Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Malaikat An numalikisi o Sardis werehon fahet hiyag hitminon tu haharoho embemihin: Hime fanowon sabiren men suhal sabiren arimano men An seneg lahiyonen Nele tu uruk lahi. Haren turuk lahen ane An noluk. Hat fahet oluk wereg uruk angge famen wareg lahen.
2 In amin, ap war atug indi tot werehon let toho olukap tin. Haren turuk lahen ane kim hiyihimu Nikni Allah olohotma fano ane turukon misig oho wereg eleg.
3 Wene tam holtuk lit turuk latikin ane wenggel himin. Ke hareyon embeselug funggalem pikiron laruk laruhun. Hindimu holuk toho welaruhun fugmu An ap yoholiyangge waruk inap hag toho waruhuk sambil ino hapeleg toho weregma waruhuk.
4 O Sardis hat wereg ambeg ap piren enesum sabelep are reg elehon wereg. It inindimu fano perukon sum yanggowon wan teg lit An men laruk lamuhup.
5 Sa ine wereg halug sum yanggowon wan teg lit welaruhu. Suwesingga fam ununuk werehon Allah men onoluk welamuhuben it arimano ununuk ware fesuhuk fuhen Nikni Allah men Otsi malaikat men onolohotma fag toho hiyag isaruk laruhuk.
6 Ap sa isanggo wereg halug Allah hime fanowon Ele umalikisi fam urukon holtuk laruhu."
7 "Malaikat An numalikisi o Filadelfia werehon fahet hiyag hitminon tu haharoho embemihin: Daud ibam kurukon sok husuruk angge seneg Ahun fanowon inowen Ele tem toho urukon inowen tu uruk. Aren sok husuruk halug ap ekeyen labuk fug teg, Aren sok latuk halug ap ekeyen husuk fug teg.
8 Haren turuk lahen ane An noluk: Yet teg lamin, Anden sok hut haptikikmu ap ekeyen sok lat habuk fug teg. Hat huwag kuk teg angge famen Nele holtuk lit An nubahet awiya warikin fug.
9 Yet teg lamin! Ap eke setan umalikisi hambeg mon enebik waruhuk. It arimano nit Yahudi ninap uruk angge famen enele si uruk. Hat halukema ying amuhupteg ninikni uhup ulug mon enebuhukmu Anden hat Nindi hasug lahiyon fahet it onoluk aruhu.
10 An waruhukon fahet yet teg lamin ulug komo haptikikmu yet teg latikin. Ap obog toho kinangma werehon arimano wal isahup sambil har oho wal hiyahup halug Anden fano roho fet hasug laruhuk.
11 An ketiya waharuk lahireg hat haliliyangge foroho lahenon ap winonen hilahup tohon hinggik ine roho seneg laruhun.
12 Ap sa ine wereg halug Nikni Allah ibam mondabi welaruhuwen e uwag wirikon hag toho welaruhu ulug unduhuk feruk laruhuk. Nikni Allah unuk men At ibam Yerusalem keron wiruhuwon ino poholman wambik waruhuwon unuk men Ninggareg nunuk keron men at ubam haharuhuk.
13 Ap sa isanggo wereg halug Allah hime fanowon Ele umalikisi fam urukon holtuk laruhu."
14 "Malaikat An numaliki o Laodikia werehon fahet hiyag hitminon tu haharoho embemihin: Unuk te Amin werehon Ele tem toho uruk lit wene seneg Ahun inowen tu uruk. Mun angge man angge wal tibahon alem At wereg.
15 Haren turuk lahen ane An noluk: Hindimuwen inahan haruk lahen fug, sun haruk lahen fug. Inahan helenma oho fano, sun helenma oho fano.
16 Hindimuwen inahan haruk lahen fug, sun haruk lahen fug, we tot inahan haruk lahenma Nambilikmuwen suburu put tohon hag toho luko hik hiyahuk.
17 "Nanggengge anggolo werehen tung nahun welahi, an foroho lahi fuhon te wereg eleg," uruk lahen. Ari uruk lahen angge famen siyag toho wereg lit hanggengge elehon hil hupnihon habiye werehon hag toho welahenma aben hat hubahet yihi uruk. Ari roho welahenon hat hapeleg toho welahen.
18 Fano-fano angge indoken naruk eleg angge An nubam ayeg waroho wahunteg hanggengge anggolo foroho ahun hag toho welaruhun. Sum yanggowon eke An nubam onggo paloho wahunteg wan tuhunmu hinggali eleg toho habiye werehon hag toho welaruhun fug. Ahaluwe fanowon eke ayeg waroho walug hilmu umbuhunmu hil seleg aruhu.
19 Ap Nindi enesug lahiyon arimano Nele nolok toho komo eneptuk lit hiyag isaruk lahi. Hiyag isaruk lahimu har oho hindi wenggeloho ke hareyon embeselug pikiron laruk laruhun.
20 Yet Nasug lamok! An sokolma unduhuk lit sok kik turuk lahi. Nele holuhureg sok hut Nabuhuwon ino ambeg kuhukteg suburu at men An men kuroho nahuk.
21 Ap sa ine wereg halug An lehoma heriyeg lahi ambeg ar oho hur aruhu. Ari hag toho An palimu atikikteg Nikni heriyeg ambeg At men heriyeg lahi.
22 Ap sa isanggo wereg halug Allah hime fanowon Ele umalikisi fam urukon holtuk laruhu," ulug hiyag nitisi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA