Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata, na ipatugah si Musa hubani ganup Israel i dipar ni Jordan i halimisan, bani pamah tontang ni Suf, i holangkolang ni Paran, Tofel, Laban, Haserot pakon Disahab.
2 Sapuluh sada ari mardalan daohni hun Horeb mangirik-irik Dolog Seir das hu Kades-Barnea.
3 Jadi bani tahun paompatpuluhkon, ari sada, bulan sapuluh sada, marsahap ma si Musa hubani halak Israel, romban hubani ganup na tinonahkon ni Jahowa hu bani, sipadasonni hubani sidea,
4 dob tinaluhon ni si Sihon, raja ni halak Amori, na marianan i Hesbon, pakon si Og, raja ni Basan, na marianan i Astarot dohorhon Ederei.
5 I dipar ni Jordan, i tanoh Moab ipungkah si Musa pajojorhon titah on, nini ma,
6 Roh do hata ni Jahowa Naibatanta in hu banta sanggah i Dolog Horeb, nini do, “Domma sungkup panorangnima marianan i lambung dolog on;
7 bingkat ma hanima mardalan, ase das hanima hu tanoh dolog ni halak Amori pakon hubani haganup halak simbalogni i pamah ai, i atas dolog pakon i habungan, pakon i tanoh dangsina, pakon i topi laut, hu tanoh ni halak Kanaan pakon Libanon, das hu bah bolon ai, ai ma Bah Eprat.
8 Tonggor ma, domma Hulayak-layakkon tanoh in i lobeinima, ase masukan anjaha solukonnima, tanoh na dob binulawankon ni Jahowa hinan hubani ompungnima, hubani si Abraham, si Isak pakon si Jakob, laho mamberehon ai hubani sidea pakon hubani ginompar ni sidea.”
9 Jadi ningku ma hubani nasiam ijia, “Seng tarbahen sasada ahu mangusung nasiam,
10 ai domma ipabuei Jahowa, Naibata nasiam in nasiam, domma songon bintang na i langit buei nasiam sadari on.
11 Sai itambahi Jahowa Naibata ni ompung nasiam in ma bilangan nasiam marribu hali bueinan humbani sonari, anjaha sai ipasu-pasu ma nasiam, songon na pinarbagah-bagah-Ni hinan bani nasiam.
12 Sonaha ma pangusungku sahalak ahu bani halojaon, siporsanon pakon partinggilan nasiam?
13 Pilih nasiam ma bani nasiam dalahi na pentar anjaha na pantas maruhur pakon na marpangalaman humbani ganup marga nasiam, ase hupabangkit sidea gabe kopala nasiam.”
14 Jadi nini nasiam ma mambalosi ahu, “Dear do pasadaonmu hata na hinatahonmu ai.”
15 Dob ai hubuat ma humbani kopala nasiam mar sasamarga, halak na pentar anjaha na marpangalaman, lanjar hupabangkit ma sidea bahen kopala bani nasiam, kopala ni sisaribu halak, kopala ni sisaratus halak, kopala ni silima puluh halak pakon kopala ni sisapuluh halak, anjaha songon gamot bani ganup marga nasiam.
16 Anjaha huparentahkon do hubani panguhum nasiam ijia, “Tangkas ma tangi nasiam bani parhara ni sanina nasiam, anjaha uhum hasintongan ma dabuh nasiam hubani ganup na marsanina pakon hubani halak dagang.
17 Ulang ma sitonggor jumbak nasiam ibagas paruhuman; maningon dos panangihon nasiam bani halak na banggal pakon bani halak na etek, seng bulih nasiam mabiar mangidah atap ise, ai Naibata do simada paruhuman; tapi parhara na maholtu bani nasiam, boan nasiam hu bangku, ase ahu mamareksasi.”
18 Anjaha hutonahkon do ijia bani nasiam sagala parhara, na patut bahenon nasiam.
19 Dob ai bingkat ma hita hun Horeb, anjaha mawat-awat ma hita i halimisan na bolon anjaha na majangin ai, ai ma na dob nididah nasiam, bani dalan laho hu Dolog Amori, songon na tinonahkon ni Jahowa, Naibatanta in hu banta, gabe das ma hita hu Kades-Barnea.
20 Dob ai ningku ma bani nasiam, “Domma das nasiam hu Dolog Amori, na sihol bereon ni Jahowa, Naibatanta in hu banta.
21 Tonggor ma, domma ibere Jahowa, Naibatamu, tanoh in i lobeimu, halani ai bingkat ma ham, tean ma tanoh in, songon na dob pinarbagah ni Jahowa, Naibata ni ompungmu hinan; ulang mabiar anjaha ulang ham gobir.
22 Dob ai roh ma nasiam ganup hun dohor hu bangku anjaha nini nasiam, ʻSuruh hita ma dalahi parlobeita, ase ikahapi sidea tanoh ai banta, lanjar iboan barita hu banta pasal dalan sibontasonta pakon pasal huta simasukanta.ʼ
23 Jadi dear do hata ai huahap, lanjar hubuat ma humbani nasiam sapuluh dua halak, sahalak humbani ganup marga.
24 Dob ai bingkat ma sidea tangkog hu dolog, anjaha das ma sidea hu habungan Eskol, lanjar ikahapi ma ai.
25 Iboan sidea ma ibagas tangan ni sidea humbani gogoh ni tanoh ai, anjaha ibere ma ai hu banta, anjaha iboan sidea homa barita banta, nini do, ʻNa jenges tumang do tanoh, na nilayak-layakkon ni Jahowa, Naibatanta in banta,ʼ
26 tapi seng ra nasiam tangkog, lambin manggeori do nasiam dompak hata ni Jahowa, Naibata nasiam;
27 anjaha marungut-ungut do nasiam ibagas lampolampo nasiam, anjaha ihatahon nasiam, ʻHalani sogam ni uhur-Ni do hape mambahen na iarahkon Jahowa hita luar hun Masir laho mangondoskon hita hubagas tangan ni halak Amori ase isiapkon hita.
28 Huja ma hita tangkog? Ai domma madotei atei-ateita ibahen saninanta halani barita ai. Banggalan anjaha timbulan do bangsa ai ase hita; huta ni sidea pe banggal anjaha ipatoguh ronsi langit, adong do homa ididah hanami ijai halak Enak.ʼ
29 Jadi ningku do ijia hubani nasiam, ʻUlang nasiam gobir, anjaha ulang mabiar nasiam mangidah sidea.
30 Ai Jahowa, Naibata nasiam do mardalan i lobei nasiam, Ia sandiri do marporang mangkopkop nasiam, sabonar songon na binahen-Ni ai bani nasiam i Masir i lobei ni panonggor nasiam,
31 sonai i halimisan, na dob ididah nasiam do, na dob iombah Jahowa, Naibatamu do ham, songon pangombah ni paramangon bani anakni, bani ganup dalan nidalanan nasiam in, domma pala das nasiam hu ianan on.
32 Tapi age pe sonai hatangku, tong do lang porsaya nasiam bani Jahowa, Naibata nasiam in,
33 na mardalan i lobei nasiam, mangindahi ianan bani nasiam bahen parsaranan nasiam, borngin ibagas apuy, laho patuduhkon bani nasiam dalan sidalanan nasiam, anjaha arian ibagas hombun.ʼ
34 Tapi dob ibogei Jahowa sora ni hata-hata nasiam ai, gajag ma ringis-Ni, pala marbulawan Ia,
35 ʻSeng anjai idahon ni age sahalak humbani halak na sasundut na jahat on tanoh na dear ai, na dob pala Hubulawankon mamberehon ai hubani ompungnima,
36 sobali si Kaleb, anak ni si Jepunne; maningon idahonni do ai, hubani pakon hubani ginomparni do berehonon-Ku tanoh na dob nidogeini ai, halani marsijoloman do uhurni mangirikkon Jahowa.ʼ
37 Mangidah ahu pe manringis do Jahowa halani nasiam, pala nini, ʻHo pe lang bulih masuk hujai,
38 tapi anggo si Josua, anak ni si Nun, na marugas i lobeimu, maningon masuk do ia hujai; patenger ma uhurni, ai ia do mambobahon Israel manean tanoh ai.
39 Ambah ni ai, anak nasiam, na hinatahon nasiam, siayoban mando in, pakon anak nasiam, na so mambotoh ope sadari on na madear pakon na masambor, sidea ma masuk hujai, anjaha hubani sidea do ai berehonon-Ku bahen siteanon ni sidea.ʼ
40 Tapi bingkat ma nasiam marhusor dompak halimisan dompak Laut Sigerger.
41 Dob ai nini nasiam ma mambalosi ahu, ʻDomma mardousa hanami dompak Jahowa, tapi na sihol tangkog ma hanami marporang romban hubani haganup na dob tinonahkon ni Jahowa, Naibatanta in hu banta. Anjaha ganup nasiam mangkadang sinjata porangni, anjaha gopas nasiam sihol tangkog hu dolog ai.ʼ
42 Dob ai roh ma hata ni Jahowa hu bangku, ʻHatahon ma hubani sidea, ulang ma hanima tangkog, anjaha ulang ma hanima marporang, ai lang i tongah-tongahnima do Ahu, ase ulang talu hanima ibahen munsuhnima.ʼ
43 Jadi hupadas ma hata ai bani nasiam, hape lang itangihon nasiam, lambin manggeori do nasiam dompak hata ni Jahowa anjaha manjahati, lanjar tangkog nasiam hu dolog ai.
44 Dob ai luar ma halak Amori na marianan i dolog ai manjumpahkon nasiam lanjar iparleteng nasiam, songon pardakdak ni harinoan, lanjar italuhon nasiam i Seir ronsi Horma.
45 Jadi dob mulak nasiam anjaha tangis-tangis i lobei ni Jahowa, seng ra Jahowa manangihon sora nasiam, anjaha lang ipaeleng pinggol-Ni hubani nasiam.
46 Jadi hundokah ma nasiam tading i Kades, usih songon partading nasiam ondi ijai.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA