Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Kenca bage maka miser kita kempak Utara, ku daerah Basan. Reh Raja Og ras tenterana; iperangna kita ndeher kota Edrei.
2 Tapi ngerana TUHAN man bangku nina, 'Ula mbiar man bana. Ia, anak buahna ras negerina Kubereken man bandu. Bahan lah man bana bagi perbahanenndu man Sihon raja bangsa Amori si ringan i Hesbon.'
3 Emaka iendesken TUHAN pe ku teruh kuasanta Raja Og ras rayatna. Sibunuhi ia kerina.
4 I bas paksa eme sitaluken kerina kotana; la lit sada pe si tading-tading. Lit buena enem puluh kota kerina i daerah Argop ingan Raja Og merentah.
5 Kerina kota-kota e, erbentengken tembok si meganjang; lit kerina pintu gerbangna, janah beloti jadi eruk-erukna. Janah melala nge kuta-kuta si la ertembok.
6 Sikerapken kerina kotana. Sibunuhi kerina dilaki, diberu ras anak-anakna, bali ras perbahanenta nandangi kuta-kuta Raja Sihon i Hesbon nari.
7 Sibuati asuh-asuhenna. Sirampasi kota-kotana.
8 Bage me, i bas paksa si e sirampas i bas raja bangsa Amori si dua e, taneh si lit i Timur Lau Jordan, i Lau Arnon nari seh ku Deleng Hermon.
9 (Deleng Hermon e, Sirion ibahan bangsa Sidon gelarna, tapi Senir nina bangsa Amori.)
10 Kerina daerah Raja Og i Basan si irampas kita eme: kota-kota i taneh kendit Gileat ras Basan, seh ku Timur ku kota-kota Salka ras Edrei."
11 (Raja Og eme kalak Repaim si perpudina kal. Peti inganna mate ibahan i bas batu nari, gedangna empat meter, belangna sitik nari la dua meter rikutken ukuren biasa. Banci denga inen enda genduari i Rabba, kota bangsa Amon.)
12 "Kenca nggo man banta taneh e, kubereken man suku Ruben ras Gat daerah i Utara Aroer deher Lau Arnon ras sada bagin negeri deleng-deleng Gileat rikut ras kerina kota-kota si lit i je.
13 Deleng-deleng Gileat si debanna kubereken man setengah suku Manase, ikut pe daerah Basan ingan Og merentah mbarenda, eme kerina daerah Argop." (Basan igelari negeri kalak Repaim.
14 Jair, eme sekalak i bas suku bangsa Manase nari, ngingani kerina daerah Argop, eme daerah Basan seh ku perbalengen Gesur ras Maaka. Ibanna gelar kuta-kuta e bali ras gelarna. Emaka seh ngayak genduari gelar kuta-kuta e igelari kuta-kuta Jair.)
15 "Gileat kubereken man terpuk Mahir i bas suku Manase nari.
16 Janah man suku Ruben ras Gat, kubereken daerah i Gileat nari seh ku Lau Arnon. Balengna arah Selatan eme pertengahen Lau Arnon, janah arah Utara balengna eme Lau Jabok, si sada bagin jadi baleng ras daerah bangsa Amon.
17 Arah Barat daerah enda seh ku Lau Jordan, mulai i Dano Galilea nari i Utara seh ku Lawit Mate i Selatan, jenari ku deleng-deleng Pisga arah Timur.
18 I bas paksa si eme kubereken perentah enda, 'TUHAN Dibatandu nggo mereken man bandu taneh si arah Timur enda gelah i je kam tading. Genduari sikapkenlah persenjatan tenterandu. Suruh ia leben asa suku-suku Israel si deban ngepari Lau Jordan, gelah isampatina kalak e naluken negeri si man inganen e.
19 Si banci tading arah pudi, i kota-kota si nggo kubereken man bandu eme: ndeharandu, anak-anak, asuh-asuhen, sabap kueteh maka tuhu melala asuh-asuhenndu.
20 Sampati lah temanndu kalak Israel seh italukenna negeri si arah Barat Lau Jordan si ibereken TUHAN atena man kalak enda, seh ibere TUHAN ia ringan i je nggeluh alu dame, bali ras si nggo IbahanNa man bandu i jenda. Kenca bage maka banci kam mulih ku negeri si nggo kutentuken man bandu.'
21 Kenca bage maka kukataken man Josua, 'Nggo idahndu uga perbahanen TUHAN Dibatandu man raja si dua e, eme Raja Sihon ras Og. Bage me pe perbahanen TUHAN man raja-raja si deban si iperangndu atendu negerina.
22 Ula kam mbiar ngenen kalak e, sabap TUHAN Dibatandu si erperang guna kam.'"
23 "I bas paksa e ertoto aku, tutus kal ateku, ningku,
24 'O TUHAN si Mada Kuasa, kueteh maka si nggo IcidahkenNdu man bangku e, perbahanen si mbelin ras tanda kuasa si pemana kap, sabap melala denga AteNdu tole IbahanNdu. La lit dibata-dibata i langit ras i doni si ngasup ngelakoken perbahanen si mbelin bagi si nggo IbahanNdu!
25 Bere lah min aku ngepari Lau Jordan, o TUHAN, gelah banci kuidah taneh si mehumur arah lepar ah, negeri uruk-uruk si mejile ras deleng-deleng Libanon.'
26 Tapi erkiteken kam merawa TUHAN man bangku emaka la IberekenNa pemindonku. Tapi NiNa, 'Nggo bias! Ulanai singetken e!
27 To nangkih ku das tampuk Deleng Pisga, jenari tatap kempak Utara ras kempak Selatan, kempak Timur ras kempak Barat. Perdiateken lah alu manjar-anjar kai si idahndu, sabap kam labo ndigan pe ngepari Lau Jordan.
28 Berekenlah pedah-pedah man Josua, petetap ukurna, erkiteken ia me si mabai bangsa e ngepar, lako naluken negeri si idahndu e.'
29 Eme sabapna maka kita tading i berneh-berneh si petala-tala ras kota Betpeor."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA