Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggo tangi tumang ham bani hata ni Jahowa Naibatamu, iharinggaskon uhurmu mangkorjahon ganup titah-Ni, na hutonahkon in bamu sadari on, jadi pabangkiton ni Jahowa Naibatamu ma ham timbulan humbani sagala bangsa na i atas tanoh on.
2 Sogop ma bamu ganup pasu-pasu on anjaha ondos bamu, anggo itangihon ham sora ni Jahowa Naibatamu.
3 Pasu-pasuon-Ni ma ham ibagas huta, anjaha pasu-pasuon-Ni ma ham i ladang.
4 Pasu-pasuonni ma boras ni boltokmu pakon gogoh ni tanohmu, pasu-pasuon-Ni ma manggargar pinahanmu, lombu pakon biribirimu.
5 Pasu-pasuon-Ni ma tapongan pakon pangaguanmu.
6 Pasu-pasuon-Ni ma ham laho masuk, anjaha pasu-pasuon-Ni ma ham laho luar.
7 Ondoskonon ni Jahowa ma munsuhmu na roh manlawan ham, ase rasei sidea i lobeimu; marhitei humbani sada dalan sidea bingkat mandorab ham, maningon marhitei pitu dalan sidea maporus i lobeimu.
8 Hatahonon ni Jahowa ma pasu-pasu mangkasomani ham ibagas sopoumu pakon bani ganup jinamah ni tanganmu, anjaha pasu-pasuon-Ni ma ham i tanoh, na binere ni Jahowa Naibatamu bamu.
9 Pajonamon ni Jahowa ma ham gabe sada bangsa na pansing bani, songon na dob binulawankon-Ni hinan bamu, anggo iramotkon ham tonah ni Jahowa Naibatamu, anjaha marparlahou ham ibagas dalan-Ni.
10 Anjaha ganup bangsa na i tanoh on mangidah, paboa na dob targoran do ham bani goran ni Jahowa, gabe mabiar sidea mangidah ham.
11 Anjaha tumpakan ni Jahowa ma ham marlobih-lobih bani na madear, bani boras ni boltokmu, bani panggargar ni pinahanmu, bani gogoh ni tanohmu, bani tanoh na dob binulawankon ni Jahowa hinan hubani ompungmu berehonon-Ni hu bamu.
12 Buhaan ni Jahowa ma bamu parartaan-Ni na madear, ai ma langit ai, laho mambere udan bani tanohmu bani panorang hadearanni, anjaha pasu-pasuon-Ni ma ganup na hinorjahon ni tanganmu, gabe panginjaman ni buei bangsa sipajuh begu-begu ma ham, tapi anggo ham seng anjai manginjam.
13 Anjaha pabangkiton ni Jahowa ma ham gabe ulu, lang be ihur; lambin naikni mando ham, seng anjai turun; anggo itangihon ham titah ni Jahowa Naibatamu, sagala na hutonahkon in bamu sadari on, siramotkonon anjaha sihorjahononmu,
14 anjaha anggo seng manlembang ham hu siamun barang hu sambilou humbani ganup hata, na dob hutonahkon in bamu sadari on, laho mangirikkon naibata na legan anjaha marsombah hujai.
15 Tapi anggo seng itangihon ham sora ni Jahowa Naibatamu, anjaha anggo seng iramotkon anjaha ihorjahon ham sagala uhum-Ni pakon aturan-Ni, sagala na hutonahkon in bamu sadari on, sogop ma bamu sagala papa on anjaha mangonai bamu.
16 Hona papa ma ham ibagas huta anjaha hona papa ma ham i ladang.
17 Hona papa ma taponganmu pakon pangaguanmu.
18 Hona papa ma boras ni boltokmu pakon gogoh ni tanohmu, anak ni lombumu pakon biribirimu.
19 Hona papa ma ham laho masuk, anjaha hona papa ma ham laho luar.
20 Tongoson ni Jahowa ma hu tongah-tongahmu papa-papa, hageoron pakon hinamagou bani haganup na hinorjahon ni tanganmu, paima siap anjaha magou ham podas, halani hinabajan ni pambahenmu, halani na tinadingkonmu in Ahu.
21 Sai mardondon do i tongah-tongahmu sampar bahenon ni Jahowa, paima siap ham hun tanoh siparayakonmu bahen parbagiananmu.
22 Papaan ni Jahowa ma ham marhitei naborit tirahap, pane-pane, rojan, arun, logou ni ari, hameluson pakon antinganou; sai pardakdakon-Ni do ham paima magou ham.
23 Anjaha gabe tombaga ma langit na i babou ni ulumu, anjaha gabe bosi tanoh na i toruhmu.
24 Bereon ni Jahowa ma horsik pakon orbuk gantih ni udan hu tanohmu; mangkadabuh ma in bamu hun langit paima magou ham.
25 Bahenon ni Jahowa ma ham marrageian i lobeini munsuhmu; marhitei humbani sada dalan ham bingkat mandorab munsuhmu, hape marhitei humbani pitu dalan ham maporus i lobeini munsuhmu; anjaha gabe hagigian ma ham bani ganup harajaon na i tanoh on.
26 Gabe sipanganon ni sagala manuk-manuk na i awang-awang in pakon binatang na i tanoh on ma bangkeimu; sahalak pe lang na ra mangosiki ai.
27 Papaan ni Jahowa ma ham marhitei puru Masir, marhitei bayoh, hurap pakon hulus na so hatambaran.
28 Papaan ni Jahowa ma ham marhitei podou, hapitungon pakon ratou,
29 gabe dadap-dadap ma ham tongah arian, songon na mapitung dadap-dadap ibagas hagolapan, anjaha seng mardohar ham bani sagala dalanmu; pitah siayakon pakon sirampokan ma ham tongtong, anjaha seng dong na paluahkon ham age sahalak.
30 Mambuat boru ham, tapi halak na legan do marjolmahonsi; pajongjong rumah ham, tapi seng ham marianan ibagas, mamungkah pohon anggur ham, hape seng ham mangankon buahni.
31 Sayaton ni halak ma lombumu i lobeini matamu, tapi seng bulih panganonmu ai; rampason ni halak ma halodemu hun lobeimu, anjaha seng paulakonni ai bamu; ondosonkon ma biribirimu hubani munsuhmu, anjaha sahalak pe lang dong na mangurupi ham.
32 Ondosonkon ma anakmu pakon borumu hubani bangsa na legan ipaidah-idah matamu, anjaha siholan ma ham layur-layur ari hubani sidea, tapi aha pe lang boi bahenonmu.
33 Anjaha bois ma gogoh ni tanohmu in pakon na hinangalutkonmu in panganon ni bangsa na so tinandamu; pitah siodaron pakon sidogei-dogeian ma ham layur,
34 ase podouan ma ham halani haganup sitaronon na nididah ni matamu ai.
35 Papaan ni Jahowa ma ham marhitei puru na jahat bani towodmu pakon bani hae-haemu, na so hatambaran olat ni jampal ni naheimu das hu pakpak ni ulumu.
36 Pabalion ni Jahowa ma ham rap pakon rajamu, na pinabangkitmu manggomgom ham, hubani sada bangsa sipajuh begu-begu, na so tinandamu anjaha na so tinanda ni ompungmu, jadi balosanmu ma ijai naibata na legan humbani hayu pakon batu.
37 Anjaha gabe hagigian, umpama ni halak pakon sipahiri-hirion ma ham i tongah-tongah ni ganup bangsa atap huja ham sihol pabalion ni Jahowa.
38 Buei do namin boanonmu bonih hu jumamu, tapi otik do ai patumpuonmu; ai bois do ai gagaton ni balang.
39 Pungkahonmu do namin pohon anggur anjaha pauli-ulionmu ai, tapi seng anjai inumonmu anggur ai barang patumpuonmu buahni, ai bois do ai panganon ni gilok-gilok.
40 Martubuhan do namin hayu jetun bani ganup tanohmu inggot, tapi seng anjai minakanmu angkulamu bani minak, ai marurus sonin do buah ni hayu jetunmu.
41 Tubuhan anak pakon boru do namin ham, tapi seng anjai dong tading i lambungmu; ai maningon laho do sidea hu habuangan.
42 Sagala hayumu pakon buah ni tanohmu ai maningon tamponok do simadasi.
43 Ia halak dagang na i tongah-tongahmu in lambin dokahni lambin naikni do mangatasi ham, tapi anggo ham lambin dokahni lambin surutni do.
44 Ia ma papinjamkon bamu, seng ham papinjamkon bani; ia ma gabe ulu, anjaha ham gabe ihur.
45 Sai na sogop do bamu ganup papa-papa on, anjaha pardakdakonni do ham anjaha honaanni paima siap ham, halani na so tinangihonmu sora ni Jahowa Naibatamu, laho manramotkon ganup titah-Ni pakon aturan-Ni, sagala na tinonahkon-Ni ai bamu.
46 Maningon gabe tanda pakon halongangan ma in bamu pakon bani ginomparmu sadokah ni dokahni.
47 Halani na so binalosanmu Jahowa Naibatamu marhasoman malas ni uhur pakon dear ni uhur, hinorhon ni hinabuei ni ganup na jinalomu ai,
48 maningon pambalosi ma ham bani munsuhmu, na sinuruh ni Jahowa mangimbang ham, manaron lohei pakon horah, partalanjangon pakon hahurangan na marbagei-bagei; anjaha nahkonon ni Jahowa ma pasangan bosi hubani borgokmu paima magou ham bahenon-Ni.
49 Boanon ni Jahowa ma sada bangsa sipajuh begu-begu humbani na daoh, humbani ujung ni tanoh on manlawan ham, songon parhabang ni manuk-manuk nanggordaha pardorasni, sada bangsa na so niarusanmu parsahapni,
50 sada bangsa na reteng bohini, na so maralang-alang mangidah na matua, anjaha na so maridop ni uhur mangidah na maposo,
51 anjaha bois do panganonni anak ni pinahanmu pakon gogoh ni tanohmu paima siap ham; seng tebaanni bamu gandum, anggur, minak, anak ni lombu pakon biribirimu, paima siap ham bahenonni.
52 Anjaha sosakonni ma ham ibagas ganup hutamu, paima marongrong bahenonni tembokmu na gijang anjaha na toguh ai, na hinatengeran ni uhurmu namin bani sab tanohmu; maningon sosakanni do ham bani haganup hutamu i sab tanohmu, sibereon ni Jahowa Naibatamu bamu.
53 Panganonmu do boras ni boltokmu sandiri, daging ni anakmu pakon borumu, sagala na dob binere ni Jahowa Naibatamu bamu, ibagas pangkubu pakon hasosakan na binahen ni munsuhmu bamu.
54 Dalahi siunjahan anjaha siminggalan i tongah-tongahmu, serleng do panonggorni marsimburu mangidah saninani pakon mangidah parinangon haudungan ni uhurni pakon mangidah niombahni na tading manggoluh ope pakonsi,
55 gabe seng ibere hubani sidea humbani daging ni anakni sandiri na pinanganni, halani na so adong ai teba age aha bani marhitei pangkubu pakon hasosakan, na binahen ni munsuhmu bamu ibagas hutamu.
56 Puang-puang siunjahan anjaha siminggalan i tongah-tongahmu, na so pag manondolhon tapak-tapak ni naheini hu tanoh halani jengesni pakon minggalni, serleng do matani marsimburu mangidah paramangonni sandiri, mangidah anakni pakon boruni,
57 gabe seng ibere hubani sidea humbani anggi-anggi ni na etek-etek, na luar hun partapaan, barang humbani na etek-etek na dob tinubuhkonni, ai sihol do panganonni ai marponop-ponop, halani hurangan ia bani haganup marhitei pangkubu pakon hasosakan, na binahen ni munsuhmu bamu ibagas hutamu.
58 Anggo seng iramotkon ham anjaha ihorjahon ham haganup hata ni titah on, na tarsurat ibagas buku on, ase marhabiaran ham bani goran na marmulia anjaha na majombut on, ai ma Jahowa Naibatamu,
59 gabe marhasurungan ma papahonon ni Jahowa bamu pakon bani ginomparmu, papa na bolon pakon na manongtong, pakon naborit na parah anjaha mardondon.
60 Anjaha tonahkonon-Ni ma use bamu ganup naborit na masa i Masir, na hinabiaranmu ai, ai ma mangonai bamu.
61 Sagala naborit pakon papa na so tarsurat ibagas buku titah on, honahonon ni Jahowa ma bamu, paima siap ham.
62 Jadi otik naman na tading humbani nasiam, age pe usih hubani bintang na i langit hinan hinabuei nasiam, halani na so itangihon nasiam sora ni Jahowa Naibatamu.
63 Anjaha ia sonin hinan malas ni uhur ni Jahowa mangidah nasiam, laho mambahen na madear hubani nasiam pakon pabueihon nasiam, usih sonai ma malas ni uhur ni Jahowa laho mangagou pakon maniapkon nasiam; anjaha orbaton-Ni ma nasiam hun tanoh simasukan nasiam bahen parbagianan nasiam.
64 Anjaha pamerapon ni Jahowa ma ham hu tongah-tongah ni sagala bangsa, hun ujung ni tanoh na sada hu ujung ni na sada nari, anjaha balosanmu ma ijai naibata na legan humbani hayu pakon batu, sagala na so tinandamu barang ompungmu hinan.
65 Anjaha seng anjai marhasonangan ham i tongah-tongah ni bangsa ai, anjaha seng dong parsaranan bani tapak-tapak ni naheimu, ai bereon ni Jahowa ma bamu uhur na gobir tongtong, pakon mata na motei-otei, pakon tonduy na marpandoleian.
66 Gantung mando goluhmu songon bani jambulan i lobeimu; marhabiaran ma ham arian pakon borngin, anjaha seng be tenger uhurmu bani goluhmu.
67 Sogod hatahononmu ma, ʻAmbit golap ma namin ariʼ anjaha borngin hatahononmu ma, ʻAmbit siang ma namin ari!ʼ Halani biar na mambibiari uhurmu pakon hinamagou na nididah ni matamu.
68 Dob ai boanon ni Jahowa ma ham mulak hu Masir ibagas parau, hubani dalan na dob hupatugah hinan bamu, ʻSeng anjai idahonmu be in anjaha jualon ma nasiam ijai hubani munsuhmu bahen jabolon dalahi pakon jabolon naboru, hape seng dong na ra mamboli.ʼ
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA