Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Non-enoman kerras andaddiyagi oreng korang ajar ban baridhu. oreng se ngenom sampe’ mabu’ reya budhu.

² Dukana rato akantha gaungnga macan; oreng se maduka salerana padha ban macalaka’ aba’na dibi’.

³ Pera’ oreng budhu se dujan atokar; se patot ealem iya areya ajauwi tokar.

⁴ Oreng tane se males ta’ agarap tanana teppa’ baktona; dhi-budhina mon mosem anye ta’ molong pa-apa.

⁵ Essena atena oreng akantha aeng somor se dhalem; tape bisa etemba bi’ oreng se andhi’ pangarteyan.

⁶ Bannya’ oreng ngako kanca, tape kanca se esto onggu malarat sareyanna.

⁷ Na’-kana’ pojur mon andhi’ eppa’ se jujur ban becce’ odhi’na.

⁸ Mon rato alenggi e korse pangadilan, bisa ngoladi sabarang se jahat.

⁹ Ba’ badha’a oreng se bisa ngoca’, "Tang ate berse, sengko’ ta’ andhi’ dusa?"

¹⁰ Tembangan ban okoran se ta’ cocok reya ta’ ekasokane PANGERAN.

¹¹ Dhari lalakonna na’-kana’ bisa etemmo apa kana’ jareya becce’ ban jujur.

¹² Kopeng angguy ngedhingngagi, mata angguy ngabas, se dhadhuwa’ jareya PANGERAN se nyepta’agi.

¹³ Oreng se dujan tedhung bakal meskena, oreng se bajeng alalakon bakal bannya’a kakananna.

¹⁴ Oreng se melle terros aserro parkara arga se larang, tape samarena melle arassa gumbira lantaran arga se ekaolle jareya.

¹⁵ Ca’-oca’ se agandhu’ pangataowan lebbi aji dhari emmas ban barleyan.

¹⁶ Sapa se endha’ nanggung otangnga oreng laen, pantes ekala’ dhi’-andhi’na menangka tanggunganna janjina.

¹⁷ Arta hasella nepo dha’-adha’na nyaman rassana, tape dhi-budhina ekarassa akantha baliker.

¹⁸ Se ekasajja ahasel lantaran partembangan; daddi ja’ aperrang sabellunna sajjana jareya massa’.

¹⁹ Oreng se dujan arasanan ta’ bisa nyempen roseya; ja’ apolongan ban oreng se dujan acaca.

²⁰ Oreng se abasto oreng towana bakal mosna’a odhi’na akantha damar se mate e baja malem se petteng.

²¹ Arta se ekaolle kalaban gampang nyatana ta’ madhateng berkat.

²² Ja’ males kajahadan ban kajahadan keya; paparcaja ka PANGERAN, Salerana se nolonga.

²³ Tembangan ban batona se ta’ cocok ta’ ekasokane bi’ PANGERAN.

²⁴ PANGERAN la nantowagi jalanna odhi’na manossa e dunnya reya; daddi manossa ta’ bisa ngarte jalanna odhi’na dibi’.

²⁵ Pekker pateppa’ sabellunna ajanjiyagi kurban ka Pangeran, tako’ me’ ba’na kasta e budhi arena.

²⁶ Rato se bicaksana tanto tao sapa oreng se jahat, oreng jareya tanto eokom, ta’ kera esapora.

²⁷ Sowarana atena manossa reya terrang dhari PANGERAN, se nera’e batenna.

²⁸ Mon rato marenta kalaban bellas ase, jujur ban adil saterrossa, tanto salanjangnga teptep kobasa.

²⁹ Oreng ngodha ekasambu’i polana kakowadanna, oreng towa eargai polana obanna.

³⁰ Kadhang pangalaman pae’ maelang kajahadan, ban maberse atena manossa.