Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian! Ndaq lẽq antare side luwẽq saq mẽlẽ jari guru. Side pade nenaoq bahwe ite saq jari guru gen teadilin beratan tebanding dengan lain.

² Ite selapuq kereng miaq kesalaqan. Laguq dengan saq ndẽq uwah miaq kesalaqan siq ucapan-ucapanne, ie dengan saq sempurne, saq bau nguasein selapuq awakne.

³ Ite masang plẽbẽk lẽq biwih jaran adẽq ie mẽlẽ turut kemẽlẽqte, make ite bau ngatur selapuq awak jaran nike.

⁴ Bait ẽndah conto sopoq kapal. Timaq kapal nike belẽq gati dait tedorong siq angin saq keras, laguq ie teatur siq kemudi saq kodẽq gati, menurut kemẽlẽq jurumudi.

⁵ Maraq nike ẽndah ẽlaqte, timaq ẽlaq nike bagian awak saq kodẽq, laguq ie bau nyombongang diriq mengenai hal-hal saq belẽq-belẽq. Cobaq serioq, gawah saq belẽq bau tesedut siq api saq kodẽq!

⁶ ~Elaq ẽndah pade maraq api. Lẽq antare bagian-bagian awakte, ẽlaq nike sumber kejahatan saq bau piaq najis selapuq awak dait ngidupang rode kehidupan, ẽlaq nike mẽsaq tenyalaqang siq api nerake.

⁷ Segale macem binatang buas, kedit, binatang saq ngumang dait empaq, bau tepiaq isah, dait sampun ẽndah tepiaq isah siq manusie.

⁸ Laguq ẽlaq manusie ndẽqne bau tepiaq isah siq sai juaq. ~Elaq nike jahat dait ndẽqne bau tekuasein; penoq siq racun saq nyematẽq.

⁹ Ite kadu ẽlaq nike jari ngucapang syukur lẽq Tuhan dait Bapante, laguq ẽndah jari ngutuk sepade manusie, saq sampun tecipteang menurut gambar Allah.

¹⁰ Lẽman biwih saq pade sugul ucapan-ucapan berkah dait ẽndah ucapan-ucapan kutukan. Sepatutne ndẽqne maraq nike.

¹¹ Napi araq pengembulan nyugulang aiq due macem, aiq tawah kance aiq pait lẽman pengembulan saq pade?

¹² Semeton tiang senamian! Lolo are ndẽqne bau ngasilang buaq Zaitun, dait lolo anggur ndẽqne bau ẽndah ngasilang buaq are. Pengembulan saq aiqne paẽq ndẽqne bau ẽndah nyugulang aiq saq tawah.

¹³ Sai lẽq antare side pade saq bijaksane dait bebudi? Ie harus nyatayang hal nike langan perbuatanne saq solah saq tebarengin siq kebijaksanean saq dateng lẽman atẽ saq lemah lembut.

¹⁴ Laguq lamun side pade talon atẽ dait mentingang diriqde mẽsaq, ndaq side pade banggeang diriq dait ndaq beduste ngelawan kebenaran.

¹⁵ Kebijaksanean maraq nike ndẽqne berasal lẽman sorge. Ie berasal lẽman dunie, dait napsu manusie, dait lẽman sẽtan.

¹⁶ Lẽq mbẽ araq talon atẽ dait mentingang diriq mẽsaq, lẽq derike ẽndah araq keributan dait segale macem perbuatan saq jahat.

¹⁷ Laguq kebijaksanean saq asalne lẽman atas, pertame-tame murni, beterus demen bedamẽ, gerasaq, penurut, penoq belas kasihan dait ngasilang perbuatan-perbuatan saq solah, ndẽq bepihak dait ndẽq munapik.

¹⁸ Buaq-buaq lẽman kebenaran nike tesawur lẽq dalem damẽ umaq dengan saq demen bedamẽ.

Yakobus

Video Yakobus 3

Ikuti Kami:

KONTAK | PARTISIPASI | DONASI