Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Barang ise na hundul ibagas pangondingion ni Na Timbul in, anjaha marianan bani linggom ni Pargogoh Na So Tarimbang in,

² ia do na boi marsahap bani Jahowa: Haporusanku anjaha batar-batarhu, Naibatangku, anjaha hatengeran ni uhurhu.

³ Tongon, ai Ia do na paluahkon ho humbani sambil ni parsambil pakon humbani pangagou ni sampar.

⁴ Ia do na manrungkub ho bani ambulu-Ni, anjaha i toruh ni habong-Ni jumpah ho haporusanmu; hasintongan-Ni do gantar parlingodan.

⁵ Seng pala habiaranmu songgot-songgot borngin, barang sior na habang arian;

⁶ barang sampar na mawat-awat bani na golap, ampa naborit na mangagou tongah ari.

⁷ Age radag saribu halak i lambungmu anjaha salaksa i siamunmu, seng tumaram mangonai anggo hubam.

⁸ Asal mangkawah matamu, gabe idahonmu ma pambalason dompak parjahat.

⁹ Ai ibahen ho do Jahowa haporusanmu, anjaha Na Timbul in gabe batar-batarmu.

¹⁰ Seng anjai mangonai be bam hasamboron, barang hamagouan seng be roh mandohori lampolampomu.

¹¹ Ai suruhon-Ni do malekat-Ni halani ho, ase iramotkon ho bani sagala dalanmu;

¹² sai tatang-tatangon ni sidea do ho, ase ulang antuk naheimu bani batu.

¹³ Dogeionmu do singa pakon ulog na marbisa, rojatanmu do anak ni singa ampa naga.

¹⁴ Halani marpangunsandeian ia Bangku, jadi paluahon-Ku ma ia, patimbulon-Ku ma ia halani na tinandani goran-Ku.

¹⁵ Diloonni do Ahu jadi balosan-Ku ma ia; paluahon-Ku do ia anjaha marmulia bahenon-Ku.

¹⁶ Sai pabosuron-Ku do ia sayur matua, anjaha pataridahkonon-Ku hatuahon-Ku bani.