Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Isi kitap enda eme kata-kata Musa man bangsa Israel sanga kalak enda i taneh si mesawang arah Timur Lau Jordan. I bas paksa si e bangsa Israel sangana i Baluren Jordan deher Sup, kelang-kelang kota Paran ras kota Topel, Laban, Haserot ras Disahab.
2 (Sepulu sada wari dekahna erdalan i Deleng Sinai nari ku Kades Barnea mentasi deleng-deleng negeri Edom.)
3 I bas wari pemena bulan sepulu sada, tahun peempat puluhken kenca bangsa Israel nadingken Mesir, ituriken Musa me kerina kai si man turinken man bangsa Israel, bagi si iperentahken TUHAN man bana.
4 Si enda jadi kenca italuken TUHAN si Sihon eme raja bangsa Amori si erkuasa i kota Hesbon bage pe Raja Og i Basan nari si erkuasa i kota-kota Astarot ras Edrei.
5 Sanga bangsa Israel i Timur Jordan, i bas daerah Moap, ibenaken Musa me nerangken undang-undang Dibata ras ajaren-AjarenNa. Nina Musa,
6 "Sanga kita i Deleng Sinai nina TUHAN Dibatanta man banta, 'Nggo ndekah kam tading i Deleng Sinai enda.
7 Tangtangi kemahndu, teruskenlah perdalanenndu. Laweslah ku deleng-deleng bangsa Amori ras ku kerina daerah-daerah sekelewetna, eme Baluren Jordan, ku uruk-uruk ras berneh-berneh kempak daerah Selatan ras ku tepi Lawit Tengah. Laweslah ku negeri Kanaan, terus ku lepar deleng-deleng Libanon seh ku Lau Eprat si mbelin e.
8 Aku, TUHAN nggo erpadan mereken kerina taneh e man nini-ninindu Abraham, Isak, Jakup, ras man sinursurna. To ingani taneh e.'"
9 Nina Musa man bangsa Israel, "Sanga kita i Deleng Sinai denga kukataken man bandu, 'Mberatca tanggung jawabku adi aku saja ngenca minpin kam. La terdalanken aku sisada.
10 Nggo ijadiken TUHAN Dibatandu kam bali ras bintang-bintang i langit teremna.
11 Mbera-mbera TUHAN, Dibata nini-ninindu nambahi kam seribu kali lipat nari, janah malem atendu IbahanNa bagi IpadankenNa.
12 Tapi uga ningku sisada mersansa tanggung jawab si mberat guna ndameken pekarandu.
13 Emaka pilihilah piga-piga kalak i bas tep-tep sukundu nari si bujur, beluh, erpengalamen gelah kuangkat ia jadi pengulundu.'
14 Payo akapndu maka eme cara si mejilena.
15 Emaka kuangkat kalak si bujur ras erpengalamen si ipilihndu i bas tep-tep suku nari jadi pengulu-pengulundu. Lit si ertanggung jawab guna seribu kalak, guna seratus kalak, guna lima puluh kalak, guna sepuluh kalak. Pegawai man suku-suku pe kuangkat.
16 I bas paksa si e kuperentahken man pengulu-pengulu e, 'Perdiateken lah pekara si turah i tengah-tengah bangsandu. Timbanglah tep-tep pekara alu bujur, subuk kerna sukundu jine ntah pe kerna bangsa si deban si tading ras kam.
17 Ula kam rayo-ayo i bas keputusenndu; seri lah pengidahndu i bas ngadili tep-tep kalak, subuk ise pe kalakna. Ula kam mbiar man ise pe, sabap keputusen si ibahanndu i bas Dibata nari kap rehna. Pekara si la terputuskenndu endesken lah man bangku maka kuputusken.'
18 I bas paksa e ka pe kuperentahken ka nge kai si patut ibahanndu."
19 "Nggo silakoken perentah TUHAN Dibatanta. Sitadingken Deleng Sinai, sidalani gurun pasir si mbelang. Melala kebiaren i tengah dalan sanga kita ku deleng-deleng negeri bangsa Amori. Kenca kita seh i Kades Barnea,
20 ningku man bandu: Nggo kap kam seh ku deleng-deleng negeri Amori, si ibereken TUHAN Dibatanta man banta. Nehenlah, negeri e nggo iendesken TUHAN Dibatandu man bandu. To ingani lah negeri e, sue ras si iperentahken TUHAN Dibata nini-ninindu man bandu. Ula mbiar ras ula aru atendu.
21 (Ul 1:20)
22 Tapi reh kam ndahi aku nindu, 'Madin sisuruh lebe piga-piga kalak ngenensa maka banci ikatakenna man banta dalan si mejilena, ntah kota si uga kin lit i je.'
23 Teridah maka mehuli perukuren e. Emaka kupilih sepulu dua kalak, sekalak i bas tep-tep suku nari.
24 Lawes kalak enda ku deleng-deleng e, seh pe ku berneh-berneh Eskol, emaka iselidikina.
25 Ibuatna piga-piga buah man pangan, ibabana e mulih man banta, janah ilaporkenna, maka tuhu mehumur taneh si ibereken TUHAN Dibatanta e.
26 Tapi mberontak kam man perentah TUHAN Dibata, la kam nggit ku je.
27 Jungut-jungut kam sapih-sapih kam i bas kemah-kemahndu nindu, 'Segat ate TUHAN ngenen kita; emaka ibabana kita ndarat i Mesir nari, guna ngendesken kita man bangsa Amori maka ibunuhna kita.
28 Kai gunana kita ku jah? Mbiar kita. Nina kalak si isuruh kita e, maka gegehen kalak ah ndai asang kita, gedangen ia asang kita. Ia pe ringan i bas kota-kota si bentengna seh ku langit. Raksasa kap si idahna i jah!'
29 Tapi ningku man bandu, 'Ula mbiar man bangsa e.
30 TUHAN Dibatandu si mabai kam. Ia pagi erperang guna kam, bali ras si nggo idahndu IlakokenNa i Mesir
31 ras i gurun pasir mbarenda. Nggo idahndu uga ia maba kam gedang-gedang dalan seh ku ingan enda alu selamat bali ras sekalak bapa maba anakna.'
32 Tapi kai pe ningku, lalap kam la tek man TUHAN Dibatandu,
33 aminna gia lalap Ia erdalan arah lebendu tupung kam ndarami inganndu erkemah. Adi berngi, Ia erdalan arah lebendu i bas binangun api, janah suari i bas binangun embun guna nuduhken dalan man bandu."
34 "Ibegi TUHAN kam jungut-jungut emaka merawa ia. Ersumpah Ia nina,
35 'Kam angkaten si jahat enda la lit sekalak pe banci bengket ku negeri si mehumur si nggo Kupadanken man nini-ninindu.
36 Kalep anak Jepune ngenca bengket. Ia tetap patuh man bangKu, emaka Kubereken man bana ras man sinursurna taneh si nggo isiarina e.'
37 Erkiteken kam, aku pe itembehi TUHAN nina, 'Kam pe la banci bengket ku negeri e, Musa.
38 Tapi pegegehilah ukur juak-juakndu si Josua anak Nun. Ia si naruhken bangsa Israel bengket ngingani taneh e.'
39 Kenca bage nina TUHAN man banta kerina, 'Anak-anakndu si kitik denga, si langa meteh bujur ras salah, si nindu jadi tabanen musuh-musuhndu pagi, ia nge pagi mengketi negeri e. Kubereken negeri e man bana, gelah inganina.
40 Adi kam, erkusurlah, mulihkenlah erdalan ku gurun pasir ngikuti dalan kempak Teluk Akaba.'"
41 "Nindu njabapsa i bas paksa si e, 'Nggo kami erdosa man TUHAN o Musa. Bage gia iperang kami ate kami negeri e genduari bagi si iperentahken TUHAN Dibatanta.' Erkiteken si e ersikap kam kerina erperang, sabap iakapndu mesunah naluken negeri si erdeleng-deleng e.
42 Tapi nina TUHAN man bangku, 'Persingeti lah kalak enda maka ula iperangna, sabap Aku labo ras ia, ula kari ia italuken musuh-musuhna.'
43 Kukataken man bandu kai si ikataken TUHAN, tapi la diatendu. Ilawanndu TUHAN, janah alu ukur meganjang erbaris kam lawes ku negeri si erdeleng-deleng e.
44 Emaka luar bangsa Amori si ngiani uruk-uruk e, iserangna kam. Nterem kal ia, bali ras wani. Iayak-ayakna kam seh ku Horma, janah italukenna i deleng-deleng negeri Edom.
45 Nderkuh kam mindo penampat man TUHAN, tapi la kam ibegiken TUHAN ras la DiateNa pe.
46 Eme sabapna maka bage dekahna kam tading i Kades."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA