Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Areya’ babala’an laenna dhari Sulaiman se esalen bi’ ba-ponggabana e karatonna Hizkiya, rato Yehuda.

² Allah eagungngagi lantaran pa-apa se eroseya’agi Salerana; rato ehormadi lantaran sabarang se bisa eterrangngagi salerana.

³ Akantha tase’ raja se dhalem ban langnge’ se tenggi, bariya keya pekkeranna rato ta’ ekenneng tebbak oreng.

⁴ Berse’e gallu salaka dhari camporanna se ta’ morne, buru seniman bisa agabay barang se lebur dhari salaka jareya.

⁵ Paondur para panasehat se jahat dhari karaton, buru pamarenta’anna koko lantaran kaadilanna rato.

⁶ Mon ngadhep rato kodu paandhap asor ja’ makaton akantha oreng se tenggi pangkadda.

⁷ Lebbi becce’ esoro ngalle ka katoju’an se anyamanan katembang ba’na esoro magi katoju’anna ka oreng se pangkadda atenggiyan dhari ba’na.

⁸ Ja’ ru-kaburu ngeba parkara ka pangadilan, sabab mon pas etemmo ja’ ba’na sala, ba’na pas arapa’a?

⁹ Sala paham ban kanca, oros ban oreng jareya malolo, tape roseyana oreng laen ja’ sampe’ kacaca.

¹⁰ Sabab dhaggi’ ba’na ekoca’ oreng se bucor colo’na ban nyamana ba’na pas juba’ saomorra.

¹¹ Panemmo se epanapa’ kalaban cara se teppa’ padha ban wa’-buwa’an emmas e pereng salaka.

¹² Parengeddanna oreng penter ka oreng se endha’ narema, padha ban sello’ emmas otaba pareyasan emmas.

¹³ Otosan se esto masenneng atena se ngotos, padha ban aeng se makobassa oreng anye e saba.

¹⁴ Ji-janji se tadha’ daddina padha ban ondhem sarta angen se ta’ madhateng ojan.

¹⁵ Kasabbaran se etoro’e caca se lemma’ manes bisa mayakin oreng se kobasa, ban makala sakabbinna oreng se nangtang.

¹⁶ Mon ngakan maddu ja’ nya’-bannya’; dhaggi’ ba’na ngota.

¹⁷ Ja’ gut-seggut entar ka bengkona tatanggana, dhaggi’ tatanggana busen ban baji’ ka ba’na.

¹⁸ Da’wa’an palsu mamateyan oreng, akantha peddhang, tokol otaba pana se tajem.

¹⁹ Parcaja ka pangkiyanat e jaman sossa padha bi’ se ngael ngangguy gigi oga otaba ajalan ban soko se dippang ban lanjang salaja.

²⁰ Anyanye kaangguy oreng se karekongan padha ban abangkange oreng jareya e bakto cellep kabadha’anna, akantha se nyelen cokka ka lokana.

²¹ Mon mosona ba’na lapar, berri’i ngakan; ban berri’i ngenom mon teppa’na pelka’.

²² Kalaban cara jareya, oreng jareya todhus ka ba’na, ban ba’na tanto eberkadi bi’ PANGERAN.

²³ Angen dhaja tanto ngeba ojan, bariya keya rarasan tanto mapeggel oreng.

²⁴ Enneng e padduna gabak anyamanan, etembang sabengko ban bine se dujan atokar.

²⁵ Ngedhing kabar nyaman dhari jauna akantha se ngenom aeng e bakto pelka’.

²⁶ Oreng becce’ se ngala ka oreng se daraka padha ban somber se lekko otaba somor se kotor aengnga.

²⁷ Ngakan maddu nya’-bannya’ gallu reya ta’ becce’, bariya keya mon tabannya’ gallu ngalem oreng.

²⁸ Oreng se ta’ bisa ngobasane aba’na akantha kottha se la gujur partahananna.