Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali a’i-a’ingku, ane mangkonong gombo ngkita, kamonsonya kita samparia paka malagi sala to taika. See naka to taotao taa boros kita to rani mawali tau to mampotundeka sa’e tuntu i mPue Allah. Apa ane ratamo temponya kita darabotus, tempo etu kami to mampotundeka sa’e tuntu i mPue Allah, palaong mami semo to danaparesa kojo nto Pobotus. Pei ane mangkonong gombo ngkita, si’a ojo tau to mampotundeka sa’e to masipato mangajagai gombonya, samparia kita. Wali ane rapanya re’e samba’a kita to taa kojo re’e gombonya to sala, tau etu tau to masilonga. Pasi tau etu nakoto mangkuasang samparia saga ngkoronya.
2 (3:1)
3 Wali aku mamporapaka mangkonong jarang. Apa ane kita rani mampone jarang kita mamposaka ruyu sama ri nganganya see jarang etu damangalulu songkanta. Wali yako sama to kodi etu see naka jarang to bae maya mangalulu jaya to kita mangampilis.
4 Pasi aku mamporapaka wo’u mangkonong bangka. Apa bangka bae kojo pei wosenya kodi kojo. Pei nempo ewa wetu, yako wosenya to kodi etu see naka bangka etu maya nakeni ntau puenya mangalulu ewa wimba pamporani ntau. Nempo marimbo ngoyu mantawuis bangka etu, tau puenya tiroo maya mangangkeni ewa wimba pamporaninya.
5 Wali ewa see seja nganga ngkita. Apa nganga etu saga ngkoronta to kodi kojo, pei bae kojo palaong to mawali yako ri gombo to ito’onya. Wali pobuuka mangkonong apu. Apa apu uyu-uyunya kodi kojo, pei taa masae yako etu, boros kaju to mosi yau.
6 Wali nganganta maya raporapaka ewa apu etu. Apa ane saga ngkoronta, nganganta semo to bae kojo kaja’anya. Apa yako ri gombo to nato’o nu nganganta, see naka juku koro ngkita pasi raya ngkita mawali maja’a. Pasi nganganta raporapaka ewa apu to rapotuwu yako apu naraka semo, apa gombo to ito’onya maya mampakaja’aka yau katuwu ngkita to lino.
7 Wali samparia ngaya binatang pasi tonsi pasi binatang to mandonggo pasi to maroo ri raya ntasi, samparia paka maya nakuasang ntau.
8 Pei nganga ntau, tare pasi samba’a tau to maya mangkuasang kojo. Apa gombo to nato’o nu nganga ntau maja’a kojo pasi taa maya rata’amaka. Pasi gombo etu raporapaka ewa moso nu ule to mate tau natungku.
9 Wali matempo-tempo kita mangampake nganga ngkita mangabarong i Pue Allah, Pa’a ngkita. Pei ri tempo to yusa kita mangampake nganganta etu mangampoja’a yunu ngkita to lino to napapowali seja i mPue Allah. Wali gete, taa masipato apa sira naika i mPue Allah sewaju ewa Ia semo.
10 Wali gombo to mangabarong i Pue Allah pasi gombo to mampoja’a sa’e etu paka masuwu yako samba’a nganga. Wali a’i-a’ingku, taa kojo masipato kita mangika ewa wetu!
11 Apa ane rapanya ewa mata nue, taa maya ue miyoli pasi ue to masi samba’aja matanya etu.
12 Pasi a’ia’ingku, ane rapanya kaju ara, tare to mampowuaka wua nsaitun. Pasi wiyaa nu anggur tare to mampowuaka wua ara. Wali taa seja re’e pasi samba’a mata nue to nja’u ue to masi pasi nja’u seja ue miyoli. Wali maka pei dua ngaya gombo to masuwu yako ri nganga ngkita? Etu semo gombo to matao pasi gombo to maja’a.
13 Wali wimba, bara re’e tau ri oyo ngkomi to majoli mangansani pasi to nawaika i mPue Allah kapandenya? Ane ewa see, to tao-tao tau etu mampaponsanika sa’e kapandenya etu yako ri lengko ngkatuwunya to matao, pasi yako palaong to inikanya. Pasi ne’e ia mangei mangika palaong to etu, apa tau to monso pu’u re’e kapandenya, tau etu taa mangei.
14 Pei ane komi makodi rayamu resi sa’e pasi timopo rayamu resi sa’e pasi mampobuuka ojo koro ngkomi semo to bae batuanginya, ane ewa wetu lengko ngkomi, ne’e tabaro manganto’o, “Aku re’e kapande to nawaika i mPue Allah aku.” Apa kamonsonya tau to ewa wetu lengkonya si’a tau to pande, wali gombo ngkomi mangabarong koromu etu, ojo wuti semo.
15 Apa tau to rato’oka pande, ane ewa wetu lengkonya, kamonsonya kapande to re’e resi ia si’a kapande to yako resi i Pue Allah ndate saruga. Pei kapande ntau to ewa wetu lengkonya, ojo yako ri lino si’i semo, yako pamporani ndayanya pasi yako i Kepala nto pantipu.
16 Apa ane tau timopo pasi mampobuuka ojo koro nsira semo to bae batuanginya, ane ewa see katuwu nsira marotai pasi re’e samparia ngaya mpalaong to maja’a. Wali ane ewa see manasa resi kita kapande nsira si’a yako resi i Pue Allah.
17 Pei ane tau to re’e kapande to yako resi i Pue Allah ndate saruga, tau etu ewa si’i lengkonya, to uyunya, ia matao lengkonya panewa ia rani tuwu masingkatao pei sa’e, ia taa makasar, ia simpalai, ia rani kojo mangansawang sa’e, pasi boros palaong to matao to inikanya to raporapaka ewa wua ngkaju to matao. Pasi tau etu taa mampasisala tau pasi si’a ojo gombonya to manoto.
18 Wali tau to rani mangansawang yununya see damawali masingkatao samba’a pei samba’a, tempo ia mangika palaong etu mangaliwu kasingkatao, ia maya raporapaka ewa to pansawu liano. Naka pei ia ewa to pansawu liano apa re’e pu’u wuanya yako ri palaong to etu. Wali wua mpalaong to inikanya etu, etu semo lengko ntau to singkonong pei i Pue Allah. Wali bae kojo batuanginya kapande to nawai i mPue Allah ndate saruga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA