Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dangga sug maman mamdoc ebdebin an Krisdus dag ginohob, kaba, sesar men gogom emeb naugb maman toua deitero. Doba Allah eic gesgigouhwesa dou maman ucugb ogdoc Krisdus men geicara taiba sogo salib naugb mamanohob. Hang maman mamedag Allah men moc toua deitero, doba maman madag hom dara en namcir.
2 Anai sug maman mamdoc ebdebin an Krisdus dag ginohob, kaba, en ahwan maman aud Allah ogdoc maman geicara gini naugb en eic areg geigouhw aingma aingma dou maman toua, aimo dau sug en medoc eigouhw an mamanohob. Dara en emarges dau gin touwero, doba en eicara baimo dag gini an maman toua terimda. Dangga hang, maman mamdoc agahugouhw medam an en namcir. Anai maman macinaga dau sug en eicara dag gin an mamanohob, kaba, dag en emogugwo men gogouf cucugb ingma se lona daiyamo gacin dou maman toues.
3 Dara gin dousero. Doba sug maman maimo ucina mog erij icira Krisdus gin, kaba, maman mamdoc momogo dau gin touwero. Doba maman magahugouhw naugb gin toua namcir. Anai maman macinaga dau sug maman maimo ucina gin, kaba, eic dag maman mamdoc aiyansem dougwo areg gecgu terimda.
4 Dara sug maman mamdoc aiyansem dougwo areg gecguohob, kaba, eic dag Allah eigdoumesa maman mamoho an gin deseino en. Dara sug en eigdoumesa maman mamoho deseino enohob, kaba, eic dag maman macinaga dag areg en os dou mamanohob, kaba, en emeic augwan dou maman toues.
5 Dara sug maman macinaga dag areg Allah os dou mamanohob. Hanoba en emdeic dou maman toua, kaba, igdebes emeba maman se lona ingga touwero. Doba maman mamdoc ebtou namcir. Anai en esa Mena Gogoufu dag mogud se maman mamdoc mes naugb en ens dou maman dag Allah medoc gororougb maman medamohob.
6 Dangga sug lona edagasohob, kaba, en esa Yesus se cinogo gini. Dauntoba en omom taiba sogo salib naugb leng merug mog maman maugwan toua. Anai maman goubesa ingma naugb sug maman maimo areg geigouhw, kaba, ingmaro. Doba maman mamdoc dag omomtom namcir naugb sug maman maimo areg gecgu mogud terimda.
7 Augwan gini ens ainyes dou maman dag Allah medoc gororougb maman dag misen namcirohob. Anai ogom medam naugb lusud leperwei sud hom en mohw aud gomom sug en aimo areg asesa Allah enin medoc mes augwan namcirohob. Dara gareg en medoc edag beim an lusud, kaba, lusud leinyana lemohw len merugt edug aud gomom naugb en touwero. Doba sud hom yom eng eicara dag gin naugb en dous.
8 Doba Allah ens medoc mes ainyes dou maman dag en medoc gororougb maman namcirohob. Anai en esa Krisdus bomom taiba sogo salib sug maman maimo areg gedag beim ginero. Doba en esa en aud maman naugb gini sug maman mabesesaraba.
9 Dangga sug Krisdus omom taiba sogo salib edeinyum naugb sug Allah eic gesgigouhwesa dou maman ucugwohob, kaba, men geicara gini edeinyum naugb sug en eigdoc maman dau Allah men gogom areg en esedeb naugb lusud se Lona Gouwedoc gin toua namcir.
10 Anai sug nosa, kaba, maman madag Allah men moc namcir. Doba sug en Meisi omom taiba sogo salib naugb maman sesar dag ginohob, kaba, Allah eigdoumesa maman mamoho dag en mesir misen deit. Dangga sug Krisdus men gomom gini eic dag maman madag Allah en mesir dag ginohob, kaba, Krisdus men geicara edreg dau gin deit naugb sug en eigdoc maman dau sesar men gogom aud maireseb menau geb huhugb gin toua. Anai en eisa dau gomom ucugb naugb maman touohob.
11 Dara gin dousero. Doba sug Allah eigdoumesa maman mamoho dag en mesir misen ogdoc maman Adehsud Yesus Krisdus men geicara dag ginohob, kaba, eic dag maman mamdoc momogo toua deitero. Doba maman magahugouhw an en toua terimda.
12 Dangga hang, sesar, kaba, einesa cinogo gini ogdoc sud hom men geicara dous. Dara sesar gin, kaba, oho gomom, hanoba agaha becinten lusud laugwan. Anai len laugwan lebesesar touohob.
13 Doba dagiro eisaugb lusud gedig len merireseb sug Allah emeic men gomnomna ogdoc Musa dou leng Israelbuma? Len toua lebesesarohobei? Era, naroei? Anai sug gomnomna hom emeb naugb lusudero, kaba, Allah emecic meren geicara emadedim dag sesar naugb en emeic gomom dou len icira gin touwero, doba en amsoho len namcirda?
14 Naro, len laugwan toua lebesesarohob. Doba meren sesar susugb dau Adam men sesar gini. Anai Adam gin, kaba, en edreg sug Allah arougb en an ara ara dau enin mersohob. Doba len graga, kaba, len ledreg Allah men gomnomna geb se len merdoc mes gin dous. Hang ebiji dau Adam mehir, terimda edebeij lona sug Allah eic men gomnomna ogdoc Musa dou leng Israel, kaba, gomom oiharaga lusud gedig meren sesar susugb dau Adam men sesar len laugwan gin touohob. Dangga eisaugb men geicara hom gin, kaba, Adam dag aimeh eisaugb Krisdus gedig Allah esedeb en naugb en eperwei Adam en mohw an men geicara gin toua.
15 Doba areg Allah eic dag mogud dou maman ogdoc Krisdus men geicara hom, dara areg eb naugb maman ogdoc Adam men sesar hom gin, kaba, hwas aninimero, doba susugb namcir. Anai Adam men sesar hom gin, kaba, eic dag lusud laugwan lomom icira men sesar hom gini, anai len laugwan laimo en aud ginohob. Doba Yesus men geicara geigouhw hom taiba sogo salib gin, kaba, eic dag Allah medoc eineg an maman medam bedreg ucugb naugb sug en eigdoc maman dau gomom. Hanoba en eic gesgigouhwesa dag mogud ucugb dou maman ogdoc sud hom misen, moho Yesus Krisdus, en medoc an maman gin touohob.
16 Dara areg Allah eic dag mogud dou maman gin, kaba, men mera aninim dag sud hom moho Adam men sesar gin touwero. Doba susugb namcir toua. Anai men sesar hom gin, kaba, edeinyum naugb sug Allah ogod aremer gomom deb naugb enohob. Doba sug Allah eic gesgigouhwesa dou maman ucugb gin, kaba, en emaigdougwo maman sesar hom dousero. Doba en aigdougwo maman sesar augwan dag mogud ediyebeiya dau maman namcir. Anai Yesus Krisdus en medoc an maman. Hang en emohw en mougt edug bomom taiba sogo salib naugb maman sesar gin touohob.
17 Dangga toua, sug sud hom, moho Adam, en ebesesar mougwa hom dag ginohob, kaba, eic dag gomom ebiji naugb sug en oiharaga lusud laugwan ogdoc men geicara gecgu hom gin toua. Doba sug sud hom misen, moho Yesus Krisdus, en omom taiba sogo salib naugb maman sesar dag ginohob, kaba, eic dag Allah esedeb maman naugb sug maman madag mougt mera desij Krisdus se cinogo gini sug en ecicugwen gin toua. Anai men geicara geigouhw hom gin, kaba, eic dag Allah en medoc medam gougwa an mamanohob. Hang gomom emedag mougt naugb maman toua deitero. Doba Allah eigdoc maman dau gomom men goubesa naugb en eic gesgigouhwesa dag mogud dou maman deitohob.
18 Dangga hang, Adam men sesar hom gin, kaba, eic dag Allah ogod aremer gomom deinaugb lusud maman maugwanohob. Doba Krisdus men geicara geigouhw hom taiba sogo salib gin, kaba, eic dag maman mamedag sesar men sogougb deitero. Doba en esga maman maugwan dau sesar men gogom aud maireseb menau geb huhugb ginohob. Anai Krisdus gin, kaba, en emedreg areg asesa Allah enin medoc mes augwan mougwa hom touwero. Doba en aimo areg Allah arougb en an gini naugb en eic en mogwihi bauwaharo aga maman dou Allah naugb maman sesar ginohob.
19 Dangga sug Allah owun maman maugwan mamoho dag maman mabesesar an en ogdoc sug sud hom moho Adam en edreg en mer dag ginohob, kaba, en eic gesgigouhwesa ogdoc sud hom moho Krisdus men geicara dou maman maugwan toua. Anai Krisdus gin, kaba, en emedreg Allah en mer mougwa hom touwero. Doba en owun enin medoc mes arjaga naugb en aimo areg Allah arougb en an gini augwan namcirohob.
20 Sug Allah eic gesgigouhwesa ogdoc Krisdus men geicara dou maman dous, kaba, en eic men gomnomna ogdoc Musa naugb ara dou maman deita? En eic men gomnomna dou maman dauntoba maman macinaga dag maman madreg Allah men gomnomna mougwa einyanohob. Anai sug maman mauman dau en mer gin, kaba, maman mamaimo touwero. Doba sesar men goubesa ederougb maman naugb sug maman madreg dau men gomnomna gini beiseisaugb bedreg namcir deit. Doba sug maman mabesesar edreg dag gin terimda, kaba, Allah en toua medoc eineg an maman edreg dau gin beiseisaugb namcir toua.
21 Dangga hang, areg dan den dou yen gin, kaba, men meijouhw dag gini: Sug nosa, kaba, gomom oiharaga maman namcir, anai maman maugwan mabesesarohob. Doba sug Allah en medoc geineg an maman gini oiharaga mamanohob, kaba, gomom men goubesa emoiharaga maman toua deitero. Doba en medoc geineg an maman gin, kaba, ahwan maman aud maireseb menau geb huhugb ogdoc maman Adehsud Yesus Krisdus men geicara naugb maman gin dous. Anai sug en omom taiba sogo salib naugb maman sesar dag gin, kaba, Allah eic gesgigouhwesa dou maman ucugb touohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA