa-disana.

⁴⁹ Sodom ban sa-disana sombong polana andhi’ parsadhiya’anna kakan sabannya’na ban bisa odhi’ taremtem ban ayem. Tape Sodom ban sa-disana jareya ta’ tao mekkere oreng mesken ban oreng se nespa.

⁵⁰ Atena angko ban cengkal, sarta ngalakone ra-parkara se ekabaji’i Sengko’. Daddi bi’ Sengko’ epaancor akantha se la etangale’e dibi’ bi’ ba’na sateya reya.

⁵¹ Pajat Samaria jahat, tape sa-dusana ta’ sampe’ saparona sa-dusana ba’na. Tengkana ba’na ajuba’an parana. Tan-taretan babine’anna ba’na katon tadha’ salana mon ebandhingngagi ban ba’na. Ba’na kodu arassa malo ban nespa!"

⁵² (16:51)

⁵³ PANGERAN adhabu ka Yerusalim, "Sodom ban Samaria ban sa-disana bi’ Sengko’ epama’mora pole. Saellana jareya buru ba’na bi’ Sengko’ epama’mora pole keya.

⁵⁴ Kalaban cara se kantha jareya ba’na bakal todhusa ka aba’na dibi’, ban kanespa’anna ba’na bakal noduwagiya ka tan-taretanna ba’na saapa pojurra nasibba aba’na.

⁵⁵ Sodom ban Samaria ban sa-disana bakal ma’mora pole, bariya keya ba’na ban sa-disana.

⁵⁶ Ba’na gu ta’ tao ngala’-gella’ Sodom e bakto ba’na gi’ angga’

⁵⁷ ban kajahadanna ba’na gi’ ta’ etemmo, ta’ iya? Sateya ba’na padha bai ban Sodom jareya; ba’na ekala’-gella’ oreng Edom, oreng Filistin ban ga-tatangga laenna se baji’ ka ba’na.

⁵⁸ Ba’na kodu nanggung kasossa’an polana tengkana se kotor ban majitjit ate jareya. Sengko’ PANGERAN la ngoca’."

⁵⁹ GUSTE Allah Se Mahatenggi adhabu, "Bi’ Sengko’ ba’na eokoma satembang ban tengkana, sabab ba’na mongkere sompana ban ta’ neptebbi tang parjanjiyan ban ba’na.

⁶⁰ Tape Sengko’ ngenga’ana parjanjiyan se bi’ Sengko’ epabadha ban ba’na e bakto ba’na gi’ ngodha, ban Sengko’ mabadha’a parjanjiyan ban ba’na se eangguya salanjangnga.

⁶¹ Ba’na bakal enga’a ka sakabbinna tengkana ban arassa malo tan-taretan babine’anna ba’na bi’ Sengko’ epabali ka ba’na. Bi’ Sengko’ tan-taretanna ba’na jareya epakantha’a ana’na ba’na, maske jareya ta’ tamaso’ e dhalem Tang parjanjiyan ban ba’na.

⁶² Sengko’ mabadha’a parjanjiyan se anyar bi’ ba’na. Daddi ba’na tao ja’ Sengko’ PANGERAN.

⁶³ Sakabbinna kasala’anna ba’na bi’ Sengko’ esapora’a, tape ba’na ta’ kera bisa loppa ka sakabbinna kasala’an jareya, ban ba’na bakal arassa’a todhus se acaca’a apa’a bai. Sengko’ GUSTE Allah Se Mahatenggi la ngoca’."

Yehezkiel

Video Yehezkiel 16

Ikuti Kami:

KONTAK | PARTISIPASI | DONASI