Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ia bonena anne kittaka iamintu kana-kana napabattua Musa mae ri bansa Israel ri wattu nia’na ke’nanga ri parang lompoa ri Ka’bunna Yordan. Anjo ka’bunga irayangannai Binanga Yordan, ri ampi’na kota Suf, nipariallaki ri kota Paran bageang ba’leang siagang kota-kota Tofel, Laban, Hazerot siagang Di-Zahab ri bageang ba’leang se’reanga.
2 (Punna battu ri Moncong Sinai sa’genna mange riKades-Barnea ammalo ri daera monconna Edom, sampulo asse’re allonna nijappai.)
3 Ri tanggala’ se’re bulang sampulo asse’re lalang taung makapatampulona le’ba’na nabokoi ke’nanga butta Mesir, napabattumi Musa mae ri anjo bansaya sikontu apa Nasuro pabattua Batara mae ri ke’nanga.
4 Anjo kajariangi ri le’ba’namo Musa ambetai Sihon, iamintu karaeng Amori, ammarentaya ri kota Hesybon; kammayatompa le’ba’ tommi nabeta Og, karaeng Basan, ammarentaya ri kota-kota Asytarot siagang Edrei.
5 Jari, irayangannai Binanga Yordan ri daera Moab, nappakkaramula napakasingara’ Musa sikamma hukkung-hukkunNa siagang parenta-parentaNa Batara. Nakana Musa,
6 "Ri wattunta nia’ ri Moncong Sinai, Nakana Karaeng Allata’alata, ‘Sallo-sallo mako ammantang ri anne monconga.
7 Kamma-kamma anne bongkara’mi kemanu nampa a’lampako mange ri daera monconna tu Amori siagang mange ri sikontu daera niaka ri tammulilina, iamintu Ka’bung Yordan, daera bulu’-buluka siagang lapparaka, daera bageang timboroka siagang birinna Tamparang Tangngaya. A’lampa mako mange ampammantangngi butta Kanaan siagang daera Monconna Libanon sa’genna mange ri binanga lompona Efrat.
8 INakke, Batara, le’ba’ ampa’janjiangi sikontu anjo buttaya mae ri boe-boenu iamintu Abraham, Ishak siagang Yakub kammayatompa mae ri jari-jarina ke’nanga. Jari a’lampa mako mange ampammantangngi anjo buttaya.’"
9 Nakana Musa mae ri anjo bansaya, "Ri wattunta nia’ ri Moncong Sinai, kukana ri kau: Anjo tanggung jawaka untu’ ampimping ngasengko sanna’ sikali battala’na mae ri nakke. Takullea’ anggaukangi kale-kalengku,
10 lanri pila’ Napa’jari jai mako Karaeng Allata’alanu, rapang bintoenga ri langika jaina.
11 Dasi-dasi na Batara, Allata’alana boe-boenu tulusu’ antambai jainu sa’genna a’lappi sisa’bu, kammayatompa Napa’jariko bansa akkalumanynyang sangkamma le’baka Napa’janjiang.
12 Mingka antekamma bateku lakkulle kalengku ampisangi anne tanggung jawa’ kammaya battala’na, untu’ ampa’le’baki sikontu urusannu ngaseng.
13 Pilemi battu ri massing sukua siapa are jaina tu bura’ne cara’de’, niaka pangalamanna siagang niaka pammahanna, sollanna kuangkaki ke’nanga a’jari pamimping mae ri kau.
14 Anjo usulangku nutarima bajiki.
15 Lanri kammana minjo nabattu ri sikamma anjo pamimping le’baka nupile, nia’mo siapa are jaina tucara’de’ siagang tuniaka pangalamanna kualle nampa kuangka’ untu’ angkapalaiko. Nia’ siapa are nipa’jari pamimping mae ri sisa’bua tau, nia’ a’jari pamimping mae ri sibilangngang tau, siagang nia’ todong a’jari pamimping mae ri sampulo tau. Nia’ tommo kuangka’ siapa are pamimping maraeng untu’ angngurusuki massing suku-sukunu.
16 Anjo wattua kusarei ke’nanga tugasa’ kamma anne: Parhatikangi passisala-salang niaka ammumba ri tangnga-tangngana bansanu. Sarei ke’nanga kaputusang adele’, baji ri kara-kara niaka ri tau julu bansanu kammayatompa niaka ri bansa maraeng ammantanga ri alla’nu.
17 Takkulleai battala’ siali kaputusannu; musti nupasangkamma-kamma ngasengi taua punna nuadeli, manna pole inai teako pasimmara’-maraengi. Teako mallakki manna pole ri nai, nasaba’ anjo kaputusang nupattantua iamintu kaputusang battu ri Allata’ala. Punna nia’ parkara battala’ dudui nusa’ring, erangi mae ri nakke, sollanna inakke antappuki.
18 Anjo wattua lakuajara’ tommako ri passala’na apa mustia nugaukang mae ri sikamma apa-apa maraenga."
19 "Nampa situru’ parentaNa Karaeng Allata’alata, nibokoimi Moncong Sinai nampa a’jappaki’ ri parang lompoa siagang sannaka heba’na mange ri daera monconna tu Amori. Ri wattunta battu mange ri Kades-Barnea,
20 kukanamo: Kamma-kamma anne battu mako mae ri daera monconna tu Amori, butta Napassareanga Karaeng Allata’alata siagang Allata’alana boe-boeta mae ri katte. Ciniki anjo butta niaka ri dallekannu. A’lampa mako mange ampammantangngi sangkamma Naparentakanga Batara. Teako bata-batai yareka teako mallakki.
21 (1:20)
22 Mingka battu ngasengko mae ri nakke angkana, ‘Bajikangngangi punna nia’ siapa are tau nisuro a’jappa riolo untu’ ansalidiki anjo pa’rasanganga sollanna akkulleki’ napauang angkanaya agang kereanga musti niolo siagang antekamma kaadaanna anjo kota-kota lanibattuia.’
23 Anjo usulanga kusitujui. Lanri kammana anjo kupileimi sampulo anrua tau, tasse’re battu ri massing sukua.
24 Antama’mi ke’nanga ri anjo daera monconga sa’genna Ka’bung Eskol bellana, nampa a’la’ba’ ke’nanga anjappai.
25 Manna ammotere’ ke’nanga mae ri katte angngerang rappo-rappoang nagappaya ke’nanga anjoreng, siagang nalaporo’mi angkanaya anjo pa’rasangang laNapassareanga Karaeng Allata’alata teai sipato’ copponna buttana.
26 Mingka nutumpaki parentaNa Karaeng Allata’alanu, siagang taerokako ampantamakki anjo pa’rasanganga.
27 A’moro-moroko angkana, ‘Birisiki Batara mae ri katte. Jari Naerang maki’ assulu’ battu ri Mesir untu’ laNapassareang mae ri tu Amori, sollanna nabunoki’ ke’nanga.
28 Jari apa matu-matunta mange anjoreng? Anjo tau nikiringa mange anjoreng napakamalla’ maki’ lanri nalaporo’na ke’nanga angkana anjo bansa niaka anjoreng la’bi kassakangngangi siagang la’bi baraniangngangi na ikatte, kammayatompa lalangi ke’nanga ammantang ri kota-kota nikallika tembo’ kammaya langi’ tinggina. Acciniki ke’nanga rassasa anjoreng!’
29 Mingka kukanamo: Teako mallakki mae ri anjo taua.
30 Karaeng Allata’alanu lampimpingko siagang labarjuang untu’ ikau sangkamma le’baka nucini’ Nagaukang ri Mesir,
31 siagang ri parang lompoa. Nuciniki antekamma bateNa Karaeng Allata’alanu angngerangko siagang salama’ lalang siapa bellana anjo pa’jappannu sa’genna mae anrinni, tena le’ba’ sisalana se’rea mangge angkalawingi ana’na.
32 Mingka manna pole akkana kammama’, tena tongija nuero’ tappa’ mae ri Karaeng, Allata’alanu,
33 Ia niaka a’jappa ri dallekannu ampa’boyangko tampa’ untu’ akkema. Ia anjo’jokangko oloang punna bangngi lalang rupa benteng pepe’, siagang a’rupa benteng rammang punna allo."
34 "Nalangngereki Batara kunrarennu sa’genna a’jari larro. Assumpai angkana,
35 ‘Tena manna sitau battu ri anne tau ja’dala’ kammaya lakkulle antama’ ri pa’rasangang coppong Kupa’janjianga mae ri boe-boenu.
36 I Kalebji bawang, ana’na Yefune lantama’, lanri tuli majarre’na tappa’na mae ri Nakke. LaKupassareangi mae ri Kaleb siagang jari-jarina anjo pa’rasangang le’baka a’la’ba’ najappai.’
37 Passabakkang ikau ngaseng tommi Nalarro Batara mae ri nakke siagang Nakana, ‘Musa, manna ikau tena todong nukkulle antama’ ri anjo pa’rasanganga.
38 Mingka pakajarreki nyawana pambantunu, iamintu Yosua ana’na Nun. Iami lampimpingi tu Israel langngallei anjo buttaya.’
39 Nampa Nakana Batara mae ri katte ngaseng, ‘Sikamma ana’-ana’nu ca’di dudua ija, tenayapa nakkulle angngassengi nikanaya baji’ yareka ja’dala’, nukanaya lanirampasa’ ri musu-musunnu, iaminjo ke’nanga ana’-ana’ kammaya laKusareang anjo buttaya, siagang iaminjo ke’nanga lampammantangngi.
40 Mingka ikau ngaseng, ammotere’ mako mange ri parang lompoa ammalo ri agang mangea ri biring Tamparanna Akaba.’
41 Appiali mako angkana, ‘Musa, dorakami ikambe mae ri Batara. Mingka kamma-kamma anne eroki ikambe maju mange a’bundu’ situru’ Naparentakanga Batara, Allata’alata.’ Nampa massing apparuru ngaseng mako untu’ mange a’bundu’, lanri nupa’gampangangi mangea ambunduki anjo daera monconga.
42 Mingka Nakana Batara mae ri nakke, ‘Teako lappassangi ke’nanga a’lampa mange a’bundu’, lanri tena nalaKururungang ke’nanga; nibetai ke’nanga sallang ri musunna.’
43 Kupabattumi anjo kananNa Batara mae ri kau ngaseng, mingka tena nanujampangi. Nutumpaki parentaNa Batara; attampo-tampo mako a’lampa mange ri anjo daera buluka.
44 Nampa assulu’mo tu Amori niaka ammantang ri anjo daera monconga untu’ angngewako. Anjo ke’nanga teai sipato’ jaina, sanrapangi bania jaina. Naondang mako sa’genna mae ri Horma bellana, nampa nibetako ri ke’nanga ri daera moncong Edom.
45 Nampa ammotere’ mako siagang akkio’ mako appala’ tulung ri Batara; mingka taerokai Batara ampilangngeriko yareka amparhatikangko."
46 "Le’baki anjo ammantang maki’ ri Kades teai sipato’ sallona.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA