Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Saellana jareya ba’na mangkat ka dhaja ka baba Basan. Og, rato Basan kalowar ban sakabbinna tantarana, merrangana ba’na e seddi’na kottha Edrei.

² Tape PANGERAN adhabu ka sengko’, ‘Ja’ tako’ ka rato jareya, Mosa. Rato jareya ban sakabbinna tantarana sarta sakabbinna baba kakobasa’anna bi’ Sengko’ ebagiya ka ba’na. Rato Og jareya pakantha Sihon, rato Amori se marenta e Hesybon rowa.’

³ Daddi bi’ GUSTE Allahna sengko’ ban ba’na Rato Og ban ra’yadda epassra’agi keya ka sengko’ ban ba’na. Rato ban ra’yadda jareya kabbi epakala bi’ sengko’ ban ba’na.

⁴ E bakto jareya tha-kotthana erebbu’ kabbi bi’ ba’na, tadha’ settonga se lopot. Kabbi badha sabidak kottha se erebbu’ ba’na e dhaera Argob, se eparenta Rato Og dhari Basan.

⁵ Tha-kottha jareya kabbi ngangguy gar-pagar alas se tenggi, bang-labang saketheng se ngangguy lang-palang pangancengnga. Laen dhari jareya gi’ bannya’ kottha laenna se ta’ ngangguy pagar alas.

⁶ Tha-kottha jareya bi’ ba’na epaancor kabbi, reng-orengnga, lalake’, babine’ ban na’-ana’na bi’ ba’na epate’e kabbi, epakantha tha-kotthana Rato Sihon dhari Hesybon.

⁷ Ebinna bi’ ba’na ekala’ ban tha-kottha jareya bi’ ba’na erampok.

⁸ E bakto jareya dhari rato Amori se kadhuwa gella’ ba’na la arampas tana e temorra Songay Yordan ban Songay Arnon sampe’ ka Gunong Hermon.

⁹ (Gunong Hermon reya bi’ oreng Sidon enyamae Siriyon, ban bi’oreng Amori enyamae Senir.)

¹⁰ Sakabbinna baba kakobasa’anna Rato Og dhari Basan bi’ ba’na erampas kabbi: tha-kotthana e tana tenggi, tana Gileyad ban Basan, terros ka temor sampe’ ka kottha Salkha ban Edrei."

¹¹ (Rato Og reya oreng Refa’im se dhi-budhi. Petthenamayyidda ekagabay dhari bato, lanjangnga pa’ meter ban lebarra para’ dhu meter, menorot okoran se la eteptebbagi. Sampe’ sateya gi’ badha e Raba, kotthana oreng Amon.)

¹² "Saellana tana jareya ekaandhi’ ba’na, bi’ sengko’ suku Ruben ban Gad eberri’i bagiyan e dhajana kottha Aroër e seddi’anna Songay Arnon, ban sabagiyan dhari tana pagunongan Gileyad, tamaso’ tha-kotthana.

¹³ Saparona suku Manasye bi’ sengko’ eberri’i karena tana Gileyad, bariya keya tana bagiyan Basan bekkas jaja’anna Og, iya areya sakabbinna baba Argob." (Bannya’ oreng tao Basan reya nagarana oreng Refa’im.

¹⁴ Ya’ir dhari suku Manasye ngala’ sakabbinna baba Argob, iya areya dhari Basan sampe’ ka batessa Gesur ban Ma’akha. Sa-disa jareya enyamae menorot nyamana dibi’, ban sampe’ sateya gi’ paggun anyama sa-disa Ya’ir.)

¹⁵ "Tana baba Gileyad bi’ sengko’ ebagi ka kaom Makhir dhari suku Manasye.

¹⁶ Ban ku-suku Ruben sarta Gad bi’ sengko’ eberri’i tana e antarana Gileyad ban Songay Arnon. Nga’-tengnga’anna songay jareya daddi batessa baba kakobasa’anna se kadhuwa jareya e bagiyan lao’, dineng e bagiyan dhaja se daddi batessa Songay Yabok, se sabagiyanna daddi batessa nagarana oreng Amon.

¹⁷ E bagiyan bara’na baba kakobasa’anna ku-suku jareya malanjang sampe’ ka Songay Yordan, dhari Talaga Galilea e bagiyan dhaja sampe’ ka Tase’ Mate e bagiyan lao’, terros sampe’ ka sokona Gunong Pisga e bagiyan Temor.

¹⁸ E bakto jareya sengko’ aberri’ parenta reya ka reng-oreng jareya: GUSTE Allahna ba’na, marengngagi tana e temorra Songay Yordan kaangguy kennengnganna ba’na. Tape tantarana ba’na kodu mekol sanjata alengka Songay Yordan ajangadha’i ku-suku Isra’il se laen.

¹⁹ Pera’ ana’ binena ba’na ban ebinna se bannya’ olle paggun neng e tha-kottha se bi’ sengko’ la ebagi ka ba’na.

²⁰ Tolonge reng-oreng sabangsana ba’na sampe’ ngenneng ngobasane ban ngennengnge tana se eparengngagiya PANGERAN ka bangsana ba’na jareya e bara’na Songay Yordan, ban sampe’ PANGERAN ngedine reng-oreng jareya odhi’ taremtem neng e jadhiya, akantha se la elampa’agi Salerana ka ba’na e dhinna’. Buru saellana jareya ba’na olle abali ka tana reya se bi’ sengko’ la ebagi ka ba’na.

²¹ Sengko’ pas ngoca’ ka Yusak: Ba’na la nangale’e sabarang se elampa’agi GUSTE Allahna ba’na ka Rato Sihon ban Rato Og rowa. To-rato laenna se tanana ekobasae ba’na bakal epakantha’a jareya keya.

²² Ta’ osa tako’ ka to-rato jareya, sabab GUSTE Allah nolongana ba’na se aperrang."

²³ "E bakto jareya sengko’ nyo’on ka PANGERAN,

²⁴ Adhu, Guste ALLAH Se Mahatenggi, abdidalem oneng ja’ se eduduwagi Junandalem ka abdidalem ka’dhinto namong parmola’an dhari sadajana lalakon se raja sareng ajib se badhi elampa’agiya Junandalem. Tadha’ la’-alla’an se badha e langnge’ otabana e bume se oneng ngalakone lalakon raja akadi se ampon elampa’agi Junandalem.

²⁵ Nyo’ona edi abdidalem GUSTE, alengka’a Songay Yordan, nengalana nagara se landhu e bara’ songay, tana pagunongan se bagus sareng Pagunongan Libanon.

²⁶ Tape ba’na daddi lantaranna PANGERAN duka ka sengko’ sampe’ ta’ kasokan ngabbuli tang parnyo’onan. Sabaligga PANGERAN adhabu, ‘Ella, cokop, Mosa, ta’ osa ba’na but-nyebbut parkara jareya pole!

²⁷ Kassa’ ba’na ongga ka konco’na Gunong Pisga, pas mandeng ka dhaja ban ka lao’, ka temor ban ka bara’. Abassagi patete apa se etangale’e ba’na jareya, sabab ba’na ta’ kera alengka’a Songay Yordan.

²⁸ Yusak berri’i du-petodu. Pakowat atena, sabab Yusak jareya se mimpina bangsa jareya ka bara’ songay kaangguy ngobasana’ana nagara se etangale’e ba’na rowa.’

²⁹ Daddi sengko’ ban ba’na paggun neng e cora se dhep-adhebban ban kottha Bet-Peyor."

Ulangan

Video Ulangan 3

Ikuti Kami:

KONTAK | PARTISIPASI | DONASI