Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Mon ba’na atoro’ ka dhabuna GUSTE Allahna ban esto ngalakone sakabbinna papakonna se bi’ sengko’ epanapa’ ka ba’na are teya reya, bi’ Salerana ba’na bakal epadaddiya bangsa se paleng kasohor e dunnya reya.

² Ta’adi GUSTE Allahna, sopaja ba’na narema’a sakabbinna berkat reya dhari Salerana:

³ PANGERAN bakal aberkadana tha-kottha ban gal-teggalla ba’na.

⁴ PANGERAN bakal aberkadana ba’na sampe’ ba’na bannya’ ana’na, bannya’ hasella tanana, ban bannya’ sape ban dumbana.

⁵ PANGERAN bakal aberkadana hasella gandumma ba’na sarta kakanan se akagabay dhari gandum jareya.

⁶ PANGERAN bakal aberkadana sabarang usahana ba’na.

⁷ Mon ba’na eserrang, PANGERAN bakal makala’a mosona ba’na. So-mosona ba’na bakal nyerrangnga ba’na kalaban tartep, tape bakal buruwa asalebbudan san-kassannagi.

⁸ PANGERAN bakal aberkadana usahana ba’na ban ngesseyana bung-lombungnga ba’na bi’ gandum. Salerana bakal aberkadana ba’na e nagara se eparengngagi ka ba’na rowa.

⁹ Mon ba’na ta’at ka GUSTE Allahna, ban ngalakone sakabbinna papakonna, ba’na tanto epadaddi ommadda dibi’ akantha se la ejanjiyagi Salerana.

¹⁰ Daddi sakabbinna bangsa e bume reya tanto pas tao ja’ ba’na reya bangsa peleyanna PANGERAN, ban tanto padha tako’ ka ba’na.

¹¹ Ba’na bakal eparengngana bannya’ ana’na. Ebinna ba’na bakal bannya’a ban hasella tanana ba’na bakal wa’-ngalowa’a e nagara se eparengngagi ka ba’na menorot janjina ka bangatowana ba’na.

¹² PANGERAN bakal matorona ojan e bakto mosemma dhari panyempennanna se ta’ sakera-kera bannya’na neng e langnge’. Sakabbinna usahana ba’na bakal eberkadana, sampe’ ba’na bisa aberri’ enjaman ka bangsa sabannya’na, tape ba’na dibi’ ta’ osa jam-ngenjam dhari sapa’a bai.

¹³ Bi’ GUSTE Allahna ba’na bakal epadaddiya pamimpin e antarana sa-bangsa, banne daddi oreng baba’an. Mon ba’na ngestowagi sakabbinna papakonna PANGERAN se bi’ sengko’ epanapa’ ka ba’na are teya reya, ba’na bakal sajana ma’mor ban ta’ kera tao kakorangan.

¹⁴ Tape ja’ sampe’ ba’na ngenthengngagi kon-papakonna jareya maske baramma’a, ban ja’ sampe’ ba’na nyemba ka la’-alla’an."

¹⁵ "Tape mon ba’na ta’ atoro’ ka GUSTE Allahna, ban ta’ ngestowagi sakabbinna papakon ban hokomma se bi’ sengko’ epanapa’ ka ba’na sateya reya, ba’na bakal ekennenga sakabbinna babaston reya:

¹⁶ PANGERAN bakal abastowa tha-kottha ban gal-teggalla ba’na.

¹⁷ PANGERAN bakal abastowa hasella gandumma ba’na ban kakanan se ekagabay dhari gandum jareya.

¹⁸ PANGERAN bakal abastowa ba’na, sampe’ ba’na pera’ andhi’ ana’ sakone’, bariya keya hasella tanana, sarta sape ban dumbana.

¹⁹ PANGERAN bakal abastowa sakabbinna usahana ba’na.

²⁰ Mon ba’na atengka juba’ ban nolak PANGERAN, ba’na bakal epadhatengngana balai, epasalbuda ban epamalarada e dhalem sabarang se elakone ba’na, sampe’ e dhalem bakto se pera’ sakejja’ ba’na bakal epatompessa kabbi.

²¹ Ba’na bakal ekennenga panyaket se acem-macem, mare panyaket se settong agante panyaket laenna, sampe’ dhi-budhina tadha’ karena settonga e antarana ba’na se gi’ badha’a e nagara se ekennengngana ba’na jareya.

²² PANGERAN bakal ngokoma ba’na bi’ panyaket se alleyan, ra-bara ban panas. Ba’na bakal epadhatengngana jaman kerreng ban angen se mapotthon sampe’ hasella tamennanna ba’na rosak kabbi. Balai se acem-macem jareya bakal ngennenga ka ba’na sampe’ ba’na mate kabbi.

²³ Ojan ta’ kera toron ban tanana ba’na bakal galiya akantha besse.

²⁴ PANGERAN ta’ kera matoron ojan aeng, tape bakal matorona ojan abu ban beddhi sampe’ ba’na padha mate kabbi.

²⁵ Mon ba’na ta’ atoro’ ka GUSTE Allahna, bi’ Salerana ba’na bakal epakala’a ka so-mosona. Ba’na bakal nyerrangnga so-mosona kalaban tartep, tape ba’na bakal buruwa asalebbudan. Sa-bangsa e bume bakal arassa’a marenges kabbi nangale’e kapalanganna ba’na.

²⁶ Mon ba’na mate, mayyidda ba’na bakal daddiya pakanna no’-mano’ ban burun alas, ban tadha’ oreng se ngagga’a ban-keban jareya.

²⁷ Bi’ PANGERAN ba’na bakal eokoma epatemmowa bu-tombu akantha se epakenneng ka bangsa Messer. Badanna ba’na bakal possa’a bi’ poro ban koreng se gatel, tape tadha’ tambana.

²⁸ Bi’ PANGERAN ba’na bakal epagila’a, epabuta’a ban epabingonga.

²⁹ E tera’na are ba’na bakal ga’-raga’ana akantha oreng buta, tape ta’ kera nemmo jalan. Sakabbinna usahana ba’na bakal ta’ olleya hasel. Ba’na bakal ros-terrosana ekaneyaja ban ebigal, ban ta’ kera badha se nolong ba’na.

³⁰ Mon ba’na ta’ ta’at ka Guste Allah, ba’na bakal kateba’ana hal-hal e baba reya. Ba’na bakal abakalana, tape bakalla ba’na jareya bakal ekabina oreng laen. Ba’na bakal maddegga bengko, tape ta’ kera noro’ ngennengnge. Ba’na bakal namennana kebbun anggurra tape ta’ kera noro’ ngakan buwana.

³¹ Sapena ba’na bakal esambelliya e adha’anna matana ba’na, tape ba’na ta’ kera noro’ ngakan dagingnga. Mar-hemarra ba’na bakal egiringa oreng sabatara ba’na pera’ bisa ngabas malolo, ban ta’ kera epabali pole. Ba-dumbana ba’na bakal ebagiya ka so-mosona ban ta’ kera badha oreng se nolong.

³² E adha’anna matana ba’na na’-ana’na ba’na bakal ebagiya ka oreng manca ekagabaya dunor. Sabban are matana ba’na bakal peddiya se nyare’e na’-ana’na, tape ehteyarra ba’na ta’ kera badha ollena, sabab ta’ kera epabali pole ka ba’na.

³³ Ba’na alako berra’ namenne tanana, tape hasella bakal ekala’a bangsa laen kabbi, ban ba’na ta’ kera olle pa-apa kajabana ekaneyaja ban ekejjemme ros-terrosan.

³⁴ Ba’na bakal gila’a polana sakabbinna kasangsara’an se etanggung ba’na jareya.

³⁵ Bi’ PANGERAN sokona ba’na epabannya’a porona se nyo’nyo’ ban ta’ ekenneng pabaras; dhari soko sampe’ ka konco’na obu’na ba’na bakal possa’a ban bu-tombu.

³⁶ Ba’na ban ratona bi’ PANGERAN bakal ebakta’a ka nagara manca se ta’ ekataowe ba’na ban ta’ ekataowe bangatowana ba’na. E jadhiya ba’na bakal ngabdiya ka la’-alla’an se ekagabay dhari kaju ban bato.

³⁷ E ra-nagara kennengnganna ba’na se epasalebbudana bi’ PANGERAN jareya, reng-oreng bakal arassa’a marenges nangale’e ba’na; ba’na bakal eya-seya’a ban ekala’-gella’a oreng.

³⁸ Bannya’ ne-bine se etabur ba’na, tape sakone’ hasel se ekaolle, sabab men-tamennanna ba’na epaobus bi’ balang.

³⁹ Ba’na bakal namennana kebbun anggurra ban meyara bun-kebbun jareya, tape ta’ kera noro’ molong buwana anggurra otabana ngenom aengnga, sabab ka-bungkana anggurra jareya bakal obusa ekakan ola’.

⁴⁰ Sanagarana ba’na bakal tombuwa ka-bungkana jaitun, tape buwana bakal ngalotora, sampe’ ba’na ta’ olle mennya’na.

⁴¹ Ba’na bakal andhi’a ana’ lalake’ ban babine’, tape ba’na bakal kaelangana na’-ana’na jareya sabab kabbi bakal epadaddiya tawanan perrang.

⁴² Bungkana anggurra ban men-tamennanna ba’na bakal obusa ekakan balang kabbi.

⁴³ Oreng manca se badha e nagarana ba’na bakal atamba’a kobasa, dineng kakobasa’anna ba’na dibi’ bakal akoranga.

⁴⁴ Reng-oreng jareya bakal andhi’a pesse se eenjammagiya ka ba’na, tape ba’na bakal ta’ andhi’a pa-apa se ekennenga paenjam ka reng-oreng jareya. Ban dhi-budhina ba’na bakal ekobasa’ana reng-oreng jareya.

⁴⁵ Balai jareya kabbi bakal teba’a ka ba’na ban bakal agangguwa ba’na terros sampe’ ba’na mate kabbi, sabab ba’na ta’ atoro’ ka GUSTE Allahna ban ta’ ajalannagi kom-hokomma se eparengngagi ka ba’na.

⁴⁶ Balai jareya menangka buktena okomanna Pangeran ka ba’na ban ka na’ potona ba’na salanjangnga.

⁴⁷ E dhalem apa’a bai ba’na la eberkadi bi’ GUSTE Allahna, tape ba’na ta’ endha’ ngabdi ka Salerana kalaban ate se ehlas ban gumbira.

⁴⁸ Daddi ba’na kodu ngabdi ka so-moso se bi’ PANGERAN epadhatengnga ka ba’na. Ba’na bakal kalaparana, kapelka’en ban abangkang, ban kakorangan e dhalem parkara apa’a bai. PANGERAN bakal nyeksa’a ba’na epakejjem sampe’ ba’na mate.

⁴⁹ Badha settong bangsa dhari konco’na bume, ba’na ta’ ngarte basana, bangsa jareya bakal epadhatengnga bi’ PANGERAN epamosowana ban ba’na. Bangsa jareya akantha mano’ rajabali bakal nyaoba ba’na.

⁵⁰ Bangsa jareya kejjem, ta’ andhi’ ate neser ka oreng towa ban ka na’-kana’.

⁵¹ Ebin ban hasella tanana ba’na bakal epatadha’a, ban ba’na bakal ta’ edina’ana gandum, aengnga anggur, mennya’ jaitun otabana sape ban embi’ ban dumba sampe’ ba’na mate kalaparan.

⁵² Bangsa jareya bakal nyerrangnga saneyap kottha e nagara se eparengngagi ka ba’na bi’ GUSTE Allahna sampe’ gar-pagar batona se tenggi ban se epakoko ban binteng se eandellagi ba’na bakal gujura.

⁵³ Sabatara so-mosona ba’na ngeppong tha-kotthana ba’na, ba’na bakal potosa asa polana kalaparan, sampe’ ba’na ngakan na’-ana’na dibi’, na’-ana’ se eparengngagi ka ba’na bi’ GUSTE Allahna.

⁵⁴ La’-mala’ oreng bangsawan se paleng molja buddina bakal potosa asa saabidda ekeppong moso jareya, sampe’ ngakan na’-ana’na dibi’ sabab tadha’ kakanan laenna. Taretanna otabana binena se kataresnan otabana na’-ana’na se gi’ odhi’ ta’ epamelo maske sakone’a.

⁵⁵ (28:54)

⁵⁶ La’-mala’ babine’an bangsawan se paleng molja buddina ban se talebat sogina sampe’ ta’ tao rassana ajalan soko, bakal kantha’a jareya keya. E bakto moso ngeppong kottha, babine’ jareya bakal potosa asa polana kalaparan, sampe’ tek-ngetek ngakan ana’na se gi’ buru lahir ban ne-tamonena. Lakena se kataresnan otabana na’-ana’na tadha’ se epamelowa maske sakone’a.

⁵⁷ (28:56)

⁵⁸ Mon ba’na ta’ ngestowagi sakabbinna hokomma GUSTE Allahna se etoles e dhalem buku reya ban ta’ hormat ka GUSTE Allah se agung ban se makasambu’ ate,

⁵⁹ bi’ GUSTE Allah ba’na sarta toronanna bakal epadhatengngana ket-panyaket se ta’ ekenneng pabaras, ban bah-wabah se nako’e se ta’ ekenneng paambu.

⁶⁰ Ket-panyaket se nako’e se etangale’e ba’na e Messer bakal ngennenga ka ba’na, ban ba’na ta’ kera bisa epabaras.

⁶¹ Laen dhari jareya PANGERAN madhatengnga keya ket-panyaket ban wabah se ta’ esebbut e dhalem buku reya, buku Hokomma PANGERAN. Ban ba’na bakal mateya.

⁶² Maske bannya’na ba’na la padha ban bannya’na bintang e langnge’, e antarana ba’na pera’ sakone’ se gi’ odhi’, sabab ba’na ta’ ta’at ka GUSTE Allahna.

⁶³ PANGERAN kasokan apareng kama’moran ka ba’na ban nambai bannya’na ba’na, bariya keya Salerana bakal kasokana matompes ba’na. Ba’na bakal ecabuda dhari nagara se bakal ekobasa’ana ban ekennengngana ba’na jareya.

⁶⁴ Bi’ PANGERAN ba’na bakal epasalebbudana e antarana sa-bangsa e bume. E jadhiya ba’na bakal nyemba’a la’-alla’an se ekagabay dhari kaju ban bato, la’-alla’an se padha ta’ ekennal bi’ ba’na ban bangatowana ba’na.

⁶⁵ E antarana sa-bangsa jareya ba’na bakal ta’ nemmowa kataremtemman e dhimma’a bai, ban bakal tadha’a kennengngan se ekennenga koca’ andhi’na ba’na dibi’; bi’ PANGERAN ba’na epaandhi’a ate kobater ban ta’ andhi’ pangarebban sakale.

⁶⁶ Odhi’na ba’na bakal badha’a e dhalem babaja terros. Seyang malem ba’na bakal arassa’a marenges ban tako’ mate.

⁶⁷ Mon nangale’e apa bai atena ba’na dhek-gadheggan polana tako’. Mon gu-laggu ba’na terro malemma, ban mon malem ba’na terro lagguwa.

⁶⁸ Bi’ PANGERAN ba’na bakal epabaliya ka Messer epanompa’a kapal, sanajjan Salerana la tao adhabu ja’ ba’na ta’ kera abali dha’ essa’ pole. E jadhiya ba’na bakal aehteyara ajuwal badanna terro epadaddiya dunorra mosona tape tadha’ oreng settonga se melleya ba’na."

Ulangan

Video Ulangan 28

Ikuti Kami:

KONTAK | PARTISIPASI | DONASI