Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tana'a kita noyodamedon bui takin i Allah, sing kita im mopirisaya. Tuamai koligai baí mobiag ing kita kom bonu in dodamean takin i Allah inta podoyon kom pirisaya naton ko'i Tuhan naton ki Yesus Kristus.
2 Lantaran kita mopirisaya ko'i Yesus, daí inogoian-Nya ing kasampatan kita motarima kon tabi i Allah, bo totabi tatua im mokobiag ko'i naton tana'a makow. Tuamai moḷunganga totok ing gina naton, sin oyuíon in harapan naton mokoaílami kong kobiagan mopia inta inogoi i Allah!
3 De'emanbií doman tongaí tua, moḷungangabií doman ing gina naton aka kita bo koaíntugan in roriga, sing kota'auan bidon naton kon roriga tatua im mokopomukaíbií kon ibog mogaid totu-totu'u.
4 Ibog mogaid totu-totu'u tua mokopobalií kon intau monahang kon totungkuḷ; bo soaáḷ tana'a inta mokopomukaí kon harapan.
5 Bo harapan naí tana'a diaíbií mokokecewa ko'i naton, sing gina naton ain notarima kon totabi i Allah. Tua inaidan i Allah pinopotonsigad kon Roho-Nya inta ain inogoi ko'i naton.
6 Wakutu ing kita diaídon kodaya, ki Kristus pinokurbandon sing kopontingan naton wakutu inta nopas inta ain sinantuí i Allah; padahaḷ kita in intau mita inta noyayuk nongkon i Allah.
7 Sin diaíbií mogampang motayak kon intau inta mo'ibog matoi umpakahbií kopontingan i intau inta mobanar. Tongaí degaí aka kon intau inta mopia, daí oyuíon intau mobarani matoi.
8 Ta'e ki Allah noponyatadon in tabi-Nya ko'i naton, wakutu ing ki Kristus pinokurban sing kopontingan naton, wakutu ing kita binaradosapa.
9 Masa in na'a kita noyodamedon bui takin i Allah inta pinongin kinopatoian i Kristus. Manangka intua nopastibií kom posaḷamatonbií i Kristus ing kita nongkon hukuman i Allah.
10 Si wakutupa in nobalií saturu i Allah ing kita, kita pinoyodamedon takin-Nya inta pinopotonsigad kong kinopatoian i Adií-Nya, apa doman tana'a naonda in hubungan naton takin i Allah notompiadon bui, tantuí kita im posaḷamatonbií doman bui pongin kobiagan i Kristus.
11 Bo de'emanbií tongaí tua, ta'e moḷungangadon totok ing gina naton kong kopopia ing gina i Allah inta pinopotonsigad ko'i Yesus Kristus ki Tuhan naton. Sim pinongin i Kristus tuata, daí tana'a makow kita mokoaílami kon hubungan naton inta mopia takin i Allah.
12 Dosa sinumu'ot kon dunia na'a nongin intau tobatuí, bo nongkon dosa tatua nomukaí domandon im popatoi. Akibatnya popatoi tatua no'ibaya-bayakdon makow kom bayongan intau, sim bayongan intau nogaid domandon kon dosa.
13 Si wakutu hukum in agama Yahudi na'a diaípa, dosa koyongan bidon oyuíon kon dunia na'a. Ta'e diaípabií irekengmai sin diaípa in hukum i Musa.
14 Ta'e umpakah natua popatoi in nongawasa bidon kom bayongan intau nongkon sempo i Adam dapot kon sempo i Musa. Umpakahbií intau mita diaí nogaid kon taḷaí naí inta inaidan i Adam, ta'e mosia in no'itakin bidon kinawasa'an im popatoi. Ki Adam tua ing gambaranbií i-Nia inta mo'iangoi kon singgai mo'iduduimai.
15 Tongaí diaíbií notongkai in taya dua. Sin totabibií i Allah im moḷobe-ḷoben aka poyobandingonmai in taḷaí inta pinomia i Adam. Sin taḷaí intau tobatuí nokopopisií kon nobayong intau minatoi. Ta'e moḷobe-ḷobenbií doman kon tua in akibat in totabi i Allah bo hadiah kasaḷamatan inta inogoi-Nya kom modamaḷ in intau, inta pinongin kopopia ing gina in tobatuí intau, tuata ing ki Kristus.
16 Totabi i Allah tua im moḷobe-ḷobenbií totok kon dosa in intau tobatuí. Sin naonda intau tobatuí nogaid kon inta no'itaḷaí, pinoḷuai domandon im pones: "Kotaḷaí." Ta'e naonda in nobayongdon intau nogaid kon dosa, namangoi domandon in hadiah nongkon i Allah inta noguman: "Diaí Kotaḷaí."
17 Lantaran taḷaí intau tobatuí daí bayongan intau kinawasa'an domandon im popatoi inta nongin intau tobatuí tua. Ta'e mo'iliubií domandon nongkon tua in akibat nongkon onu inaidan in tobatuí intau ibanea, tuata ing ki Kristus. Pinongin i-Nia tua, ki Allah nobogoi in totabi-Nya inta totok im moḷoben kon intau mobayong, bo tongaíbií pinonotabi-Nya ko'i monia, sahingga mosia noyodamedon bui takin i Allah; mosia im mongawasa kon dunia na'a pongin i Kristus.
18 Tuamai, naí doman taḷaí intau tobatuí nokopopisií kom bayongan intau i hukum, natua doman aid in intau tobatuí inta motoindudui ko'i Allah, nokopobalií kom bayongan intau pinilatandon nongkon taḷaí monia bo inogoiandon ing kobiagan.
19 Daí notongkai doman in na'a, bayongan intau nobalií binaradosa lantaran intau tobatuí inta diaí motoindudui. Naí doman tua mobayong intau inogoian ing kasampatan moyodame bui takin i Allah lantaran intau tobatuí inta motoindudui ko'i Allah.
20 Naonda in oyuíon hukum i Musa, polanggaran lebedon mobayong, ta'e naonda ing koḷoben-koḷoben in dosa, yo tabi i Allah ing kodugang-kodugang domandon in ḷobennya ko'i monia.
21 Kita na'a im mustibií matoi lantaran nogaid domandon kon dosa. Ta'e ki Allah in notabibií ko'i naton bo nobogoi in daḷan ko'i naton kom moyodame bui takin-Nya. Bo lantaran hubungan naton takin i Allah notompiadon bui, daí Sia in nobogoi domandon ing kobiagan mo'itutui bo inta mononoi ko'i naton inta pinongin i Yesus Kristus, ki Tuhan naton.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA