Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Baugu malạekat'u jamaatẹ̌ su Sardis, bohẹko kere ini: Kai ini e tatanata wọu i Sie kụ mạnaghuang rohkẹ̌ u Mawu Ruata arěgang pitu ringangu wituing arěgang pitu e. Iạ masingkạ u apang nịkakoạ i kamene. Uade i kamene wiahẹ̌, sěmbal᷊iau kawe nate!
2 Ual᷊ingu ene, pẹ̌pětị e kụ toghasẹ e apang kụ bědang ene si kamene těntal᷊ang ene e tawe nẹ̌tate kahěngang. Ual᷊ingu Takụ kinahombangeng u apang kinoạ i kamene e, tawẹ u sarang sěmbaụ kụ deng nasukụ su těngon Duata.
3 Tangu, tahěndungeko kapia apang kụ seng nitěntiro si kamene kạngerẹ e ringangu apang kụ seng nikaringih'i kamene. Koạko ene ringangu pěmpẹ̌tobate wọu kal᷊awọu rosanu. Kereu i kamene tawe měmpẹ̌pětị, Iạ e sarung duměnta su anung kamene e mẹ̌sul᷊ungu tahatako; kụ i kamene tawe makakasingkạ u angerẹ bue tempone Iạ duměnta.
4 Kaiso su tal᷊oarang kamene su Sardis bědaweng piạ taumata kụ mětẹ̌tanudẹ̌ tadeạu pakeange tatapẹ̌ burěsi. I sire ene sarung dumal᷊eng sěngkaral᷊eng dingang-Ku dingangu pakeang mawira, batụu i sire kai su tampạ e waugu ene.
5 Baug'i sire apan nakawatạ e sarung luheěngu lakụ mawira manandụ. Areng i sire tawe Takụ dẹ̌daseng bọu Bukẹ̌ u Taumata Wiahẹ̌. Kụ su těngong Amang-Ku ringangu manga malạekat'E Iạ sarung mẹ̌sahidi u i sire kai tataghuaneng-Ku.
6 I saim makạdingihẹ̌ e, pěmpěnaungko apang kụ ipělẹ̌hengetangu Rohkẹ̌ u Ruata e suapang jamaatẹ̌ e!"
7 "Baugu malạekat'u jamaatẹ̌ su Filadelfia, bohẹko kere ini: Kai ini e tatanatan Sie kụ susi ringangu tuhasẹ̌. Kai i Sie mangangumbelẹ kakunsị kụ tẹ̌taghuaneng'i Daud; kereu topeěnge, tawẹu sarang sěngkatau makakahěping e, ringangu kereu hěpingange, tawẹu sarang sěngkatau makatope.
8 Iạ e masingkạ u apang kẹ̌koateng i kamene. Iạ masingkạ u i kamene tawe tumanịe matoghasẹ̌; i kamene semben tụtuhụ těntiro-Ku ringangu satia si Siạ. Baug'i kamene Iạ e seng něnope tukadẹ̌ sěmbaụ, kụ tawẹu sarang sěngkatau makapěhěping.
9 Pẹ̌tahěndung ini: I sai-saim makoạ taumatan setang e, manga tahakontiang kụ mạmewẹu watangenge tau Yahudi e, kaiso kawe wal᷊ine, sarun Takụ koateng sarang i sire mẹ̌suba su těngonu. Kụ i sire sarung makakasingkạ u Iạ e kụkěndag'i kamene.
10 Ual᷊ingu i kamene semben timuhụ parenta-Ku tadeạu i kamene pakal᷊aamumang, Iạ e sarung l᷊ai maněntanudẹ̌ si kamene su tempong kasasigěsạ humombang su kaguwạu dunia. Hombang ene sarung mariadi waugu ipěmanikạ patikụ umatẹ̌ su dunia e.
11 Iạ e lighạ duměnta! Lukadewe pakapia apang kụ tẹ̌taghuaneng i kamene, tadeạu tawẹu sarang sěngkatau makahampasẹ̌ bawalarẹ̌ kal᷊auntung i kamene su pẹ̌sasekẹ e.
12 I saim makawatạ e, sarun Takụ koateng kere rihi su ral᷊ungu Wal᷊en Duata-Ku Susi e, kụ i sie sarung mẹ̌tumanạ sene sarang karěngụ e. Arengu Ruata-Ku, ringangu arengu soan Duata-Ku -- e Yerusalem buhu kụ sarung matěntung bọu sorga, wọu anun Duata-Ku -- sarung Takụ bohekang su watangeng e. Kerene lai areng-Ku wuhu e sarung Takụ bohekang su watangenge.
13 I saim makạdingihẹ̌ e, pěnaungko apang kụ ilẹ̌hengetangu Rohkẹ̌ u Ruata e suapan jamaatẹ̌!"
14 "Baugu malạekatu jamaatẹ̌ su Laodikia, bohẹko kere ini: Kai ini e tatanatan Mawu Amin, Sahidi kụ satia ringangu těngadẹ̌, simbul᷊u patikụ apan niriadin Mawu Ruata.
15 Iạ masingkạ u apan nikoạ i kamene; Iạ masingkạ u i kamene wal᷊inewe matěho ringangu wal᷊inewe lai matětị. Tuhụ hinone i kamene e kai piạ u sěmbaụ bọu rarua ene!
16 Kaiso i kamene kai masal᷊umighang; matětị bal᷊ine, matěho mal᷊aing bal᷊ine. Kai ual᷊ingu ene i kamene sarun Takụ i kuẹ luaěng bọu mohong-Ku.
17 Ungkuěng i kamene, 'I kami e kalạ dingangu tawẹu tala, i kami e tawe kakawusangu apa.' Arawe i kamene wěga kawe kasigěsạ e ringangu enẹ e makạtatal᷊ěntụ kakakoạ i kamene e! I kamene e kai kasiang, těntol᷊e ringangu wuta.
18 Ual᷊ingu ene Iạ maněgu si kamene tadeạu i kamene měmělli wul᷊aeng bọu Iạ, mangal᷊ene wul᷊aeng sahị, tadeạu i kamene makalạ. Pamělliko l᷊ai pakeang mawira wọu Iạ tadeạu i kamene mẹ̌pakeang kụ měhěmbung kakakoạ i kamene těntol᷊e e ringangu makạmamea e. Dingangu pamělliko l᷊ai undang kụ buha su matang kamene tadeạu i kamene makasilo.
19 Apạeweng i kẹ̌kěndagẹ̌-Ku e, seng i sire Takụ sẹ̌sasaěng dingangu Takụ gẹ̌geserang. Ual᷊ingu ene ute, pẹ̌těngkaradingko i kamene ringangu pěmpẹ̌tobatẹ̌ko wọu kal᷊awọu rosang kamene.
20 Kakělla! Iạ dụdarisị su těngon tukadẹ̌ kụ mạnengkelẹ̌. Kereu piạ u makaringihẹ̌ tingihẹ̌-Ku, kụ manope tukadẹ̌; Iạ e sarung sumuẹ̌ mẹ̌sombang i sie, Iạ e sarung kumaěng sěngkakaěng dingange kụ i sie kumaěng sěngkakaěng dingang-Ku.
21 I sire apan nakawatạ, sarun Takụ ipakawala maiang su kararatuang-Ku sěngkakaiang dingang-Ku, kerẹewe Iạ sẹ̌saku mal᷊aing seng nakawatạ kụ orasẹ̌ ini e mạiang dingang i Amang-Ku su kararatuang'E.
22 I saim makạdingihẹ̌ e, pěmpěnaungko apan ilẹ̌hengetangu Rohkẹ̌ u Ruata e suapan jamaatẹ̌!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA