Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nal᷊iung ene iạ saụewe nakahombang papasilo. Iạ e nakasilo tukadẹ̌ sěmbaụ su sorga e natope. Bọu ene kinaringihẹ̌ko l᷊ai piạ tingihẹ̌ nạung seng bọu měmẹ̌misara si siạ kere tingihu napiri. Tingihẹ̌ ene něbera, "Endaị e awị sol᷊ong ini. Iạ e mapasilo si kau apa kụ sarung mariadi."

² Iạ e apidu nilohoěngu Rohkẹ̌ u Ruata. Mase iạ nakasilọ e su sorga e kai piạ kararatuang sěmbaụ, kụ piạ sěngkatau mạiang su kal᷊aianeng e.

³ Gatine su sěnnang kere paramata Yaspis dingangu paramatan Sardis. Ene piạko rěndipahẹ̌ sěmbua awạ e kamumụ něliwung kaderang kararatuang ene.

⁴ Ene nělikụ nělimbolong kaderang kawawantugẹ̌ ene piạko l᷊ai kaderang kararatuang bal᷊ine kal᷊awọe ruam pul᷊o ěpạ su waụ e. Sene tangu nikaianengu těmbonange i sire ruam pul᷊o ěpạ su kataune měmpělẹ̌luheng pakeang i sire mawawira ringangu makotane wul᷊aeng.

⁵ Bọu kaderang kararatuang ene e naměsị e tualagẹ̌ měkẹ̌kilạ mase piạ e tingihu rěllụ měgẹ̌gaghal᷊ẹ̌dụ. Kụ su těngong kararatuang ene e piako l᷊ai oborẹ̌ pitumbaụ kạdarikọ; kụ kai ene Rohkẹ̌ u Ruata, arěgang pitu.

⁶ Mal᷊aing kẹ̌kaěbakeng su těngong kararatuang ene e piạ apa kakěllaěng mạngawẹ laud'u kasěnaěng, matilang kere galasẹ̌. Kạdal᷊ikụ su kaderang kararatuange, suapan sěndihange, piạ diadikang ěpạ, kụ su těngone ringangu su l᷊ikude napěpidu mata.

⁷ Diadikang humotong, kakěllaěng kere singa. Karuane, kere sapi esẹ. Katěllune piạ gatine mẹ̌sul᷊ungu ghahịu taumata. Arawe kaěpạ e, kěllaěng kere manụ kamamaresẹ̌ kạtěllạ e.

⁸ Kaěpạ u riadikang ene nahiạu panide pẹ̌tahạ ěnnung, mase napěpidẹ̌ dingangu su sěhaweng dal᷊unge napenẹ u mata. Ěllo hěbi manga riadikang ene hanesẹ̌ měkẹ̌kantarị tawẹ ědone, "Susi, susi, apakasusiko Mawu, Ruata Makawasa; kụ ene, ringangu seng ene, dingangu ene sěntiniạ."

⁹ Kaěpạ u riadikang ene e měmpẹ̌kẹ̌kantarị u kakantarị daralo, adatẹ̌ dingangu tatarimakasẹ si Sie kụ mạiang su kaderang kararatuange, kụ kai i Sie kụ biahẹ̌ sarang karěngụe. Kụ su orasu manga riadikang ene měmpẹ̌kẹ̌kantarị,

¹⁰ tangu i sire ruam pul᷊o ěpạ měngangahạ e němpẹ̌těngkasumagẹ̌ su těngon tau kụkaiang su kaderang kararatuange, mase němpẹ̌suba si Sie kụ biahẹ̌ sarang kakalẹ̌ e. Bọu ene i sire e němpěneledu manga makotan sire e su těngong kaderang kararatuange ringangu nẹ̌bera,

¹¹ "O Mawu, o Ruatang kami! Samatang i Kau Mawu e wotonge makatarimạ u raralo, adatẹ̌ dingangu kawasa. U kai i Kau něndiadi patikụ sabarange, ringangu kai su ral᷊ungu kapulun'U l᷊ai patikụ e seng nariadi dingangu nẹ̌biahẹ̌."

Wahyu

Video Wahyu 4

Ikuti Kami:

KONTAK | PARTISIPASI | DONASI