Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Mara langnge’, edhingngagi sengko’ acaca’a, mara bume, bukka’ kopengnga!

² Moga tang pangajaran padha’a ban ojan se gaggar, tang oca’ padha’a ban capcabba ebbun, akantha rese’ se mabacca rebba e tana, akantha ojan derres se ngenneng ka men-tamennan.

³ Sengko’ amolja’agiya PANGERAN. Mara berta’agi kaagunganna Allah.

⁴ PANGERAN reya se abilla ba’na, se parjuga ban bangalan, se adil jalanna. Allahna ba’na reya esto ban ta’ roce, se elampa’agi teppa’ tor becce’.

⁵ Tape ba’na reya bangsa se ta’ esto atena, se roce ban bannya’ dusana, se ta’ pantes daddi ommadda Allah.

⁶ Jareya babalessa ba’na ka PANGERAN, he, reng-oreng budhu se ta’ andhi’ pekkeran? PANGERAN reya gu ta’ ramana ba’na, se nyepta’agi ba’na, se madaddi ba’na settong bangsa.

⁷ Kaenga’e jaman lamba’, pekker jamanna angkadan se la lebat. Tanya’agi ka oreng towana, me’ olle ecareta’agi kabbi ka ba’na.

⁸ E bakto Se Mahatenggi magi tana, saneyap bangsa la etantowagi baba kakobasa’anna ban settong la’-alla’an se neggu’ kobasa.

⁹ Tape toronanna Yakub reya epele PANGERAN menangka kaagunganna Salerana.

¹⁰ PANGERAN manggi’i reng-oreng jareya teppa’na alalana e kennengngan se seppe e ra-ara, kabbi laju padha ejaga ban epeyara, epasalamet menangka kaagunganna Salerana.

¹¹ Akantha ellang se ngajari ngabber budhu’na, budhu’na epega’ bi’ kalembangnga se mekkar pas epanongko’ e bungkella kalembangnga,

¹² kantha jareya PANGERAN se mimpin ommadda, tadha’ la’-alla’an se abanto Salerana.

¹³ Ommadda epangobasae nong-gunong, reng-oreng jareya ngakan hasella gal-teggal epangenom maddu alas se kalowar dhari gumo’ bato. Reng-oreng jareya olle mennya’ dhari bungkana jaitun se tombu e tana se bannya’ batona.

¹⁴ Sape ban dumbana padha gus-bagus, bannya’ ngasellagi susu, gandum ban anggurra bagus onggu.

¹⁵ Ommadda PANGERAN daddi sogi tape dujan aberonta’, kabbi padha po-lempo kakennyangan. PANGERAN se nyepta’agi aba’na eonduri, se parjuga, Panyalamet aba’na, ta’ ekendha’i.

¹⁶ Reng-oreng jareya nyemba brahala sampe’ PANGERAN tamburuwan panggaliyanna, laju duka polana kajahadanna ommat jareya.

¹⁷ Reng-oreng jareya ngeba kurban ka roh-erroh jahat se banne Allah, ka la’-alla’an se ta’ ekennal aba’na, la’-alla’an anyar se ta’ ekatako’e bangatowana.

¹⁸ Allah se parjuga se apareng kasalameddan ekaloppae, PANGERANna se apareng odhi’ ta’ ekaenga’e.

¹⁹ Ngoladi jareya PANGERAN duka, ta’ kasokan narema tra-pottrana.

²⁰ Dhabuna, ‘Sengko’ ta’ nolonga reng-oreng jareya pole; dina etengguwa baramma daddina. Sabab bangsa jareya ce’ cengkalla ban tadha’ estona.

²¹ Sengko’ epatamburuwan ka se banne Allah epapeggel ka arca brahalana. Daddi bi’ Sengko’ Tang ommat epatamburuwana ka settong bangsa se sanyatana banne bangsa, epapeggella ka bangsa se ce’ budhuna.

²² Peggella Tang ate padha ban apoy se rabbang ce’ rajana, se makatonon sampe’ ka dunnyana oreng mate. Apoy se makatonon bume ban sakabbinna hasella, sarta nong-gunong sampe’ ka mo’-ramo’na.

²³ Sengko’ madhatengnga balai se tadha’ ambuna. Tang na-pana eocola ka reng-oreng jareya.

²⁴ Reng-oreng jareya bakal mateya polana sake’ panas ban kalaparan, sarta panyaket se talebat berra’na. Bi’ Sengko’ epannengnga me’ olle’ ecarakem burun alas, sarta ecangnga’ olar se mandi opassa.

²⁵ E rong-lorong bannya’ oreng mate polana perrang; reng-oreng e bengkona padha katako’an. Ngangodhadan lake’ ban bine’ epamateya, bariya keya babaji’ ban oreng towa.

²⁶ Bi’ Sengko’ bangsa jareya epatompessa kabbi, me’ olle ta’ ekaenga’e oreng pole.

²⁷ Tape mosona Isra’il ta’ olle gumbira atena sala sangka apangrasa makala Tang ommat,’ mangkana sabendherra Sengko’ se mamosna bangsa jareya.

²⁸ Isra’il reya bangsa se ta’ andhi’ pekkeran; ban ta’ andhi’ pangarteyan.

²⁹ Ja’ sakenga bicaksana, tanto bangsa jareya ngarte, ban mekker dhi-budhina aba’na.

³⁰ Baramma oreng kasorang me’ bisa nyerser oreng saebu, oreng kadhuwa andaddiyagi oreng sapolo ebu padha buru? Sababba tadha’ laen kajabana polana bangsa jareya eonduri PANGERANna; edina bi’ Allahna se parjuga.

³¹ Mosona Isra’il padha tao kabbi, la’-alla’anna ta’ andhi’ kakowadan, ta’ padha ban Allah se alindhunge bangsa Isra’il.

³² Mosona Isra’il jahadda padha ban Sodom sarta Gomora, padha ban bungkana anggur se pae’ ban mabu’ buwana.

³³ Aeng anggurra raconna olar se mandi opassa.

³⁴ PANGERAN emot ka lalakonna mosona ommadda, se eokoma mon la napa’ baktona.

³⁵ PANGERAN aparenga babales ban okoman ka mosona ommadda jareya; ta’ abit pole bangsa jareya bakal ancora; bakal tompessa tadha’ karena.

³⁶ PANGERAN tanto nolong ommadda ban bellas ka para abdina, mon ngoladi ommadda la ta’ bisa apa-rapa ban ta’ andhi’ kakowadan.

³⁷ PANGERAN tanto pas atanya ka ommadda, ‘Kemma la’-alla’an se eandellagi ba’na?’

³⁸ La’-alla’anna ba’na ngakan gaji tor-atorra ba’na, ban ngenom aeng anggur kurbanna ba’na. Kassa’ soro nolonge ba’na sateya, me’ olle ba’na epalopot dhari calaka’.

³⁹ Abassagi, Sengko’ Allah Se Settong, tadha’ allah salaenna Sengko’. Sengko’ mate’e ban maodhi’. maloka ban mabaras. Tadha’ oreng se bisa’a lang-ngalange mon Sengko’ la akarep.

⁴⁰ Demi Sengko’ dibi’, Allah se odhi’, Sengko’ ngangka’ Tang tanang asompa:

⁴¹ Sengko’ agangseya Tang peddhang epatajemma sampe’ agalirap, Sengko’ aberri’a okoman epaadila. Sengko’ malessa sakabbinna Tang moso ban reng-oreng se baji’ ka Sengko’.

⁴² Tang na-pana bakal buddhaga bi’ dharana Tang so-moso, ban pa-sapa se alaban ka Sengko’ bakal mateya bi’ Tang peddhang. Pa’-sapa’a se ta’ atoro’ ka Sengko’ reya, bi’ Sengko’ ta’ epannengnga; oreng tahanan ban se ka-loka kabbi bakal mateya keya.

⁴³ E, sa-bangsa, mara asorak, ngormat ommadda PANGERAN, sabab Pangeran apareng okoman ka pa’-sapa’a se mate’e ommadda. Pangeran males ka mosona tape ommadda esapora dusana."

⁴⁴ Mosa ban Yusak anyanye nyanyeyan jareya, daddi bangsa Isra’il padha ngedhing kabbi.

⁴⁵ Samarena ngajarragi sakabbinna papakonna Pangeran ka bangsa Isra’il,

⁴⁶ Mosa adhabu, "Kaenga’e sakabbinna parenta se eajarragi sengko’ ka ba’na are teya. Ajarragi ka na’-ana’na, sopaja na’-ana’na ba’na jareya ngestowagi sakabbinna Hokomma PANGERAN.

⁴⁷ Pangajaran jareya banne pera’ ca’-oca’ se kosong, tape jareya odhi’na ba’na. Ta’adi sakabbinna papakon jareya, me’ olle ba’na lanjang omor e nagara se ekobasa’ana ba’na e bara’na Songay Yordan rowa."

⁴⁸ E are jareya keya PANGERAN adhabu ka Mosa,

⁴⁹ "Kassa’ ba’na entar ka pagunongan Abarim e nagara Mo’ab e bara’na kottha Yerikho. Dhari jadhiya pas ongga ka Gunong Nebo; dhari kennengngan jareya ba’na ngabas ka nagara Kana’an se bi’ Sengko’ ebagiya ka bangsa Isra’il sakejja’ aggi’.

⁵⁰ Ba’na bakal mateya e gunong jareya, akantha Harun, taretanna ba’na se mate e Gunong Hor rowa,

⁵¹ sabab ba’na ban Harun ta’ hormat ka Sengko’ e adha’anna bangsa Isra’il, e bakto badha e Somber Meriba, e seddi’na kottha Kades, e ra-ara Zin rowa.

⁵² Daddi ba’na pera’ olle ngabas nagara jareya dhari jauna, ta’ olle noro’ maso’ ka nagara se bi’ Sengko’ ebagi ka bangsa Isra’il jareya."

Ulangan

Video Ulangan 32

Ikuti Kami:

KONTAK | PARTISIPASI | DONASI