Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Teako assarei sapi yareka gimbala’ niaka callanna mae ri Karaeng Allata’alanu, lanri taNangaiyai Karaeng Allata’alanu.
2 Ebara’ angkana nulangngere’ kabaraki angkanaya ri kalase’renna kotanu nia’ tau doraka lanri nadakkaina parjanjiang
3 siagang parentaNa Karaeng Allata’ala lanri anynyombana siagang napare’ atana kalenna mae ri rewata-rewata maraenga, yareka mae ri mataalloa, bulanga yareka bintoenga.
4 Anjo passalaka musti nusalidiki baji’-baji’. Ebara’ angkana anjo kaja’dallanga memang kajariang tojeng-tojengi ri Israel,
5 anjo tau salaya musti nierangi assulukang ri pantaranna kotaya nampa nisambila batu sa’genna mate.
6 Mingka iapa nakkulle nihukkung mate punna nia’ sa’bi rua tau yareka la’bi ri ruaya tau; takkulleai nihukkung taua punna sitauji bawang a’jari sa’bi.
7 Anjo rolong sikamma a’jari sa’bia appakkaramula ansambilai batu anjo taua, nampa nipinawang ri sikontu ra’yaka. Kammaminjo caranu ampaccappuki anjo kaja’dallanga.
8 Punna nia’ parkara takkullea nitappuki ri haking-hakinga ri se’reang tampa’ lanri sukkara’ duduna, ebara’na parkara pammunoang tenaya nikunjungi yareka nikunjungia, parkara pa’barang-barangngang yareka assiloko’-lokoki, musti nuerangi mange ri tampa’ ibada Napattantua Karaeng Allata’alanu.
9 Erangi anjo parkaranu mae ri imang-imang Lewi siagang mae ri haking tugasaka anjo wattua, nampa lappassammi anjo ke’nanga antappuki anjo parkaraya.
10 Ke’nangami assare kaputusang, siagang musti nugaukangi siagang baji’ apa napaua ke’nanga mae ri kau.
11 Tarimami anjo kaputusanna ke’nanga siagang gaukangi apa le’baka napattantu ke’nanga sa’genna ri passala’ kaminang ca’dia.
12 Manna inai punna barani angngewai hakinga yareka imang tugasaka, musti nihukkung matei; kammaminjo nanupaccappu’mo kaja’dallang kammaya anjo ri Israel.
13 Sikamma taua lanalangngereki anjo kajarianga sa’genna a’jari malla’, sa’genna tenamo tau maraeng barani appanggaukang kamma anjo."
14 "Punna nupatammo anjo butta Napassareanga Karaeng Allata’alanu mae ri kau, siagang ammantang mako anjoreng, gassingka erokko angngangka’ sitau karaeng, sangkamma bansa-bansa niaka ammantang ri tammulilinu.
15 Parhatikangi baji’-baji’, sollanna anjo tau nuangkaka a’jari karaeng iamintu tau Napilea Karaeng Allata’alanu. Anjo taua musti tau battu ri bansanu; teako angngangkakki bansa maraeng a’jari karaennu.
16 Se’rea karaeng takkulleai ammallaki jai jarang untu’ tantarana siagang takkulleai nasuro anne bansaya ammotere’ mange ri Mesir untu’ ammalli jarang, lanri le’baki Napau Batara angkanaya takkulleai ammotere’ umma’Na mange ri anjo pa’rasanganga.
17 Se’rea karaeng takkulleai jai bainenna, sollanna tena naNabokoi Batara. Tena todong nakkulle napa’jari kalumanynyang kalenna siagang pera’ siagang bulaeng.
18 Punna nia’ tau nilanti’ a’jari karaeng, musti nisarei kitta’ niaka lalang nitulisi’ hukkung-hukkunNa Allata’ala, ia nipalembaya battu ri kitta’ aslia nabolika imang-imang Lewi.
19 Anjo kittaka musti tuli niaki ri ampi’na, siagang musti tuli nabacai lalang sikontu umuru’ katallassanna, sollanna appilajara’ ampakala’biriki Karaeng Allata’alana siagang tamamminraya pa’mai’na tuli anturuki sikontu parenta niaka tattulisi’ ilalang ri anjo kittaka.
20 Punna rajengi ambacai, tenamo nalanakana kalenna la’bi bajikangngangi na julu bansana maraenganga, siagang manna antekamma tenamo nalanadakkai parentaNa Batara. Nampa iami siagang jari-jarina tuli lammarenta ri bansana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA