Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Sardis ivei: "Hitumo tesa lako nte Yaku anu nombakuasai papitu Nosa nu Alatala bo anu nantipale pitu-angu betue. NisaniKumo pura-pura pokainggumiu. Komiu nireke ntona topomparasaya naroso, tano pomparasayamiu haitu namatemo.

² Pembangumo! Pakarosomo pomparasayamiu anu damo sakide. Dopame mamate pomparasayamiu anu damo sakide, pakaroso mamimo. Apa nikitaKu lako ri pura-pura pokainggumiu, nau sangaya dopa ria nagana ri panggita nu Alatala.

³ Jadi toramo pepatuduki niepemiu bo nitarimamiu bara ipia. Oseakamo pepatuduki haitu bo kajeamo lako ri dosamiu. Ane ledo mainga komiu, sampesanika Yaku makavamo mombahuku komiu. Yaku makava eva topangangga bo ledo rasanimiu maipia Yaku makava.

⁴ Tapi da nariapa nte komiu ri ngata Sardis bara sako-ndua tona nombajagai pakeara sampe ledo natapa. Iramo anu mamala molipa mosanggani-nggani ante Yaku mopakea mputi, sabana iramo anu masipato molipa ante Yaku.

⁵ Isema-sema padagi kana radekeika baju mputi. Bo sangara ledo Kupakalipo lako ri Buku Katuvua, tapi Kusaliku ri ngayo nTuamaKu bo *malaeka-malaekaNa.

⁶ Isema-sema naria talingana epemo pakabelo-belo anu niuli Nosa Gasa nu Alatala ka todea topomparasaya ri umba-umba ngata."

⁷ Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Filadelfia ivei: "Hitumo tesa lako nte Yaku anu nagasa bo nanoa. Yakumo nantipale gunji nu vamba Poparenta Magau Daud. Ane Yaku mombaungge vamba, ledo ria saitoa tona mamala mombatutuina, bo ane Yaku mombatutui vamba ledo muni maria saitoa tona mamala mombaunggena.

⁸ NisaniKumo pura-pura pokainggumiu. NisaniKu munimo ledo naroso ntoto pomparasayamiu, tapi komiu natutu nangoseaka tesaKu bo ledo nisapumiu Yaku. Epemo! Yaku nobuka ka komiu sangu vamba, bo ledo ria saitoa tona mamala mombatutuina.

⁹ Naria tona najadi todea Magau nu Seta anu nanguli iramo *toYahudi, tano mai ledo, aga davara. Tapi epemo! Ira kana Kupopantaputu ri ngayomiu. Bo raulira Yaku mpuu-mpuu nompotove komiu.

¹⁰ Komiu nangoseaka parentaKu anu nanguli pakaroo rara bo mosabara tempo nipandasa. Sabana haitu, Kusaliku komiu lako ri kasusa makava ri njumangu dunia mompesori tona nonturo ri dunia.

¹¹ Domo masae Yaku makava! Jadi kingisi pakarosomo pepatuduki nipatuduki ka komiu ala komiu manggava hadia padagi lako nte Alatala. Nee sampe maria tona mangago hadia haitu lako nte komiu.

¹² Isema-sema padagi, ia masimbayu mpo tinja naroso ri banua nTuamaku Alatala. Ia matetida ri suruga sampe ri kasae-saena. Bo ri karona Kutulisi sanga nTuamaku Alatala, bo sanga nu ngata nTuamaku Alatala, haitumo Yerusalem nabaru anu manau lako nte Tuamaku Alatala ri suruga. Bo sangaKu mboto nabaru kana Kutulisi ri karona.

¹³ Isema-sema naria talingana, epemo pakabelo-belo anu nitesa Nosa Gasa nu Alatala ka todea topomparasaya ri umba-umba ngata."

¹⁴ Ana nu Manusia netudu vai ala kutulisi ka malaeka anu nanggeniaka todea topomparasaya ri ngata Laodikia ivei: "Hitumo tesa lako nte Yaku anu nipoposanga 'Amin', haitumo sabi natutu notesa anu nakana. Yakumo Tupu nu pura-pura anu nipajadi nu Alatala.

¹⁵ NisaniKumo pura-pura pokainggumiu. Komiu ledo baliKu bo ledo muni topangoseaka Yaku. Aginamo komiu nompoara atau nompoiyo.

¹⁶ Tapi komiu aga netanggode, ledo nompoara, ledo nompoiyo. 16 Tapi komiu aga nalongo, ledo naranindi, ledo napane. Sabana haitu Kuteveulusaka komiu lako ri ngangaKu.

¹⁷ Komiu nanguli, 'Kami hii nakalumanamo, nagana puramo katuvu kami, domo kami paraluu nuapa-nuapa.' Tapi kakanana ledo nisanimiu katuvumiu mboto! Komiu nelabi napakasi. Katuvumiu aga nipoasi mata ntona. Komiu napakasi mpuu, naburomo matamiu, bo novuloamo komiu.

¹⁸ Haitu sampe Kutevai ka komiu ivei: Alimo bulava nipakagasa riara apu lako nte Yaku ala komiu mpuu-mpuu makalumana ri panggitaKu. Bo ali munimo pakea mputi lako nte Yaku, ala komiu mamala mopakea bo ledo maeya matamiu rakita ntona komiu novuloa. Bo ali munimo pakuli ragese ri matamiu ala komiu mamala mekita mpanjili.

¹⁹ Isema-sema nipotoveKu, Kuonteaka bo Kujeani ala mompatuduki ira. Haitu sampe Kuuli ka komiu, pakadidi raramiu bo kajeamo lako ri dosamiu.

²⁰ Peintamo! Hitumo Yaku neangga nombatanede-nede ri vamba. Ane maria tona mangepe suaraKu bo mombabuka vamba, Yaku mesua nte ia bo mangande mosanggani-nggani ante ia.

²¹ Isema-sema padagi, ia Kupaloga monturo moparenta mosanggani nte Yaku ri Gadera KamagauaKu, nasimbayu mpo Yaku muni najadi padagi bo sii-sii nonturo bo noparenta nosanggani-nggani nte TuamaKu ri GaderaNa.

²² Isema-sema naria talingana, epemo pakabelo-belo anu nitesa Nosa Gasa nu Alatala ka todea topomparasaya ri umba-umba ngata."

Wahyu

Video Wahyu 3

Ikuti Kami:

KONTAK | PARTISIPASI | DONASI