Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kata TUHAN seh ka man bangku nina,
2 "O manusia si ermasap-masap, tuduhkenlah man Jerusalem uga macikna perbahanenna."
3 TUHAN si Erdolat nuruh aku nehken KataNa enda man Jerusalem nina, "O Jerusalem, kam tubuh i negeri Kanan. Bapandu kalak Amori janah nandendu kalak Heti.
4 Tupung kam tubuh la lit kal si ka ngkeret tinali pusungndu, la lit si peridi tah si engkuningi kam alu sira, janah la lit si maluti kam alu uis.
5 La lit kalak si erkuah ate man bandu lako ndalanken si e kerina. Tupung kam tubuh la lit ise pe si erkeleng ate man bandu; kam iambekken ku tengah mbalmbal.
6 Kenca bage mentas Aku, janah Kuidah kam ketepper-ketepper i bas darehndu, tapi la Kupelepas kam mate.
7 Kubuat lau, jenari Kuburihi dareh si leket i bas dagingndu. Kuminaki dagingndu alu minak saitun. Kupebelin-belin kam desken sinuan-sinuan si mehumur. Gedangndu tambah, dagingndu mbelin timbas, kam nggo jadi singuda-nguda. Tentenndu jadi mburnis, bukndu nggedang, tapi kam manjang-anjang. Tupung mentas Aku, Kuidah maka nggo seh paksana turah atendu ngena. Kupakeken jubahKu ku dagingndu si manjang-anjang e, janah erpadan Aku maka Kukelengi kam. Labo terjeng je saja, tapi kubahan iketen padan perjabun ras kam, emaka kam jadi sikerajangenKu." Bage nina TUHAN si Erdolat.
8 (Yeh 16:7)
9 (Yeh 16:7)
10 "Kenca bage Kupakeken man bandu baju gaun si ersulam, sepatu kulit si mejile kal, pengiket takal i bas kain linen nari, bage pe jubah sutra.
11 Kupakeken man bandu perhiasen si meherga gelang ras bura.
12 Kubereken man bandu cincin igung ras kerabu, bage pe mahkota man pakenndu.
13 Dage kam tetap make perhiasen emas ras pirak, bage pe ruisken kain linen ras sutera si ersulam. Roti si man panganndu ibahan i bas tepung si mejile nari, rikut ras tengguli bage pe minak saitun. Jilendu tuhu la teralang, janah kam jadi kemberahen.
14 Kam terberita ku kerina bangsa-bangsa erkiteken jilendu si la erpandangen, sabap Aku erbahanca kam mejile." Bagenda me nina TUHAN si Erdolat.
15 "Tapi isalahgunakenndu rupandu si mejile ras gelarndu si terberita e. Kasa dilaki mentas, medem kam rassa.
16 Uisndu ipergunakenndu jadi perhiasen i bas inganndu ersembah man berhala. Kam jadi diberu perlua-lua, janah man ise pe iberekenndu dagingndu.
17 Perhiasen emas ras pirak si Kubereken man bandu ibahanndu jadi patung dilaki, jenari erlua-lua kam ras patung e.
18 Uis si ersulam si Kubereken man bandu mbarenda, ipakekenndu man patung-patung e, janah ipersembahkenndu ku je minak saitun ras kumenen bekas pemerengKu.
19 Kubereken man bandu pangan si ibahan i bas tepung si mejile nari, minak saitun ras tengguli, tapi kerina si e ipersembahkenndu man berhala-berhala e lako muat ukurna." Bage nina TUHAN si Erdolat.
20 "Kenca bage ibuatndu anak-anakKu si ipupusndu guna Aku, subuk dilaki bage pe diberu, jenari ipersembahkenndu man berhala-berhala. Langa kin akapndu cukup ngobah i bas aku nari,
21 maka ibuatndu denga ka anak-anakku janah ipersembahkenndu man berhala-berhala?
22 Kidekah kam nggeluhken geluhndu si macik e selaku diberu perlua-lua, sekali pe la pernah ingetndu kuga kam nai sanga danak-danak denga manjang-anjang, katepper-katepper i bas darehndu jine."
23 Nina TUHAN si Erdolat man Jerusalem! Cilaka me kam! Cilaka me! Kerina kejahaten e nggo ilakokenndu, janah tole nari,
24 i tepi tep-tep dalan ipajekkenndu ingan ersembah man berhala ras man ingan erlua-lua.
25 Rupandu si mejile icemarkenndu, daginngndu ijadikenndu man tep-tep dilaki si mentas janah la erngadi-ngadi kam erlua-lua.
26 Mesir, tetanggandu si mbelin kerincuhenna e, itemanindu medem. Kam sengaja erlua-lua gelah keke rawangKu.
27 Genduari Kuawatken tanKu lako ngukum kam, janah Kubuat pasu-pasu si nggo Kubereken man bandu, Kuendesken kam man kalak Pilisti si ernembeh ate man bandu janah si erciga ate nandangi perbahanenndu si melket e.
28 Tapi langa ka bo akapndu puas. Emaka iayak-ayakndu ka bangsa Assur. Kam jadi gundikna, tapi la ka bo akapndu puas ibahanna.
29 Jenari jadi gundik bangsa Babilon ka kam, bangsa perbinaga e, tapi ia pe la bo ka ngasup mahanca kam puas."
30 Nina TUHAN si Erdolat, "Si enda kerina nggo ilakokenndu desken perlua-lua si la meteh mela.
31 I tep-tep dalan ipajekkenndu ingan ersembah man berhala-berhala ras man inganndu erlua-lua, aminna kam la bagi perlua-lua si deban; sabap kam la perlu duit.
32 Kam bali ras sekalak ndehara si ngelukken perbulangenna gelah erlua-lua ras dilaki si deban.
33 Adi diberu perlua-lua si deban, kalak nge nggalar man bana; tapi kam, kam nge si mereken hadiah man dilaki si ngena atendu, janah iendik-endikndu pe ia alu mereken duitndu gelah i ja nari pe reh ia lako medem ras kam.
34 Kam tuhu-tuhu sekalak diberu perlua-lua si gandil. La lit si maksa kam jadi diberu perlua-lua. Kalak la perlu nggalar man bandu tapi kam nge si nggalar. Kam gandil tuhu-tuhu."
35 Genduari dage, o Jerusalem, perlua-lua, begikenlah kai si ikataken TUHAN,
36 janah enda kap kata TUHAN si Erdolat. Nina, "Itangtangindu uisndu, janah bagi sekalak diberu perlua-lua, iendeskenndu dagingndu man kalak si ngena atendu ras man berhala-berhala si melket e. Anak-anakndu ibunuhndu jadi persembahen man berhala-berhala e.
37 Erdandanken si e, Kupepulung me kerina dilaki si nggo pernah jadi temanndu, subuk si ngena atendu bage pe si ciga atendu. Kusuruh ia tedis i sekelewetndu, kenca bage Kutangtangi kerina uisndu, maka kam manjang-anjang.
38 Kuukum kam erkiteken erlua-lua ras munuh janah erkiteken nembehna ras rawana ateKu, Kuukum mate me kam.
39 Kutamaken kam iteruh kuasana, maka irontaskenna kerina inganndu erlua-lua ras nembah man berhala-berhala e. Kerina uis ras perhiasenndu irampasna, seh maka kam manjang-anjang.
40 Iajukna jelma si nterem menteri kam alu batu, jenari ikeret-keretna dagingndu alu pedang.
41 Icilukna rumahndu janah isuruhna diberu-diberu ngenen uga kam iukum. Alu bage kupengadi kam erlua-lua, janah la banci ibagi-bagikenndu pemerendu man dilaki si ngena atendu.
42 Kenca bage ngadi me pernembeh ateKu, janah ukurKu teneng mulihi. Lanai Aku merawa ntah pe mecimberu.
43 Nggo kam lupa kuga nai ulina perbahanKu tupung kam nguda denga. Erkiteken si e ipekekendu rawangKu alu kai si nggo ilakokenndu. Em sabapna maka Kubalas man bandu kerina perbahanenndu e. Ngkai maka lagu langkahndu si macik e itambahindu denga ka alu erlua-lua?" Bage nina TUHAN si Erdolat.
44 Nina TUHAN, "O Jerusalem, ipake kalak me kuan-kuan enda man bandu, 'Uga nandena, bage ka nge anakna.'
45 O beru payo kal me tuhu kam anak nandendu. Nandendu ersegat ate nandangi perbulangenna ras anak-anakna. Kam bali ras senina-seninandu, si ersegat ate nandangi perbulangenna ras anak-anakna. Kam ras senina-seninandu e, eme kota-kota i sekelewetndu, nandendu eme kalak Heti janah bapandu kalak Amori.
46 Kakandu eme Samaria i Utara, rikut ras kuta-kutana, agindu eme Sodom i Selatan rikut ras kuta-kutana.
47 Cukup kin akapndu ngikutken lagu langkahna dingen ngusih perbahanenna si macik e! Lang; kentisik nari macik denga ka nge lagu langkahndu i bas kai si ilakokenndu."
48 Nina TUHAN si Erdolat man Jerusalem, "Asa tuhu Aku Dibata si enggeluh, seninandu Sodom ras kuta-kutana la pernah bagi kam e jahatna.
49 Sodom ras kuta-kutana meganjang rukur, erkiteken melala nakanna janah ia nggeluh alu dame ras teneng; tapi la iperdiatekenna kalak musil ras kalak si mesera geluhna.
50 Meganjang ukurna dingen mekeng ka pe, janah ilakokenna kai si ciga ateKu; erdandanken si e Kukernepken ia bagi nggo ietehndu.
51 Dosa Samaria la lit setengah asa dosandu e. Ndauh kal maciken perbahanenndu asa perbahanenna. Ngidah kerina lagu langkahndu, senina-seninandu si deban tempa-tempa la lit salahna adi ibandingken ras kam.
52 Emaka genduari arus igengkenndu ugape melana. Dosa-dosandu ndauh kal mejinen asangken dosa senina-seninandu e seh maka tempa-tempa ia la ersalah adi ipeseri ras kam. Arus maka mela dingen kitik akapndu bandu, sabap erkiteken kam seninandu e teridah tempa bersih.
53 Nina TUHAN kempak Jerusalem, "Sodom ras Samaria rikut ras kuta-kuta sekelewetna Kujadiken pagi senang akapna mulihi. Tuhu kam pe senang akapndu pagi.
54 Mela pagi akapndu ngenehen dirindu, janah arah kecibalndu si man kemelanken e, ieteh senina-seninandu me pagi uga sikapna sikerajangenna.
55 Senang akapna pagi mulihi, jenari kam ras kuta-kuta sekelewetndu pe ipajekken ka pagi mulihi.
56 Ma itandaindu kin nai Sodom tupung meganjang denga ukurna,
57 ope denga kejahatenndu tereteh? Genduari kam pe bali ras ia, kam jadi pertawa-tawan man kalak Edom, kalak Pilisti ras negeri-negeri si ndeher ras kam si ernembeh ate man bandu.
58 Kam la banci lang ngenanami kiniseran erdandanken perbahanenndu si macik dingen si ciga ateKu." Bage nina TUHAN.
59 Nina TUHAN si Mada Kuasa, "Kulakoken me man bandu sue ras perbahanenndu. Sabap lanai iperdiatekenndu sumpahndu, janah ilanggarndu perpadanenndu ras Aku.
60 Tapi Kuinget kap perpadanen si Kubahan ras kam tupung kam nguda denga, janah Kubahan ras kam sada perpadanen si tahan seh rasa lalap.
61 Ingetndu me kerina perbahanenndu, janah mela akapndu tupung Kuulihken seninandu si sintua ras si nguda. Kubahan ia desken anakndu, aminna gia si e la bengkat i bas perpadanenKu ras kam.
62 Kupelimbarui perpadanenKu ras kam maka ietehndu maka Aku kap TUHAN.
63 Kualemi kerina salah si nggo ibahanndu, tapi kesalahenndu e la terlupakenndu, seh maka mela kam sumekah pe." Bage nina TUHAN si Mada Kuasa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA