Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Mappilangngeriko, e, langika, erokka’ anne a’bicara, e, buttaya, tannangi tolinnu!
2 Dasi-dasi narapang bosi manurung pangngajarangku, na rapang je’ne’ allung mammatti’ kana-kanangku, rapang bosi sarro ri tompo’na ruku’-rukuka, bosi a’ricci’-ricci’ ri tompo’na lamung-lamunga.
3 Kumammuji ri arenNa Batara. Kabarrangi kalompoanNa Allata’alata!
4 Batara Mappasalama’nu maporea, adeleki na sukku’ baji’ sikontu oloanNa. Allata’alanu tamamminra pa’mai’Na na matulusu’ ri nyawa, manggaukangi ri bajika na ri siratanga.
5 Mingka ikaumi bansa tenaya namajarre’ pa’mai’nu, bansa jaia jekkonna siagang dosana, tenayamo nanibilangngi umma’Na.
6 Kammaminjo batenu ambalasaki baji’Na Batara, e, sikamma tau dongoka siagang tenaya nacara’de’? Sai Iami Manggenu, Mappa’jarinu, siagang ampa’jariako se’re bansa?
7 U’rangi le’ba’ laloa, ri jammang riolo, carita nibolika lalang pangngu’rangi. Kuta’nangi anjo passalaka mae ri tutoanu, na napau ke’nanga mae ri kau.
8 Ri wattu Nabagena Kaminang Tinggia butta pisakaya, tunggala’ bansaya Napattantui daerana siagang se’reang rewata a’jari makoasa.
9 Mingka anne jari-jarina Yakub Napilei Batara untu’ KalenNa.
10 Narapikangi ke’nanga sitabang alla’bang, ri tampa’ sinoa ri parang lompoa. Iami ke’nanga rapang pa’mai’Na, Nala’langia siagang Naparakaia.
11 Rapang balangkoa’ angngajaraki ana’na anri’ba’, anjakkalaki ri ka’nyi’ ta’rangka’na,
12 kammaminjo KalenNa Batara ampimpingi bansaNa, tanibantua ri rewata-rewataya.
13 BansaNa akkullei nakoasai moncong-monconga, ri butta a’batu-batua attimboi poko’-poko’ zaitunga. Nakanrei ke’nanga wassele’ koko-kokonna, nainung je’ne’ bani taniparakaia ri alla’ batu karanga.
14 Olo’-olo’na appabattui wassele’ jai dageng siagang dadi’; gandunna siagang je’ne’ anggoro’na kaminang baji’.
15 Umma’Na Batara a’jari kalumanynyang, mingka nangai mangngewa, nasorongbokoi Mappasalama’ porea. Co’mo’ ngaseng kalenna, lanri bassoro’ ri kanre, mingka nabokoi ke’nanga Allata’ala Mappa’jarina.
16 Manynyombai ri patung ke’nanga, nakkimburumo Batara, nai’ larroNa lanri anjo kaja’dallanga.
17 Assarei ke’nanga koro’bang mae ri roh-roh ja’dalaka teai mae ri Allata’ala, mae ri rewata-rewata takontutojeng, taniassenga siagang tanipakala’biri’ka ri boe-boena riolo.
18 Nabokoi ke’nanga Allata’ala Mappasalama’na ke’nanga; nakaluppai Allata’ala assarea katallassang.
19 Nacini’na gau’-gau’na ana’-ana’Na larromi Batara nampa Natolla’ ke’nanga.
20 Nakana, ‘Tena naKujampangi; ciniki mami apa lakajarianga. Nasaba’ anjo bansaya kapala batui, tena sikali namajarre’ pa’mai’na ke’nanga.
21 Patung nasombaya ke’nanga a’jari saba’ naKularro siagang akkimburuA’ mae ri apa naarenga ke’nanga rewata. Kupanaiki larrona ummakKu ri bansa maraenga, sollanna akkimburu mae ri tau dongo’-dongoka.
22 A’rinrai larroKu rapang pepe’ ampakamutungi sikamma apa niaka mattompo’ butta; a’le’lereki pepeka sa’genna sirinna langika, antunui monconga sa’genna aka’-aka’na.
23 Kupabattu bala tamammari-maria, Kupakei pana-panana balinna ke’nanga.
24 Lamatei ke’nanga lanri rammusu’ na kacipurang, nialle ri kamateang lanri garring appakamalla’. Battui a’bakka olo’-olo’ sekkeka, ulara’ a’racunga ampakkunrarengi ke’nanga.
25 Bundu’ angngeranga kamateang niaki ri sikamma oloanga, manna ammantanga ri balla’ nabattui todong malla’. Turungkana bansaya lamatei, ana’ lolo na tau toa dudu tena passangalinna.
26 ErokKa’ ampa’lanynya’ taba sikali ke’nanga, sollanna taniu’rangiamo ke’nanga.
27 Mingka takkulleai tinggi pa’mai’ musunna Israel, rapang nibetai bansaKu lanri ke’nanga,’ nasaba’ iNakke bawang, iNakke bawang, anggaukangi anjo sikammaya.
28 Israel bansa tena pikkiranna; tena kacara’dekanna ke’nanga.
29 Apa saba’ nanibeta ke’nanga, tena napahangi; tanapahangngai apa anjo kajarianga.
30 Kemae lakkulle sitau langngondang tau sisa’bu, siagang rua tau langngondang sampulo sa’bu tau? Batara, Allata’alana ke’nanga, le’ba’ ambalukangi ke’nanga, nibokoimi ke’nanga ri Allata’ala malompoa.
31 Naassengi musunna Israel angkanaya lammai pajagana ke’nanga, tena nasangkamma Allata’alana Israel hebaka.
32 Kamma Sodom siagang Gomora ja’dala’na musunna Israel, rapang poko’ anggoro’ pai’ na’racunga rapponna.
33 Je’ne’ anggoro’na ke’nanga iami racunna ularaka.
34 Nau’rangi Batara panggaukanna musunna ke’nanga, laNahukkungi ke’nanga punna narapi’ wattunna.
35 LaNabalasaki siagang laNahukkungi ke’nanga, latu’guruki ke’nanga; a’reppese’mi kapanrakanna ke’nanga.
36 LaNapasalamaki Batara bansaNa na Nakamaseang sikamma atanNa, punna tenamo pakkullena nacini’ ke’nanga, nala’busu’mo kitta’ magassinna.
37 Lakkuta’nangi Batara mae ri umma’Na, ‘Kemae rewata-rewata assarea pa’la’langngang?’
38 Nusarea angnganre koro’bang jaia jannana, angnginunga jai je’ne’ anggoro’. Lappassammi natulungko ke’nanga; suromi ke’nanga battu untu’ ampasalamakko ri kamma-kammaya anne.
39 Ciniki, iNakke Allata’ala Tenaya Ruanna, pantaranganna iNakke tena maraeng. INakke ammuno siagang iNakke appakatallasa’, allokoki siagang appamolle. PungKu angngalle tindakang, tena manna sitau akkulle angngewa.
40 INakke tojeng-tojemmi Mattallasaka, iNakke Allata’ala, Kuangkaki limangKu naKuassumpa:
41 Punna le’ba’ Kukantisi’ pa’dangKu sa’genna accilla’, laKupajappai kaadelanga. La’balasakKa’ mae ri sikontu musua; Kuhukkungi tau birisika ri Nakke.
42 PanaKu rassi cera’na ke’nanga, cera’ tunitahang siagang tau loko’. Nabunoi pa’dangKu sikamma tau angngewaya, musu la’bua uu’na tena nalaKulappassang.
43 Makkio’ rannuko lanri umma’Na Batara, e, sikamma bansaya, nasaba’ Nahukkungi sikontu tau ambunoai ke’nanga. A’balasaki mae ri musunNa mingka Napammopporangi dosana bansaNa."
44 Napabattui Musa siagang Yosua ana’na Nun anjo kelonga, sa’genna akkulle sikontu bansa allangngereki.
45 Le’ba’na napabattu ajarang-ajaranNa Batara mae ri bansa Israel,
46 nakanamo Musa, "Katutui sollannu mannuruki ri sikontu parenta kupassareanga mae ri kau anne alloa. Pangngajarrangi mae ri ana’-ana’nu, sollanna akkulle mannuruki ke’nanga ri sikontu hukkunNa Batara siagang pa’mai’ tamamminra.
47 Anne pangngajaranga teai bicara kosong, passangalinna untu’ katallassannu. Turuki anjo sikontua parenta, sollanna la’bu umuru’nu ri pa’rasangang tenayamo nasallo nanupantamakki ri ba’leanna Binanga Yordan."
48 Anjo memang alloa Nakana Batara mae ri Musa,
49 "A’lampako mange ri Moncong Abarim ri pa’rasangang Moab ri ba’leanna kota Yerikho. Nampa naikko ri Moncong Nebo siagang cinikimi butta Kanaan tenayamo nasallo naKupassareang mae ri bansa Israel.
50 Lamateko irate anjoreng ri monconga, sangkamma sari’battannu matei ri Moncong Hor.
51 Ikau sipa’rua tena namajarre’ pa’mai’nu mae ri Nakke siagang tena nupakala’birikKa’ ri dallekanna bansa Israel ri wattunnu nia’ ri timbuseng je’ne’ Meriba, ri ampi’na kota Kades, ri parang lompo Zin.
52 Lanri kammana anjo takkulleako antama’ ri pa’rasangang Kupassareanga mae ri bansa Israel; akkullejako bawang ancini’ battu bellai."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA