Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaangguy pamimpinna koor. Jaburra Daud. (68-2) Allah ngadek, mosona epabalessudan, oreng se baji’ ka Salerana padha buru asalebbudan.
2 (68-3) Allah ngojuk reng-oreng jareya, epakantha okos se ekebbat angen sampe’ elang. Akantha lilin se ngalelle e dhalem apoy kantha jareya oreng jahat mosna e ajunanna Allah.
3 (68-4) Tape oreng alem perak ban anga-bunga, asorak kaperagen e ajunanna Allah.
4 (68-5) Mara nyanye amolja’agi Allah, molja’agi asmana, sadhiya’agi jalan raja se elebadana Salerana se netene ondhem. Asmana iya areya PANGERAN — mara anga-bunga e ajunanna!
5 (68-6) Allah se alenggi e Padalemmanna se Socce jareya ramana kana’ jatim ban se abillai para randha se ta’ andhi’ lake.
6 (68-7) Allah apareng kennengngan ka oreng se kadibi’an, mabebas para tahanan sampe’ padha senneng odhi’na. Tape reng-oreng se ta’ atoro’ ka Pangeran kodu enneng e tana se kajal.
7 (68-8) Ya Allah, e bakto Junandalem nonton ommadda se ajalan lebat e ra-ara se kerreng,
8 (68-9) bume agaledder, ojan ngalowa e ajunannepon Junandalem lantaran rabuna Allah Sinay, Allah Isra’il.
9 (68-10) Junandalem matoron ojan sabannya’na ka bume, mabali one tana kajal se kerreng.
10 (68-11) Ommattepon Junandalem pas enneng e ka’dhissa’; e dhalem kabecce’annepon Junandalem, Guste, Junandalem meyara oreng mesken.
11 (68-12) Pangeran apareng potosan, babine’an laju padha ngeba berta:
12 (68-13) "To-rato ban pasukanna la padha buru!" Paburuna akantha dara ngabber ka tenggina. Babine’an e bengkona padha gi-magi salaka ban emmas se edina’agi. Maske bannya’ se ta’ noro’ aperrang, ommadda Allah la olle kamennangan.
13 (68-14) (68:12)
14 (68-15) E bakto Allah Se Mahakobasa masalebbudan to-rato e jadhiya, salju toron dhari Gunong Salmon.
15 (68-16) Gunong Basyan reya ce’ rajana, gunong se bannya’ konco’na.
16 (68-17) Dhari co’-konco’na se bannya’ jareya arapa ba’na me’ tamburuwan ngabas ka Gumo’ Siyon se epele Pangeran menangka kalenggiyanna? PANGERAN alenggiya e jadhiya salanjangnga.
17 (68-18) Allah abakta kareta se koko aebuwan bannya’na rabu katon ce’ agungnga, dhari Sinay ka kennengngan se socce rowa.
18 (68-19) PANGERAN ongga ka kennengngan se tenggi, abakta tawanan sabannya’na. Salerana narema tor-ator dhari manossa, la’-mala’ dhari kaom pamberonta’, sopaja padha’a bisa enneng e jadhiya apolong ban GUSTE Allah.
19 (68-20) Molja’agi Pangeran, sabab Pangeran jareya Allah se masalamet sengko’ ban ba’na, Se re-saarena mekol tanggunganna sengko’ ban ba’na.
20 (68-21) Allahna sengko’ ban ba’na reya PANGERAN se apareng kasalameddan. se mabebas sengko’ ban ba’na dhari pate.
21 (68-22) Allah tanto maremmok cethagga so-mosona, reng-oreng se terros odhi’ e dhalem dusa.
22 (68-23) Dhabuna Pangeran, "He Tang ommat, Sengko’ ngeba mosona ba’na dhari Basyan, bi’ Sengko’ egiba abali dhari dhasarra tase’ raja,
23 (68-24) sopaja ba’na maccowa sokona ban dharana reng-oreng jareya, ban te’-pate’na ba’na bisa’a ajilat dhara jareya sampe’ tobuk sakennyangnga."
24 (68-25) Ya Allah, sadajana padha nengale paway kamennanganna Junandalem, Guste, rak-aragannepon Junandalem, GUSTE Allah, tang Allah, tang Rato, earak e kalenggiyanna.
25 (68-26) E adha’ ajalan para tokang nyanye, e budhi tokang tabbuna calempong; e tengnga ban-paraban tokang tabbuna terbang; kantha reya nyanyeyanna reng-oreng jareya:
26 (68-27) "Molja’agi Allah e dhalem kompolanna ommadda, molja’agi PANGERAN, he toronanna Yakub kabbi!"
27 (68-28) Benyamin, suku se paleng kene’ ajalan e adha’, e budhiyanna anyo-ronyo para pamimpinna suku Yehuda, e budhiyanna pole para pamimpinna suku Zebulon ban Naftali.
28 (68-29) Ngereng duduwagi kakowadannepon Junandalem, Guste, kakowadan se sareng Junandalem eagem nolong abdidalem.
29 (68-30) To-rato abakta tor-ator ka Junandalem e Padalemmannepon Junandalem e Yerusalim.
30 (68-31) Bentakkagi Messer, burun alas e tengnga galagas ka’dhissa’. Dukane sabangsa, se akadi banteng saambalan se asareng dhu’-budhu’na, se saleng enyek polana arebbu’a salaka; masalebbudan sa-bangsa se dujan aperrang!
31 (68-32) Ja-pangraja Messer rabu abakta dimbaga; oreng Sudan ru-kaburu ngeba pesse opet ka Allah.
32 (68-33) Mara nyanye ka Allah, sakabbinna karaja’an e dunnya, nyanyeyagi ji-pojiyan ka Pangeran,
33 (68-34) kaagem Salerana se lebat e langnge’ jaman lamba’. Edhingngagi, Pangeran abu-dhabu, sowarana agarudhu’ nako’e onggu.
34 (68-35) Akone kobasana Allah se ngobasane Isra’il, kobasana sampe’ gan langnge’.
35 (68-36) Makasambu’ ate onggu Allahna sengko’ ban ba’na e bakto kalowar dhari kalenggiyanna. Allah Isra’il marenge kobasa ban kakowadan ka ommadda. Molja’agi Allah!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA