Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Masmur Daud, tupung ia tading i adep-adepen Abimelek, ipekulah-kulahna la demsa ukurna, jenari ipelawes Abimelek ia.
2 Lalap aku ngataken bujur man TUHAN kupuji Ia la erngadi-ngadi.
3 Kupuji Ia sabap PerbahanenNa, kerina kalak si itindih begikenlah janah meriahlah.
4 Marilah siberitaken kemulian TUHAN, mari radu ras kita muji GelarNa.
5 Ertoto aku, ibegiken TUHAN pemindonku, ipulahina aku i bas kerina kebiarenku.
6 Kalak si itindih erpengarapen man BaNa, meriah UkurNa la aru pe atena.
7 Kalak mesera erlebuh man BaNa, janah IbegikenNa, IpulahiNa ia i bas kiniseran-kiniseranna.
8 Malekat TUHAN ngkawali kalak si tutus, dingen mulahisa i bas si jahat nari.
9 Malem kal ate kalak si cilinggem man BaNa, penanam-nanamlah uga belinna kiniulin TUHAN.
10 O kam BangsaNa, ikutkenlah TUHAN, kalak si tutus ngikutkenca lalap la kekurangen.
11 Singa pe kelihen erkiteken kurang nakan, tapi kerina si mehuli ibereken man kalak si ndarami TUHAN.
12 O teman-temanku, marilah begiken aku, gelah kuajari kam uga pemuliaken TUHAN.
13 Merincuh kam gedang umurndu, dingen ngenanami keriahen ras kesangapen?
14 Ula belasken kata-kata jahat, ula erbual.
15 Tadingkenlah kejahaten, lakokenlah kai si mehuli, bulatkenlah ukurndu erbahan perdamen.
16 Kalak si tutus iperdiateken TUHAN, adi erlebuh ia ialoi TUHAN.
17 Tapi kalak jahat IperimbangNa, emaka kenca ia mate mis ilupaken.
18 Erlebuh kalak bujur man TUHAN, ialoi TUHAN ia; IpulahiNa ia i bas kesusahenna.
19 TUHAN nemani kalak si lanai piher ukurna; IsampatiNa kalak si nggo bene pengarapenna.
20 Kalak bujur pe mbue ngenanami kiniseran, tapi ipulahi TUHAN ia i bas kerinana nari.
21 Badanna tetap ikawali TUHAN, emaka la lit sada pe tulanna si penggel.
22 Kalak jahat, mate perbahan kejahatenna, kalak si ernembeh ate man kalak bujur, la banci la iukum. <34:23> - TUHAN si mulahi BangsaNa, kalak si ndahi Ia mindo penampat, tentu IkawaliNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA