Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ise cicio i bas TUHAN si Meganjangna, janah ringan ilinggemi si Mada Kuasa,

² banci ikatakenna man TUHAN, "Kam kap inganku cicio dingen sekawalku, Dibatangku, man BaNdu kap aku ernalem."

³ IjagaiNa Kam maka la kena siding peniding-niding i bas kerina penakit si maba kematen nari.

⁴ IkeremkenNa kam i teruh KabengNa, gelah kam teneng i bas PengkawaliNa; KesetianNa engkawali ras petetap kam.

⁵ Tupung berngi pe la kam perlu mbiar ntah rempet gia reh kebiaren tupung suari.

⁶ Ula aru atendu nandangi penakit sanga gelap, ntah pe cilaka tupung pantek ciger.

⁷ Aminna pe lit 1.000 kalak mate IdeherNdu, ntah 10.000 kalak i sekelewetndu, tapi kam labo kena kai pe.

⁸ Kam me jine si naksikenca, kalak jahat kena ukumen.

⁹ Sabap TUHAN ibahanndu ampang-ampangndu, si Meganjangna ibahanndu kecionndu.

¹⁰ Emaka labo kam kena mara, rumahndu labo kena cilaka.

¹¹ Dibata si nuruh MalekatNa lako njagai kam, ngkawali kam ku japa pe kam.

¹² Malekat-malekat e sinatang-natang kam, gelah ula nahendu tertuktuk i bas batu.

¹³ Itingkahindu me nipe ras singa, iperjatindu me anak singa ras nipe si erbisa.

¹⁴ Nina TUHAN, "Kalak si ngkelengi Aku, Kukelini kap, dingen kalak si ngakui Aku kap TUHAN Kukawali kap ia.

¹⁵ Adi erlebuh ia man bangKu Kualoi me ia. Tupung ia i bas kiniseran, Aku kap ras ia; Aku kap simulahi ia dingen si pemuliakenca.

¹⁶ Kubereken umur si gedang jadi upahna, dingen Kukelini ia."