Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nebeinye eyae Wali Ondofolo Naei a elelere hila rabo halaenne yae Allah aere wali himalainyeboke ro miyae yae me baeumene, Allah bele foi nekande.
2 Yesus Wali Ondofolo Naei a elelere hila rabo halaenne walora Allah aere kena buhae aere ban mae heume wali hubanne. Nane merau kena u rei maibe roweumehike, rabuhine ban rabo elae halaende bena ya honoifoyolene Allah yae Na nene waewae aere kelemmele.
3 Nebei aerene mo ban, nebeibe beko hubaimeyaimere kena rei mai yae haweyeume, rabuhine ban nebei beko hubamanende yae kena heraweumende Wali Ondofolole weume a huluinye mokomale naeise isaeimale.
4 Kena u heraweumende yae Wali Ondofolo weume a hului mokande wali ma nekande yae, Allah kena foise mokomanele u mekaise isaeimale. Allah kena foise mokonne u mekai ma wanen nekande yae aei rabo elae halaende Allah are nuleungekoke huluinye mokonde.
5 Allah are nuleungekoke huluinye mokondere rabo elae halemalene mehi hako ofoloi, rabuhine ban Allah Naei Roh aumeboke walora aere kena buhae emereumi yae heumere aei kena une hubannele.
6 Na helebe wamale, aei wali aloiboi sului nekewande hee, Allah meraufe raungehike ya na hului yeubokene eyae, Allahle are ei ehawei ro miyae aerene, Yesus Wali Ondofolo meufereke.
7 Yabi-yabi hele ro miyae wali himalainyeboke yo aerene herende naeise ehe konde. Na hului roko mbemba hele ro miyae u mekai foi bele mokole kiyaele aerene ro miyae mbai be rabulembonde herende.
8 Nebeibe Allah aere kena buhae hemmele naeise nda nibi yae keleumeboke: Eyae u mekai beko yae namman aeumefoke hurewande hee, Yesus Wali Ondofolore ukeunge aei aerene meufereke.
9 Wali Ondofolo na ha rileuboke yae nibi mbai mokouboke Allah yae wali himalainyeboke ro miyae yae baeume naeise isaeyaendebokene, emekai bele rabo elae halaende Allah ro miyaere ehee bukulu yemmikonde yane aere Wali Ondofolole walora hole molommebonde.
10 Rabuhine ban eyae namman Allah naei yokeijo nekewande hee Allah Naei hina fa hoi fa Yesus hereke walora Allah bele foi nekemande nibi mokoubokene, emekai bele Yesus waleuboke benen wali nekele walora aei wali hole molommende.
11 Nebei mo ban, Allah aei naeise foi mokoubokene kena u rei mai rowemmele. Aei Tuhan Wali Ondofolo, Allah bele foi nekemande nibi mbai mokouboke Kiyae, Allah aei naeise mokouboke yoni-yonire yakawoume.
12 U mekai wa mekai beko ro mbai Adam meke walora nda kani kelare meweufike. Nane merau nebei u mekai beko mokowolene Allahle waheikoke, nane merau here yae aeungefoke. Adambe u mekai beko yae mokoumiboke ro miyae nemene u mekai beko mokonatene Allah bele wahenaikonde, nane merau here yae aeumifonde.
13 Musale walora wali heere folaikoke namman eyei yae, nda kani kelana ro miyae u mekai wa mekai beko mokaimeke. Nebeibe Allah nebei heena ro miyaere me onoyoi, rabuhine ban wali heere foloukoke namman eyei nane merau asasi kaikoke naei ekeleiboi sului.
14 Allah u mekai beko mokowate ro miyae me onoyoi hororebe, Adam nekewole heera meke Musa nekewole heene ro miyae u mekai beko mokowatene Allah bele wahaeikoke nane merau heraiboke, naendae wanen horore naei u mekai beko nenaei ma Adambera. Adam wanen mbai Yesus meke heera ro miyae hiwa naei walire haraungeboke.
15 Nebeibe Allah aere ban mae ro miyae nibi neme ikeumi wali himalainyeboke ro miyae yae me baemmile naei bele Adam mae u mekai beko mokoubokene ro miyae Allah bele wahenaikonde nane merau herenate naei bele nenaei ma. Rabuhine ban ro mbai Adam mo u mekai beko mokouboke aerene, ro miyae helen Allah bele wahaeikoke nane merau herewate. Nebeibe emekai bele Allah ro miyae helende kena buhae aere ban mae hewoumi, nane merau nebei ro miyae helen naeise ro mbai Yesus Wali Ondofolo aere ban mae wali himalainyeboke yo yae me baemmile nibi neme mokouboke.
16 Benen Allah aere ban mae ro miyae ikeumi wali himalainyeboke yo yae me baeumi nibi neme naei bele Adam mae u mekai beko mokoubokene ro miyae herenate naei bele nenaei ma. Rabuhine ban Adambe me u beko mbai aerene Allah yae ro miyae naei walire hului koloumi me noyeumi. Nebeibe ro miyae helen u mekai beko mokowatera Wali Ondofolo aere ban mae wali ijen yo yae me baemmile nibi mokouboke. Nebei nibi walora Allah ro miyaere wali himalainyeboke yo yae me baemmile.
17 Naendae wanen horo Adam ro mbai ken u mekai beko mokouboke walora ro miyae nemene Allah bele waheyate nane merau hereyate, emekai bele Yesus Wali Ondofolo mbai ken walora ro miyae wali hena bona enainyehubande. Nebei wali hena bona u mekai bele nekate ro miyae Allah kena buhae aere ban mae heumilere isaeyaeibokene, Wali Ondofolo Naei a elelere hila rabo halaeinye nane merau Allah wali himalainyeboke yo yae me baeumi.
18 Nebeinye Adambe u mekai beko mokouboke yae ro miyae nanemene hele me nommiyonde wanen mbai wali hena bona u mekai hubanainyende naeise, Yesus Wali Ondofolo me u na ijen sele mokouboke yae Allah yae ro miyae wali himalainyeboke yo yae me baemmilere.
19 Allah ukeunge are Adam ehakoiboinye, ro miyae nanemene mokoumiboke u mekai beko bele yore yaeiboke. Nebei sului mbai Yesus Wali Ondofolo Allah ukeunge are hakowolene, ro miyaere mokoumiboke Allahle ro be ro yoinye wali himalainyeboke ro miyae yae baemmile.
20 Ro miyae u mekai beko emekai bele mokonate belene, Allah yae Musale walora wali heere foloukoke a ikeumi. Na bere ro miyae nanemene u mekai beko mokowatene Allah bele wahaeikoke herewate wanen mbai, nda hee Allah ro miyaere kena buhae aere ban mae heyeumi aerene na hului Wali Ondofolo Naei a elelere hila rabo halaeinye walora wali himalainyeboke yo yae me baemmile, nane merau wali hena bona u mekai enainyehubande naeise nebei u mekai beko emekai bele mokate ro miyaebe Allah na hului kena buhae aere ban mae heumi.
21 (5:20)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA