Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku tau inau' matu ratnan anu, idi tau ngalap pedo' dengan Allah ngaceku Tuhan tau Yésus Keristus.
2 Idi ratnan Yésus Keristus tau sinima' semuet ngaceku anu bang katu ineh luk inan tau miak mulun. Idi tau mawang niat ngaceku merapet ngalap babpat bang rayeh Allah.
3 Idi teh tau mawang niat bang luk medereh pana', ngaceku tau kali' idi dereh ineh ngacing ulai niat,
4 idi ulai niat ineh ngacing niat luk meraben, idi niat luk meraben ineh ngacing inan rapet,
5 idi rapet ineh na miak maré migu', ngaceku awa Allah pangeh inutang bang niat tau ratnan Roh Meligan luk biré kuan tau.
6 Ngaceku kareb tau melaya' teh, idi Keristus naté ngaceku lun mesala' bang kareb luk litep Allah.
7 Ngaceku pawa' lemulun luk sikal maté ngaceku lun luk matu, kian, ngaceku lun luk do' miak selemulun mekuu' maté lek.
8 Iamo' Allah pangeh nengegala' awaNeh kuan tau, ngaceku Keristus naté kuan tau, kareb tau pa liang ukum sala'.
9 Idi nekini ngaceku tau inau' matu ratnan dara'Neh, meluun teh tau puatin ratnan useh Allah ngaceku Ieh.
10 Atun tau mangun ku bunu' Allah, idi tau nengalap pedo' denganNeh ngaceku até AnakNeh. Ngaceku tau mangun ku rurum Allah, na miak na tau uen ngulun ngaceku ulun Keristus.
11 Baken kudeng ineh mo', iamo' tau mawang niat inan Allah ngaceku tau mangun ku lun rurumNeh ngaceku Tuhan tau Yésus Keristus.
12 Sala' nacing bang tana' ini ratnan seburur lemulun, idi sala'neh ineh ngacing até. Ratnan luk kudeng ineh até ineh nepinul kuan amung lemulun, ngaceku amung lemulun nenganau' sala'.
13 Kareb nateh Ukum biré, inan sala' bang tana' ini, iamo' iapeh-iapeh na inan ukum, sala' pana' na iapin.
14 Iamo' até ineh nengime amung lemulun rat kareb Adam macing kareb Musa, sagan pana' sala'deh baken ngelaba ukum Allah mepad kudeng Adam. Adam mangun ku luk pinginud Yésus luk sikal macing ineh.
15 Iamo' katu Allah idi sala' Adam na mepad, ngaceku mado arang luk dueh ini. Matu mula' lemulun naté ngaceku sala' seburur lemulun ineh. Iamo' katu Allah meluun rayeh. Kudeng ineh teh baré Allah kuan mula' lemulun, ngaceku katu seburur lemulun, ieh ineh Yésus Keristus.
16 Mado arang baré Allah dengan sala' lemulun. Aceh sala' nengacing ukum "Mesala'"; iamo' pangeh sala' luk mula' ineh, kebala Allah luk mekatu ineh, "Lemulun ineh ruen matu peh."
17 Matu dengan sala' seburur, até pangeh mangun ku raca' ngaceku ratnan seburur lemulun ineh. Iamo' meluun rayeh ulekneh luk inau' Seburur Lemulun, ieh ineh Yésus Keristus. Anid-anid lemulun luk ngalap katu Allah luk mela ineh, idi baréNeh, ieh ineh luk matu, miak mulun idi ngimet ngaceku ratnan Keristus.
18 Ngaceku ineh mepad kudeng ratnan aceh sala', amung-amung lemulun mekaneh ukum, kudeng ineh teh ratnan aceh kekamen luk matu ineh, amung-amung lemulun ruen matu peh, pad ngalap ulun.
19 Ngaceku mepad kudeng ratnan seburur luk na maya' bala, lemulun luk mula' mangun ku lun mesala', kudeng ineh teh ratnan Seburur Lemulun luk maya' ukum, idi lemulun luk mula' mangun ku lun matu peh.
20 Idi Ukum ineh biré, pad sala' ineh amé' mula'; iamo' iapeh-iapeh sala' pangeh amé' mula', déi' teh katu Allah mela peh.
21 Mepad kudeng sala' mangun ku raca' bang até, kudeng ineh teh katu Allah miak mangun ku raca' ratnan luk matu macing inan ulun luk meruked, ngaceku Yésus Keristus Tuhan tau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA