Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Enda me tole pertenget Salomo si isuratken kalak si ringan i bas istana Hiskia raja Juda.

² Si pemuliakenlah Dibata erkiteken kai si irahasiakenna, si pujilah raja-raja erkiteken si ijelaskenna.

³ Asa ndigan pe labo banci ietehndu isi pusuh raja; perukurenna meganjang bali ras langit, bagesna seri ras kelbung lawit; la tersipati kita.

⁴ Aguilah ugup i bas pirak nari, jenari maka banci ndarat si mehuli i bas pande emas nari.

⁵ Pedauhlah nasehat si jahat i bas raja nari emaka pemerentahenna paguh alu keadilen.

⁶ Adi kam tedis i adep-adepen raja, ula cubaken ngelagak tempa-tempa kam kalak si la banci lang.

⁷ Ulin nungkun muat ingan si meganjang, asangken ipesusur i bas kalak si mulia nari.

⁸ Ula kam merudu ngadu ku pengadilen kerna kai si idahndu, kune ipermaluken kalak kam alu kesalahenndu jine, uga denga nge perbahanenndu?

⁹ Adi kam la siangkan ras temanndu sibalengen, buniken e i bas ukurndu tapi ula cidahken rahasia kalak.

¹⁰ Sabap ikataken kalak kam kari pergantang telpus jenari mbau gelarndu kidekah geluhndu.

¹¹ Kata si ibelasken i bas paksana bali kap ras buah emas si iamparken i bas pinggan pirak.

¹² Pengajaren kalak pentar nandangi kalak si nggit ninggelkenca, bali kap ras gelang emas perhiasen si ibahan i bas emas si meherga nari.

¹³ Desken lau malem man kalak si tupung rani bage me malemna ate perban persuruhen patuh nandangi kalak si nuruhsa.

¹⁴ Kalak si nggo erpadan tapi la pernah isehkenna padanna, bali kap ia ras embun dingen angin si la pernah udan.

¹⁵ Saber ate rikut ras ranan mehuli, banci erbahan lembab ukur penguasa.

¹⁶ Angkar-angkar beltekndu adi ipanndu tengguli, ula kam kari mutah ibahanna.

¹⁷ Ula usursa tandang ku rumah temanndu, maka ula ia leja ngenehen kam, jenari nembeh atena man bandu.

¹⁸ Kasa kai si la tuhu bali kap ras pedang, palu-palu, tah pe panah si entelap, si banci kalak ibunuhna.

¹⁹ Tek man kalak si la terteki i bas paksa kesusahen bali kap e ras cingatngat alu ipen si modek-odek, ntah pe erdalan alu nahe si cempang.

²⁰ Rende meriah nandangi kalak si erceda ate bali kap e ras nangtangi uisna tupung mbergeh, ntah pe ngamburken cuka ku bas lukana.

²¹ Adi melihe imbangndu bere manlah, adi muas ia bere minemlah.

²² Alu bage ijurukenndu ia jenari TUHAN si masu-masu kam.

²³ Angin Utara la banci lang ngerehken udan; adi cekurak la banci lang ngerehken perubaten.

²⁴ Ulin tading i bas suki-suki loteng asangken sada rumah ras ndehara perdegil.

²⁵ Ndatken berita si mehuli i bas ingan si ndauh nari, bali kap ras minem lau malem tupung paksa muas.

²⁶ Kalak bujur si aru atena ngelawan kalak jahat, bali kap ia ras ulu lau si megembur tah sumur si melket.

²⁷ Mbuesa man tengguli, la mehuli, ndarami pujin man diri jine la mehuli.

²⁸ Kalak si la ngasup engkuasai dirina, bali ras kota si nggo tombang bentengna.