Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Utat mita! Dikabií mobayong ing kon sigad monimu im mo'ibog mobalií guru. Kota'auan monimu, kita inta mobalií guru lebebií moboga-bogat im pongadilan nongkon intau ibanea.
2 Kita komintan mokakit mogaid kon inta no'itaḷaí. Ta'e intau inta diaí dodai onda nosingog kon no'itaḷaí, sia tua intau nosompurna, inta mokokawasa kom bayongan awaknya.
3 Aka kita mopopakeí in rante kom bibig ing kabaḷo simbaí sia dumudui kon ibog naton, daí modait kokawasa'an naton im bayongan awak ing kabaḷo tatua.
4 Bo indoiai doman ing kapaḷ. Umpakah moḷoben ing kapaḷ tatua bo diaan in tompot moropot, ta'e sia kendalionbií ing kamudi inta mo'intok totok, podudui ibog in intau inta nodia.
5 Naí doman tua in dilaí naton; umpakah mo'intok in dilaí naton tua, ta'e mota'aubií in sia dumodia kon soaáḷ mita inta mongoḷoben. Indoiaikah, umpakah mo'intok in tuḷu ta'e mokopokakbií in sia kong kayuon inta moḷoben.
6 Dilaí tua naonda bo tuḷu. Kon awak naton, sia mobalií pangkoi im mora'at inta mopobaya-bayak makow im mora'at kom bayongan awak naton. Takin tuḷu inta nongkon naraka, sia momokak kom bayongan kobiagan naton.
7 Bayongan mahaḷuk inta kalig, ḷagapan mita, takin mahaḷuk mita inta ḷumandai mayak bo mahaḷuk mita kon dagat mota'aubií yonokon bo noyonok domandon in intau.
8 Ta'e dilaí in intau diaí mota'au yonokon. Dilaí tua im mora'at bo diaíbií kokawasa'an; nopuling in rasum inta mokopatoi.
9 Pakeíon naton mopoyaput in sukur ko'i Tuhan bo ko'i Amaí naton, ta'e pakeíon doman mogodi-godimai kon tumpaḷa intau, inta aim pinomia pinodudui kom batangan i Allah.
10 Nongkon bibig inta notongkai ḷumuai in singog posukur bo singog doman pogodi-godi. Utatku mita, diaíbií mota'au in natua!
11 Oyuíon degaí im bokakak inta mopoḷuai in tubig noliau bo tubig nopait nongkon tobatuí bokakak tatua?
12 Utatku mita, pangkoi in ara diaíbií in sia mopomungai in zaitun, bo pangkoi in anggur diaíbií mopomungai in ara. Bokakak in tubig no'ibung diaíbií in sia mopoḷuai in tubig inta moliau.
13 Aka kon sigad monimu oyuíon intau inta mobijaksana bo mopandoi, yo mustibií intua ponyatanya kong kobobiag mopia takin mogaid kon soaáḷ mita inta mopia, inta sinakinan ing gina inta diaí mosiḷantud bo kabijaksana'an.
14 Ta'e aka mo'ikow mo'intoi bo tongaí momikir kong kopontingan tontanií, dona'aibií pongaḷakuang monimu ing kabijaksana'an tatua, sin dodia monimu natua im mopoyotu'uybií in habar inta nobanar nongkon i Allah.
15 Kabijaksana'an natua de'emanbií nongkon soroga. Tua in nongkon duniabií, nongkon ibog in intau, bo nongkon dimbuḷoí!
16 Kon onda oyuíon intoi bo sipat inta tongaí momikir kong kopontingan tontanií, yo kon tua oyuíon domandon in ropatoi bo bayongan oaíid inta mora'at.
17 Ta'e intau inta noko'ulií kong kabijaksana'an nongkon i Allah, yo sia im muna-munamai totok modarit, onda intua mo'ibog in sia kon dodamean, mobahasa makow, bo motoindudui. Moḷoben in tabinya bo oaíidnya mongopia. Diaíbií in sia momilií kon intau bo diaíbií tongaí ki ubo-uboḷmai mopia.
18 Soaáḷ inta mopia tua bungaibií im bibit dodamean inta inambor intau inta mo'ibog in dodameman!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA