Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pammujina Daud, ri wattunna assara-sarai tasilolongang pikkiranna ri dallekanna Abimelekh, sa’genna nibongka a’lampa. (34-2) Erokka’ appala’ sukkuru’ ri Batara lalang sikontu wattua, tena ammariku mammuji-muji mae ri Ia.
2 (34-3) Erokka’ a’lompo-lompo pa’mai’ lanri gau’Na Batara; poro Nalangngereki tu nijallakkanga na’jari rannu.
3 (34-4) Malompoi Batara niaka anrurunganga’, umba kissama-sama ampakala’biriki arenNa.
4 (34-5) Appala’ doanga’ ri Batara, nampa appialimo, na Nalappassanga’ battu ri kamallakkanga.
5 (34-6) Tu nijallakkanga manrannuangi ri Ia nampa a’jari rannumo, tenamo saba’na lasiri’-siri’ ke’nanga.
6 (34-7) Tu cilakaya akkioki siagang appialimi Batara, nilappassammi battu ri sikontu kasukkarranna.
7 (34-8) Malaeka’Na Batara anjagai tau mappilangngeria, siagang nalappassang ke’nanga battu ri bahayaya.
8 (34-9) Kasia’mi kalennu antekamma baji’Na Batara, mate’nei tau ma’la’langa mae ri Ia.
9 (34-10) Pakala’biriki Batara, he ikau ngaseng umma’Na, nasaba’ tena nalakakurangang tu mappilangngeria.
10 (34-11) Cipuru’ tommi singa-singaya lanri kakurangang ri kanre; mingka tau anynyombaya ri Batara tena nakakurangang.
11 (34-12) Pilangngerimi, he ikau ana’-anaka ngaseng, kuajarakko mappakala’biri’ mae ri Batara.
12 (34-13) Erokko la’bu umuru’nu siagang angkasiaki bajika?
13 (34-14) Teako appasuluki kana-kana ja’dala’, siagang teako nungai akkala’ annipua.
14 (34-15) Pakabellai kalennu battu ri ja’dalaka, gaukangi bajika, usahakangi passiamakkanga sipikulle-kullenu.
15 (34-16) Naparhatikangi Batara tu bajika, Napilangngeri ke’nanga punna akkio’ appala’ tulung
16 (34-17) Mingka Nabaliangi tu a’gau’ ja’dalaka; punna mate ke’nanga, lintaki nikaluppai.
17 (34-18) Punna akkio’ tu bajika, nipilangngeri ri Batara, na nipasalama’ ke’nanga battu ri kasukkarranga.
18 (34-19) Ma’reppeseki Batara mae ri tu ca’dia pa’mai’na; Napasalamaki tu tappu’ minasaya.
19 (34-20) Jai pa’risi’na tu bajika, mingka nilappassangi ri Batara battu ri yangasenna anjo.
20 (34-21) Tuli nijagai batangkalenna ri Batara, manna sipappa’ bukunna talanitepokai.
21 (34-22) Tu ja’dalaka lamatei lanri kaja’dallanna, tu birisika mae ri tu bajika lanihukkungi.
22 (34-23) Napasalamaki Batara sikamma atanNa; ia ma’la’langa mae ri KalenNa talanihukkungai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA