Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Tangar ma, nasiam sagala langit ase marsahap ahu; anjaha tangihon ma ale tanoh hata ni pamanganku.
2 Sai songon udan ma madabuh pangajarionku, manektek songon namur hatangku, songon pangonai ni udan paris-paris hubani poyon-poyon, anjaha songon pangonai ni simbur hubani suan-suanan.
3 Ai sihol ambilankononku do goran ni Jahowa; bere nasiam ma hatimbulon bani Naibatanta.
4 Batu gingging in, laing do pambahen-Ni, ai pintor do ganup dalan-Ni; sada Naibata hatengeran ni uhur anjaha seng dong hagedukan-Ni, pintor anjaha bonar do Ia.
5 Jahat do pambahenan ni sidea Bani, seng be anak-Ni sidea halani habutakon ni sidea ai; sada sundut na jahat anjaha na geduk do sidea.
6 Mintor sonai ma pambalasmu bani Jahowa, ham alo bangsa na oto anjaha na so maruhur? Ai lang Ia do Bapamu, na manompa ham, na manjadihon anjaha na paulihon ham?
7 Ingat ma ari na basaia, pardiateihon tahun na basaia marsundut-sundut; sungkun ma bapamu, ase ipatuduh bamu, partua nasiam ase ipatugah bani nasiam.
8 Sanggah na ibagihon Sitimbulan in bani bangsa sipajuh begu-begu parbagianan ni sidea, sanggah na sinirangni ai anak ni jolma in, ijai ma ipajonam parbalogan ni bangsa-bangsa romban hubani bilangan ni Israel.
9 Ai Jahowa do simada bangsa-Ni, si Jakob do parbagianan ni tinean-Ni in.
10 Jumpahsi do ia i tanoh dorging-dorging, i tanoh paraum-aumon i halimisan, Ia do manjagasi anjaha manarihon, iramotkon do ia songon anak ni matani.
11 Songon panramotkon ni manuk-manuk nanggordaha bani asarni, na mayap-ayap i babou ni anakni, na paherbang habongni, na mambuat sidea, anjaha iusung i atas ni habongni,
12 sonai ma ibobahon Jahowa sidea, anjaha seng dong naibata na legan hasomanni.
13 Ia do mambahen sidea margareta bani ianan na gijang i tanoh in, anjaha ipangan gogoh ni tanoh in; ibahen do ia manirup manisan ni huramah hun dolog batu pakon minak humbani batu na mapir.
14 Mantega humbani lombu, pakon dadih humbani biribiri, rap pakon taboh-taboh ni anak ni biribiri, pakon biribiri tunggal hun Basan ampa hambing tunggal, rap pakon gandum simantinan; anjaha daroh ni buah anggur na pitah iinum ham.
15 Tapi momburhonsi Jesurun, mamistik ma ia, domma mombur ham, bolon anjaha tambos, jadi itadingkon ma Jahowa na manjadihonsi, anjaha teos ia bani dolog batu hatuahonni in.
16 Sai ipuhoi sidea do Ia marsimburu marhitei naibata na legan; anjaha ipuhoi do ringis-Ni marhitei horja hagigian.
17 Manggalang do sidea hubani begu-begu, sedo hubani Naibata, hubani naibata na so tinanda ni sidea, hubani naibata na baru jinadihon, na so hinabiaran ni ompung nasiam.
18 Dolog batu, na manjadihon ham, itadingkon ham, anjaha itadingkon ham do Naibata na marhangaluton manubuhkon ham.
19 Dob ididah Jahowa ai, iambukkon ma sidea, halani ringis na pinuhoan ni anakni pakon boruni ai.
20 Dob ai nini ma, ʻPonopkonon-Ku ma bohing-Ku humbani sidea, sihol do Ahu mangidah sonaha hadoban ni sidea use; ai sada sundut na marbalik do sidea, dakdanak na so dong habujuron bani sidea.
21 Ipuhoi sidea do Ahu marsimburu mangidah na so naibata; ipuhoi sidea do ringis-Hu marhitei gana-gana ni sidea. Ahu pe papuhoon-Ku ma sidea marsimburu mangidah na so bangsa in; puhoon-Ku ma ringis ni sidea marhitei bangsa na oto.
22 Ai gajak ma apuy marhiteihon ni ringis-Hu, anjaha manogsogi das hu nagori toruh; bois do ipangan tanoh in pakon gogohni, anjaha gara bahenonni onjolan ni dolog-dolog.
23 Pagugunon-Ku ma hamagouan bani sidea; anjaha siorhonon-Ku sagala lingkit-Hu hubani sidea.
24 Maningon madotei ma sidea ibahen lohei, anjaha bois ibahen pane-pane pakon sampar; Ahu manongoskon sait ni binatang mangimbang sidea, rap pakon bisa ni na manjulur bani orbuk.
25 I darat podang mamunuh sidea, anjaha ibagas kamar masa hasonggoton, maniapkon anak garama pakon anak boru, na etek-etek rap pakon na dob ubanon.
26 Sihol hatahonon-Ku namin, ʻPurpurhonon-Ku ma sidea, ase magou sidea hun pardingatan ni jolma.ʼ
27 Ambit lang apas ni munsuh na huhabiari, ase ulang salah pangarusion ni munsuh ni sidea, ase ulang ihatahon sidea, ʻTimbul do tangannami, sedo Jahowa na mambahen ai haganup.ʼ
28 Ai bangsa paruhur na so margagan do sidea, anjaha seng marisi panimbangion uhur ni sidea.
29 Ambit maruhur sidea, arusan ni sidea do on, paruhurhonon ni sidea do ujung ni langkahni.
30 Sonaha ma pardakdak ni na sahalak bani na saribu, anjaha dua halak mambahen maporus saloksa, ambit lang dolog batu ni sidea na dob manjual sidea, anjaha Jahowa mangondoskon sidea?
31 Ai seng songon dolog batunta dolog batu ni sidea, gari munsuhta sandiri marhatongonkon ai.
32 Ai humbani hayu anggur ni Sodom do hayu anggur ni sidea, anjaha hun ladang ni Gumora do; buah anggur ni sidea buah anggur na so marrasun do, mapaet do turdunanni.
33 Bisa ni ulog do anggur ni sidea, anjaha bisa ni ulog darih na bisa tumang.
34 Ai lang domma tarsimpan ganupan ai i lambung-Ku, tartokan ibagas parugasan-Ku?
35 Bangku do pambalason pakon panguhumon bani panorang sanggah tarlandit nahei ni sidea, ai dohor mando ari hamagouan ni sidea, anjaha podas ma roh pangandungan na tinaktakkon hinan bani sidea
36 Ai pintoran ni Jahowa ma bangsa-Ni anjaha marpangulaki uhur-Ni mangidah jabolon-Ni; halani ididah bois ma gogoh ni sidea, anjaha sada pe lang na tading, paruhur pakon na so maruhur,
37 jadi hatahonon-Ni ma, ʻIja do naibata ni sidea, dolog batu parlingodan ni sidea ai,
38 na mangankon taboh-taboh ni galangan sipotongan ni sidea, pakon na manginum anggur galangan siinumon ni sidea? Palopas ma sidea jongjong laho mangurupi nasiam, sidea ma gabe parlingodan nasiam.ʼ
39 Sonari pe tonggor ma, Ahu, Ahu do Ia, seng dong Naibata sobali Ahu; Ahu do na mamunuh anjaha Ahu do na pagoluhkon; Ahu do na mangugahi anjaha Ahu do na pamalumkon, anjaha seng dong barang ise na tolap paluahkon humbani tangan-Ku.
40 Ai Ahu do na pagostong tangan-Ku dompak langit, anjaha mangkatahon, ʻSongon sintong ni manggoluh Ahu sadokah ni dokahni.
41 Anggo huasah ma podang-Ku na marhilap, anjaha tangan-Ku mandalankon panguhumon, jadi Ahu ma mambahen pambalason hubani munsuh-Ku, anjaha Ahu mambaloskon bani halak na mangkagigihon Ahu.
42 Bahenon-Ku ma panah-Ku mabuk ibahen daroh, anjaha podang-Ku mangankon daging pakon daroh ni halak na tartikam pakon na tartangkap, humbani ulu ni raja-raja ni munsuh.
43 Puji ma bangsa-Ni, nasiam bangsa sipajuh begu-begu; ai ibaloskon do daroh ni jabolon-Ni, anjaha Ia mambahen pambalason hubani munsuh-Ni, anjaha i bahen pardearan hubani tanoh ni bangsa-Ni.”
44 Dob ai roh ma si Musa, anjaha ipajojor ma ganup hata ni doding on, ipabogei-bogei pinggol ni bangsa ai, ia pakon si Josua anak ni si Nun.
45 Jadi dob ihatahon si Musa ganup hata on hubani ganup Israel,
46 nini ma dompak sidea, “Parimbagaskon nasiam ma ganup hata on, na husaksihon in bani nasiam sadari on, anjaha parentahkon nasiam ma hubani anak nasiam, ase ihaporluhon mangkorjahon ganup hata ni titah on.
47 Ai seng hata na lumei tumang in bani nasiam, tapi hagoluhan nasiam do on, anjaha hata on do paganjang ari-ari nasiam i tanoh sisolukon nasiam ai, dob idipari nasiam Bah Jordan.”
48 Dob ai nini Jahowa ma dompak si Musa, lanjar bani ari na sasada ai,
49 “Tangkog ma ho hu Dolog Abarimon, Dolog Nebo, na i Tanoh Moab, tontang ni Jeriko, anjaha tatap ma hunjai tanoh Kanaan, sibereon-Ku hubani halak Israel bahen parbagiananni.
50 Anjaha matei ma ho i atas dolog sitangkoganmai, ase ipatumpu ho hubani bangsamu, usih songon si Aron abangmai, na dob matei i atas ni Dolog Hor, anjaha ipatumpu hubani bangsani,
51 halani na dob lang hatengeran hanima Bangku i tongah-tongah ni halak Israel, i lambung ni Bah Meriba-Kades i halimisan Sin, anjaha seng ipapansing hanima Ahu i tongah-tongah ni halak Israel.
52 Ai bulih do namin tataponmu tanoh in i lobeimu, tapi seng bulih ho anggo masuk hu tanoh, na sihol bereon-Ku hubani halak Israel.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA