Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Masmur Daud; ende-enden.
2 Keke Dibata, IhuntakkenNa musuh-MusuhNa, kalak si ernembeh ate man BaNa lompat i bas Ia nari.
3 Ikernepken Dibata ia kerina, desken cimber api bene me ia. Bali ras lilin nehteh i bas api gara, bage me kalak jahat lesap i bas adep-adepen Dibata.
4 Tapi kalak benar meriah iakapna, ersurak-surak ia i adep-adepen Dibata.
5 Rendelah guna Dibata, pujilah GelarNa, Ia kap TUHAN, pesikap dalan man BaNa, si njadiken embun man GeretaNa. TUHAN kap GelarNa, ersuraklah i adep-AdepenNa.
6 Dibata si ringan i bas InganNa si badia, Ia bapa kalak melumang dingen ngkawali diberu balu-balu.
7 IbereNa ingan man kalak si kelungunen, kalak tutupen iberena kebebasen dingen keriahen. Tapi kalak si ngelawan TUHAN, la banci lang tading i bas taneh tenggiring.
8 O Dibata, tupung BangsaNdu IbabaiNdu erdalan arah taneh si mesawang,
9 doni nggirgir, langit ngamburken udan, i AdepenNdu, o Dibata deleng Sinai mugur-ugur.
10 IberekenNdu udan meder, dingen taneh tenggiring IpelimbaruiNdu.
11 Emaka i je BangsaNdu ringan, i bas KiniulinNdu, o Dibata, kalak musil IpiaraNdu.
12 TUHAN mereken perentah, emaka nterem diberu-diberu maba berita,
13 "Nggo kiamen raja-raja ras tenterana, diberu-diberu i rumah mbagi-bagiken barang rampasen."
14 Tempas nderapati si nilapisi salu pirak, dingen kabengna erndilap-ndilap erkiteken emas murni. (Ngkai maka kam tading i bas karang biri-biri tupung paksa erperang?)
15 Deleng Salmon ersinalsal desken salju, tupung si Mada Kuasa engkerapken raja-raja i je.
16 Deleng Basan lanai tanggung ganjangna, deleng e melala ancuk-ancukna.
17 Ngkai maka i das ancuk-ancukna si meganjang e, Deleng Basan cian ngenen Deleng Sion, si ipilih Dibata man InganNa tading? I je TUHAN tading seh rasa lalap!
18 Salu gereta si enteguh, buena meribu-ribu, reh TUHAN i Sinai nari ku InganNa si badia.
19 TUHAN nangkih ku ingan si Meganjangna ingan e jadi InganNa tading; IbabaNa nterem kalak tabanen, i bas pemberontak nari pe IalokenNa persembahen.
20 Pujilah TUHAN tep-tep wari Ia si maba babanta si mberat. Ia kap Dibata si engkelini kita.
21 Dibatanta kap TUHAN si ngkelini, IpulahiNa kita i bas kematen nari.
22 Ugapa pe iripukken Dibata takal ImbangNa, takal kalak si tetap ringan i bas dosa.
23 Nina Tuhan, "BangsangKu, Kubaba imbangndu i Basan nari, Kubaba ia mulih i bas teruh lawit nari,
24 gelah iburihindu nahendu salu darehna, dingen biang ndilatca asa puasna."
25 O Dibata, kerina kalak ngidah arak-araken KemenangenNdu Dibata, Rajangku Ia, iarakken ku InganNa.
26 Arah lebe erdalan perende-ende, kalak si ngkuit kulcapi arah pudi, i tengah, singuda-nguda malu gendang, bagenda me ende-endenna,
27 "Pujilah Dibata i tengah PerpulungenNa, pujilah TUHAN, o kesusuren Jakup kerina!"
28 Nehenlah, ah suku Benyamin suku si kitikna, adi peminpin Juda lanai alang teremna, arah pudina, erdalan peminpin Sebulon ras Naptali.
29 O Dibata, cidahken min GegehNdu, gegeh si ipakeNdu nampati kami BangsaNdu.
30 Ibaba raja-rajalah persembahen, guna RumahNdu i Jerusalem.
31 Rawailah Mesir, rubia si merawa i tengah rengo. Rawailah bangsa-bangsa, rarasen jenggi lembu ras anakna, seh maka nembah erjimpuh ia kerina janah mpersembahken pirak BaNdu. Huntakkenlah kalak si merincuh erperang.
32 I Mesir nari ibaba kalak barang tembaga, kalak Sudan ndadaken tan guna ertoto.
33 Rendelah man Dibata, o kerina kerajan, endekenlah ende-enden pujin man TUHAN.
34 Ia si mentasi awang-awang, awang-awang si nggo lit nai-nai nari. Begikenlah! Ngerana TUHAN SoraNa ergeruhguh alu megang.
35 Beritakenlah maka Dibata kap si merentah Israel, i datas awang-awang Dibata erkuasa alu kemulian. <68:36> - Andiko, mejin me tuhu Dibata tupung ia ndarat i bas InganNa nari. Dibata nu Israel mereken man BangsaNa gegeh ras kuasa. Pujilah Dibata!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA