Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Untu’ pamimping pakelong. Situru’ lagu: Bunga Bakung. Battu ri Daud. (69-2) Pasalamaka’, o, Allata’ala, saba’ nai’mi je’neka sa’genna kallongku.
2 (69-3) Tappeccorokka’ antama’ ri je’ne’ lantanga, tena pattuppuangku. Tallanga’ ri je’ne’ lantanga, nilo’lorang ri bombang manaika.
3 (69-4) Akkio’-kiokka’ sa’gengku mangngang nakalotoro’mo karro’-karrokku. Paccemi matangku antayangi pannulunNa Allata’alaku.
4 (69-5) Tau birisika ri nakke natena passabakkanna, la’bi jaiangngangi najaina uukku ri ulungku. Tau gassinga eroki angngancurukka’; nabakkaia’ siagang napitina’ ke’nanga. Napassa’ ampoterangi barang-barang tenaya nakualle passa.
5 (69-6) O, Allata’ala, Kiassengi sikamma kasalangku tena nataccokko dosaku mae ri Katte.
6 (69-7) TeaKi’ balang parekangia’ appakasiri’ mae ri tau manrannuanga ri Katte, o, Batara, Allata’ala Kaminang Koasaya. TeaKi’ balang parekangia’ angngerang paccalla mae ri sikamma tau anynyombaya mae ri Katte, o, Allata’alana Israel!
7 (69-8) Saba’ lanri iKattemi nakunihina, lanri iKattemi nakunicalla.
8 (69-9) A’jaria’ sanrapang bansa maraeng mae ri bija pammanakangku, sanrapang tau battu pantara’ mae ri daengku na andikku.
9 (69-10) Sanna’ lompona sumangakku lanri mangngaiku ri BallatTa, paccau-cauna tau anghinayaKi’ natujui kalengku.
10 (69-11) Angngarruka’ siagang appuasa’, mingka nahina’ ke’nanga.
11 (69-12) Ammakea’ kaeng karung pammatei ri susaku, mingka napianderia’ ke’nanga.
12 (69-13) A’jari carita’ ri tampa’ pa’rappunganna taua, kelong-kelong tunasa’ringa inakke napitabai.
13 (69-14) Mingka appala’ doanga’ mae ri Katte, o, Batara, o, Allata’ala, pialia’ punna baji’ wattua. Kitulung laloa’ lanri pangngamaseang lompoTa siagang lanri tamamminraTa.
14 (69-15) TeaKi’ balang parekangia’ tallang lalang ri je’neka, pasalamaka’ battu ri tau birisika ri nakke siagang battu ri je’ne’ lantanga.
15 (69-16) TeaKi’ balang parekangia’ nilo’lorang ri bombang manaika, siagang tallang ri dapara’na tamparanga yareka ri kuburu’ lantanga.
16 (69-17) Kipialima’, o, Batara, saba’ iKatte bajikKi’ siagang tuli mangngamaseangKi’. Poro assaile laloKi’ mae ri nakke lanri lompona pangngarimangnginTa
17 (69-18) TeaKi’ accokkoi battu ri anne atanTa, saba’ natujua’ kasusaang, karo-karo maKi’ antulunga’.
18 (69-19) Battu lalo maKi’ ampasalamaka’, Kilappassanga’ battu ri musu-musungku.
19 (69-20) Kiassengi antekamma bateku nicalla, nihina siagang nipakkanai, Kicini’ ngasengi sikontu musungku.
20 (69-21) Tappu’ minasama’ napakamma nihina, tenamo sumangakku. A’boya’ pa’rikongang, mingka sia-siaji, a’boya’ panynyaleori, mingka tena kunggappa.
21 (69-22) Ba’lalo nisarema’ kanre racung; wattungku turere, nisarea’ angnginung cukka.
22 (69-23) Boli’mi kamma angngerang cilaka parjamuanna ke’nanga, na a’jari sikko’ mae ri sikamma toananna ke’nanga.
23 (69-24) Boli’mi kamma a’jari buta matanna ke’nanga na tuli lamma dongko’na ke’nanga.
24 (69-25) Kitumpami pangngalarroinTa mae ri ke’nanga, boli’mi kamma nituju ke’nanga ri rinrana pangngalarroinTa.
25 (69-26) Boli’mi kamma a’jari sino sikali kemana ke’nanga, siagang tenamo bonena kema-kemana ke’nanga.
26 (69-27) Saba’ nasessai ke’nanga tau Kihukkunga, na nacarita sikamma tau nisessaya.
27 (69-28) Boli’mi kamma pila’ katambang kasalanna ke’nanga; teaKi’ pattojengi ke’nanga.
28 (69-29) Boli’mi kamma nilu’lu’ arenna ke’nanga battu ri kitta’ katallassanga; na tena nicataki arenna lalang ri dattara’na tau lambusuka.
29 (69-30) Mingka inakke nijallakkanga na kupa’risi’, Kiangka’ laloa’ o, Allata’ala, siagang pasalamaka’.
30 (69-31) Kulamammuji mae ri Allata’ala siagang kelong-kelong, kupakalompoi lalang kelong-kelong appala’ sukkuru’.
31 (69-32) Anjo la’bi Natarimai Batara nakoro’bang sapia, koro’bang sapi laki lompoa.
32 (69-33) Nacini’na kammaya anjo, rannumi tau nijallakkanga, lompomi pa’mai’na tau anynyombaya ri Allata’ala.
33 (69-34) Saba’ Napilangngeri Batara tu kasi-asia; tena nabalang parekangi umma’Na lalang ri tarungkua.
34 (69-35) Pujimi Allata’ala, he langika siagang linoa, tamparanga siagang sikontu apa-apa niaka ilalanna.
35 (69-36) Ia lampasalamaki Yerusalem siagang ambangungi ammotere’ kota-kotana Yehuda. Lammantangi umma’Na Batara anjoreng; a’jari napatangi ke’nanga anjo buttaya.
36 (69-37) Lanawarisiki ana’ cucunna; lanapammantangngi tau mangngaia ri Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA