Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ula persembahken man TUHAN Dibatandu lembu tah biri-biri si lit cacatna; ciga ate TUHAN persembahen si bage rupa.
2 Adi lit ibegindu maka i bas sada kota, lit kalak, subuk dilaki ntah diberu erdosa man TUHAN janah nggo ngelanggar perpadanenna ras TUHAN,
3 alu nembah dingen erdahin guna dibata-dibata si deban, ntah matawari ntah bulan, ntah bintang-bintang, sada perbahanen si ertentangen ras perentah TUHAN.
4 Adi lit ibegindu berita si bagenda rupana, selidiki lah lebe mehuli-mehuli. Adi payo maka si jahat e nggo jadi i Israel,
5 babalah kalak si bage ndarat kota, batu-batui ngayak mate.
6 Tapi, kalak si bage banci iukum mate adi lit dua kalak tah lebih saksi; ia la banci iukum mate adi sada ngenca saksi.
7 Saksi-saksi e mbatu-batuisa si pemena, emaka kenca bage kalak si deban kerina, alu bage nggo iambekkenndu kejahaten enda.
8 Banci jadi maka lit perkara-perkara si meserasa mutuskenca i bas sada ingan umpamana: kalak sibunuh-bunuhen, situntut-tuntuten kerna erta-erta, siluka-lukan, bage pe perkara pembunuhen tapi la ieteh sengaja ntah lang, emaka laweslah ku ingan ersembah si sada e si nggo itentuken TUHAN.
9 Adapkenlah perkara e man imam-imam kalak Lewi ras man hakim si ertugas paksa e, suruhlah ia erbahan keputusen.
10 Ia mutusken perkara e, janah lakokenlah rikutken keputusenna e.
11 Aloken lah keputusenna ras ikutken lah kai nina seh ku bas soal si kitik-kitikna pe.
12 Ise si pang nimbak hakim ntah imam si sanga ertugas paksa si e arus ibunuh. Alu bage iaguindu kejahaten enda i bas Israel nari.
13 Emaka kerina kalak megi si enda jadi mbiar, janah ise pe lanai pang ngelakoken si bage."
14 "Kenca nggo idatndu taneh si ate TUHAN Dibatandu ibereken man bandu, janah kam nggo tading i je, nggit mawen maka merincuh ka kam lit rajandu bagi bangsa-bangsa sekelewetndu.
15 Jaga maka kalak si ipilihndu atendu jadi raja e, kalak si nggo ipilih TUHAN. Arus maka ia ipilih i bas bangsandu nari, ula bahan bangsa si deban jadi rajandu.
16 Raja e la banci melala kudana guna ipake tenterana, la banci isuruhna rayat nukur kuda ku Mesir, sabap nggo ikataken TUHAN maka BangsaNa ndigan pe lanai banci mulihken ku Mesir.
17 La banci melala ndeharana, sabap e banci erbahanca ia nundalken TUHAN. La banci ipebayakna bana alu pirak ntah emas.
18 Sanga ia jadi raja arus maka lit ibahanna sada salinen kitap undang-undang ras pengajaren Dibata si isalin i bas aslina nari si isimpan imam-imam kalak Lewi.
19 Kitap e arus ndeher rusur ras ia ras iogena gedang-gedang geluhna, gelah alu bage erlajar ia pehaga TUHAN ras ngikutken perentah-perentah si lit i bas kitap e alu tutus.
20 Si enda guna njagai ia maka ula iakapna ia ganjangen asang temanna kalak Israel si deban. Tole pe njagai ia gelah ula sitik pe la ikutkenna perentah-perentah TUHAN. Alu bage maka banci ia erkuasa ertahun-tahun, dingen KesusurenNa merentah Israel ersundut-sundut."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA