Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nopaḷut makow intua nana'a im bui inontongku: Inontongku in tobatuí ḷolingkop nobukat kon soroga. Bo dinongogkudon bui in singog inta noguman ko'inakoí ko'ina inta naonda bo singog in terompet. Singog tatua noguman, "Poponikdon mangoi kon na'a, baí popo'ontong-Kudon ko'inimu onu im mobalií kon singgai mo'iduduimai."
2 Baḷuídon aku'oi kinawasa'an in Roho i Allah. Bo inontongku kon soroga oyuíon tobatuí tampat pomomarenta'an, bo oyuíon doman tobatuí intau ilimituí kon tampat pomomarenta'an tatua.
3 Pogot intau tatua monindar naonda bo batu permata inta moḷunow im batangannya bo naonda doman bo batu delima. Bo tobatuí alibobag inta naonda bo koḷunow in ḷumut no'i bongkoḷ kon tampat pomomarenta'an tatua.
4 No'ilibu kon tampat pomomarenta'an tatua, oyuíon doman doyowa nopuḷuh bo opat in tampat pomomarenta'an ibanea. Kon tampat mita tatua doyowa doman nopuḷuh bo opat in itoi ilimituí. Mosia nogiḷambung nobudoí bo nomakeí im mahkota buḷawan.
5 Nongkon tampat pomomarenta'an tatua no'i sindar magií ing kilat bo iḷumuai in singog ing gotup inta moyo-moyodudui. Bo kon tampat pomomarenta'an tatua oyuíon poḷombow pitu inta koyongki-yongkit; tuata in Roho i Allah taya pitu.
6 Bo kon tayowon tampat pomomarenta'an tatua oyuíon doman in dagat inta ontongon naonda bo kaca, motarang naonda bo kristal. Kon yuaí-yuaík bo kon libumai mita in tampat pomomarenta'an tatua oyuíon im mahaḷuk opat, mahaḷuk inta kon dotaí im munanya bo tuminya nopuling im mata.
7 Mahaḷuk inta ontongon muna naonda bo singa. Induanya naonda bo sapi koḷakian. Intoḷunya naonda bo pogot in intau. Inggopatea naonda bo boniak inta koyogot ḷumayug.
8 Mahaḷuk opat tatua komintan onom ing kolikipnya, kon libunya bo kon dotaí im bonunya nopuling im mata. Doḷom singgai mahaḷuk mita tatua diaí mogoga-gogai momanyanyi nana'a: "Kudus, kudus, mokudusdon ki Tuhan, Allah Inta Totok Mokawasa; inta oyuíon, inta koyongandon oyuíon, bo inta umuranbií oyuíon."
9 Mahaḷuk opat tatua pomuḷoi makow mopoyaput in dodayow mita, hormat bo sukur ko'i-Nia inta ilimituí kon tampat pomomarenta'an tatua, inta tantuí nobiag bo inta diaí mato-matoi.
10 Bo kowakutu im mahaḷuk mita tatua momanyanyi, daí itoi inta doyowa nopuḷuh bo opat tatua tumungkud kon tayowon intau inta ilimituí kon tampat pomomarenta'an tatua bo mosumbah ko'i-Nia inta tantuí nobiag bo diaí mato-matoi. Onda intua mosia mopogarab im mahkota monia kon tampat pomomarenta'an tatua poḷat mosingog,
11 "O..Tuhan, o.. Allah nami! Tongaíbií Ikow im patus motarima kon dodayow, hormat bo kawasa. Sin Ikowbií in nogaid kom bayongan yagi-yagi, bo lantaranbií doman ibog-Mu daí bayongan yagi-yagi tua ain nobalií bo nobiag."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA