Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Psalm ni si Daud. Sada doding. (68-2) Jongjong do Naibata, mambur merap ma munsuh-Ni, anjaha maporus na mandomdomi-Si hun lobei-Ni.
2 (68-3) Songon timus na niombuskon, sonai do iombuskon sidea; songon lilin malala bani apuy, sonai do bois sagala parjahat i lobei ni Naibata.
3 (68-4) Tapi parpintor marmalas ni uhur anjaha marolob-olob do i lobei ni Naibata, anjaha marsurak-surak do sidea ibagas malas ni uhur.
4 (68-5) Dodingkon nasiam ma Naibata, puji nasiam ma goran-Ni. Bahen nasiam ma dalan Bani na margareta i halimisan. Jahowa do goran-Ni, marolob-olob ma nasiam i lobei-Ni.
5 (68-6) Ia do Bapa ni na tading maetek, anjaha Panguhum bani na mabalu. Ia do Naibata i rumah-Ni na pansing in.
6 (68-7) Naibata do na pajabuhon halak na tarpunjung, na padaratkon halak na tartutup hu hadoharon, tapi sipanlawan tading do bani tanoh dorging-dorging.
7 (68-8) Ham Jahowa, sanggah na luar Ham i lobei ni bangsa-Mu, sanggah langkah-langkah Ham i halimisan. Sela.
8 (68-9) Dugur do tanoh on, langit manguseihon udan i lobei ni Naibata; age Dolog Sinai duyug do i lobei ni Naibata, Naibata ni Israel.
9 (68-10) Layak do Ham mambere udan, Ham Naibata, anjaha ipahisar Ham do tanoh parbagianan-Mu sanggah loja.
10 (68-11) Marianan do ijai siminik-Mu, iparmudu Ham do, ale Naibata, halak na madoyuk marhitei dear layak-Mu.
11 (68-12) Tuhan manluarhon hata-Ni; doskon bala na buei do naboru siparambilan na madear.
12 (68-13) Raja-raja ni sagala bala, maporus do sidea. Inang i rumah marbagi taban-taban.
13 (68-14) Sai sohsoh nasiam i holangkolang ni harang-harang? Habong ni asas domma ilampis bani pirak, ambuluni maromas na gorsing.
14 (68-15) Sanggah ipaerap Pargogoh Na So Tarimbang in sagala raja ijai, turun ma salju i atas ni Dolog Salmon.
15 (68-16) Dolog ni naibata-naibata, ai ma Dolog Basan, dolog sibuei pakpak do Dolog Basan ai.
16 (68-17) Mase ma serleng matanima, hanima ale dolog sibuei pakpak, mangidah dolog na pinilih ni Jahowa gabe ianan-Ni? Tongon, Jahowa do mangiankon ai sadokah ni dokahni.
17 (68-18) Gareta ni Naibata marlaksa-laksa anjaha marhagogohon; Tuhan roh hun Sinai masuk hu rumah-Ni na ma pansing.
18 (68-19) Domma tangkog Ham hu atas, mamboan taban-taban; domma ijalo Ham parsombahon marrupa jolma, gari halak sipanlawan tunduk do Bamu, Ham Naibata Jahowa.
19 (68-20) Napuji ma Tuhan in ganup ari! Ia do na mangusung hita, Naibata do hatuahonta. Sela.
20 (68-21) Naibata banta, ai ma Naibata parbansahan, gok bani Jahowa Naibata do haluahon humbani hamatean.
21 (68-22) Tongon, sai rosakan ni Naibata do ulu ni munsuh-Ni, tangkurak ni halak sihorjahon hajahaton.
22 (68-23) Domma ihatahon Tuhan, “Hun Basan do sidea paulakon-Ku, boanon-Ku do sidea mulak hun laut na bagas,
23 (68-24) ase marburih naheimu ibagas daroh, anjaha dilah ni baliangmu marrupei humbani munsuh.”
24 (68-25) Domma ididah halak odoran-Mu, Ham Naibata, parmasuk ni Naibatangku ampa Rajangku hubagas ianan na ma pansing in.
25 (68-26) I lobei mardalan pandoding, i pudi ni parhusapi, i tongah-tongah anak boru na manggual tambur.
26 (68-27) Marhitei koor ipuji sidea Naibata, Tuhan in, sidea na humbani bah tubuh ni Israel.
27 (68-28) Ijai do si Benjamin, sianggian, panrajai ni sidea, pangintuai ni Juda rapkon hulananni, pangintuai ni Sebulon, pangintuai ni Naptali.
28 (68-29) Tongos Ham ma hagogohon-Mu, ale Jahowa; patuduhkon Ham ma gogoh-Mu, Ham Naibata, Ham na dob mangkopkop hanami.
29 (68-30) Halani rumah-Mu, na i Jerusalem, marrohan do raja-raja na manaruhkon sibere-bere hu Bamu.
30 (68-31) Sorgangi Ham ma binatang na bani arung-arung ai, hulanan ni lombu jonggi ampa anak ni lombu ni bangsa-bangsa; rojati Ham ma na impolan bani pirak, paerap Ham ma bangsa na mangkarosuhkon porang.
31 (68-32) Roh ma parkuasa hun Masir, halak Etiopia pe manurdukkon tanganni hubani Naibata.
32 (68-33) Nasiam sagala harajaon na i tanoh on, dodingkon nasiam ma Naibata, puji nasiam ma Tuhan! Sela.
33 (68-34) Ia na margareta i langit, langit na basaia; Tonggor ma, pagomoson-Ni ma sora-Ni, sora-Ni na maling in.
34 (68-35) Tanda ma hagogohon ni Naibata! Hamuliaon-Ni do manggomgom Israel, anjaha kuasa-Ni mangatasi hombun.
35 (68-36) Marhajombuton do Naibata manrajai humbani ianan-Ni na ma pansing in; Naibata ni Israel do Ia, Ia do sibere kuasa ampa hagogohon hubani bangsa-Ni. Napuji ma Naibata!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA