Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Inggouni: Bunga silundat. Humbani si Daud. (69-2) Paluah Ham ma ahu, alo Naibata, ai domma das ronsi bibirhu bah.
2 (69-3) Mogap do ahu hubagas hubang na bagas, seng dong hajongjongan; tinob do hu toruh hubagas bah, anjaha iayubkon arus do ahu.
3 (69-4) Loja do ahu halani doruh-doruhku, marsohal tolonanku; marholok do matangku halani paima-imahon bani Naibatangku.
4 (69-5) Bueinan do humbani jambulanku sidea, na mardomdom bangku seng marhala; na gogoh-gogoh do sidea na sihol mansedahon ahu, na manlawan marhitei ladung; age na so hurampas ipaksa do ahu paulakkon.
5 (69-6) Ham Naibata, ibotoh Ham do haotoonku, anjaha salah na hubahen seng ponop hum Bamu.
6 (69-7) Sai ulang ma bador halani ahu sagala na marpangarapan Bamu, Ham Naibata Zebaot. Sai ulang ma maila halani ahu, sagala na mangindahi Ham, alo Naibata ni Israel.
7 (69-8) Ai halani Ham do ahu bilei; anjaha hailaon do manrungkub bohingku.
8 (69-9) Jadi halak na legan do ahu bani saninangku, halak na so tinanda bani anak ni inang.
9 (69-10) Ai pongkut ni uhur bani rumah-Mu do mangankon ahu, anjaha ompas hu bangku risa-risa ni na manrisai Ham.
10 (69-11) Huarsik do tonduyhu marhitei na marpuasa, hape gabe habileion do ai bangku.
11 (69-12) Husorungkon do bangku pusok ni uhur, tapi gabe umpama do ahu ibahen sidea.
12 (69-13) Gabe sihata-hataon ni halak na hundul i horbangan do ahu, sisalig-saligan bani halak parmabuk.
13 (69-14) Tapi anggo ahu, hu Bamu do ahu martonggo, Ham Jahowa, bani panorang na dearhonsi, Ham Naibata, sai tangihon Ham ma ahu romban hubani idop ni uhur-Mu na banggal in, ampa pangurupimu na totap in.
14 (69-15) Sai paluah Ham ma ahu humbagas hubang, ase ulang mogap ahu; sai paluah Ham ma ahu humbani na mandomdomi ahu, humbagas laut na bagas.
15 (69-16) Sai ulang ma mayub ahu ibahen bah banggal, ulang ma ibondut luhung ahu, barang itutup parigi babahni i babouhu.
16 (69-17) Sai tangihon Ham ma ahu, ale Jahowa, domu hubani banggal ni idop ni uhur-Mu, dompakkon Ham ma ahu romban hubani banggal ni holong ni atei-Mu.
17 (69-18) Ulang ma ponopkon Ham bohi-Mu dompak juakjuak-Mu; ai rusak do ahu, oloskon Ham ma mangurupi ahu.
18 (69-19) Roh ma Ham hundohor bani tonduyhu, paluah Ham ma in; sai paluah Ham ma ahu halani munsuhku.
19 (69-20) Itanda Ham do hahirionku, habileian pakon habadoronku; ilobei ni panonggor-Mu do ganup imbangku.
20 (69-21) Habadoron ai do mambahen rosak uhurhu, anjaha mandolei do ahu. Tarpaima-ima do ahu bani halak parholong atei, hape seng dong, sonai age bani sipangapohi, hape seng jumpah.
21 (69-22) Rasun do ibere sidea panganonku, anjaha sanggah na horahan ahu, na migar do ipainumkon bangku.
22 (69-23) Sai gabe jarot ma meja ni sidea i lobeini, anjaha horja-horja ni sidea gabe tirangkap.
23 (69-24) Sai solong ma mata ni sidea, ulang marpangidah; hitir-hitir ma binongei ni sidea bahen Ham lalab.
24 (69-25) Useihon Ham ma bani sidea ringis-Mu, anjaha gajag ni gila-Mu ma manoroh sidea.
25 (69-26) Sai halong ma bahen Ham huta ni sidea, anjaha ulang be marisi lampolampo ni sidea.
26 (69-27) Ai iayak-ayak sidea do halak na niajar-Mu, anjaha ipabanggal sidea do naborit ni halak na niugahan-Mu.
27 (69-28) Tambahkon Ham ma na salah bani salah ni sidea, ulang ma dapotan hapintoron sidea hun Bamu.
28 (69-29) Sai sasap ma goran ni sidea humbani buku hagoluhan, ulang ma tarsurat sidea rap pakon halak parpintor.
29 (69-30) Tapi anggo ahu, madoyuk do anjaha marsik do; haluahon na hun Bamu ma, alo Naibata, na mandingdingi ahu.
30 (69-31) Pujionku ma goran ni Naibata marhitei doding, anjaha pasangaponku ma Ia marhitei doding puji-pujian;
31 (69-32) ai do harosuh ni Jahowa lobih humbani anak ni lombu, lobih humbani lombu jonggi na martanduk anjaha na martambirik.
32 (69-33) Tonggor ma, nasiam ganup na masombuh, malas ma uhur nasiam; nasiam sipindahi Naibata, sai mulak ma hinsah uhur nasiam.
33 (69-34) Ai itangihon Jahowa do na masombuh, anjaha seng mapas Ia bani na tarbuang.
34 (69-35) Sai ipuji langit pakon tanoh ma Ia, sonai age laut pakon sagala na manjulur ibagas.
35 (69-36) Ai Naibata do sihol paluahkon Sion, anjaha pajongjongon-Ni do sagala huta ni Juda; marianan ma sidea ijai anjaha sidea simadasi;
36 (69-37) ginompar ni juakjuak-Ni maneansi use, anjaha na mangkaholongi goran-Ni mangiankon ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA