Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Inungang terasaka napa’jari kurangajaraki siagang ricui taua. Toloi tau angnginunga sa’genna nasa’ring.
2 Larrona karaenga sanrapangi sa’ra arrunna singaya; tau ampakanassuai sangkammai nacilakai kalenna.
3 Tau toloaji bawang nangai a’besereka; sipa’ nipujia iamintu mabellaya battu ri pa’beseranga.
4 Pamarri malasaka tanajamayai kokonna punna narapi’ wattunna; kale’bakkanna tena apa-apa wassele’ tanana punna pakkattoang.
5 Bone atinna taua sanrapangi bungung lantang; mingka akkullei nise’ro’ ri tau niaka pammahanna.
6 Jai tau nakana kalenna agang, mingka tau tenaya tojeng pamminrana, sukkaraki nigappa.
7 Ana’-anaka upaki punna nia’ manggena mabajika siagang malambusuka ri tallasa’na.
8 Punna ammempo karaenga ri kaderaya ri pangadelang, akkullei nacini’ sikontu tau ja’dalaka.
9 Maka nia’ tau akkulle angkana, "Tangkasaki atingku, ta’lappasaka’ battu ri dosaya?"
10 Timbangang siagang ukkurang jekkonga taNangaiyai Batara.
11 Battu ri panggaukanna anaka nakkulle niasseng apaka bajiki siagang lambusuki gau’na.
12 Tolia untu’ allangngere’ siagang mataya untu’ accini’, rua-ruana Batara ampa’jari.
13 Tau nangaia attinro latu’guru’ kasi-asi. Tau rajenga anjama jai kanre-kanreanna.
14 Paballia tuli akkunrareng ri passala’ ka’jala’na apa-apaya. Mingka punna le’ba’mo naballi, nakalompoammi pa’mai’ lanri anjo ballinna naballiangi.
15 Kana-kana ammonea pangngassengang, tinggiangngangi anggaranna kala bulaenga na barlianga.
16 Inai antanggongi inranna tau maraenga, siratangi nialle barang-baranna untu’ a’jarri panynyikko’ janjinna.
17 Barang-barang wassele’ nitipua, uru-uruna bajiki kasia’na, mingka kale’bakkanna sanrapangi batu-batu kasia’na.
18 Rancanaya a’jari lanri tangara’; lanri kammana anjo, teako appattujuangi punna tena rancana baji’.
19 Tau nangaia ambicarai paranna tau, takkulleai anynyokko rahasia; teako assileporangi siagang tau jai dudua bicaranna.
20 Tau antunrayai tau toana, lalanynyaki tallasa’na sanrapang lampu matea ri wattu bangngi sassanga.
21 Barang-barang lintaka gappanna, kale’bakkanna teai barakka’.
22 Teako balasaki kaja’dallanga siagang kaja’dallang; tappakko ri Batara, Iami lantulungko.
23 Timbangang siagang batu timbangang jekkonga taNangaiyai Batara.
24 Le’ba’ Napattantumi Batara oloang tallasa’na rupataua ri anne linoa; lanri kammana minjo natakkullea napahang oloang katallassang kalenna rupataua.
25 Pikkiri’ baji’-bajiki ri tenanapa nu’janji lassare koro’bang mae ri Batara. Gassingka assesse’ lalang jako ri boko.
26 Karaeng cara’deka naassengi angkana inai tau ja’dala’; lanahukkungi na tanapammopporangnga ke’nanga.
27 Ati mailalanna taua iami singara’ battu ri Batara ansingari sikontu atinna.
28 Punna ammarenta karaenga siagang mangngamaseang, lambusu’, siagang adele’, latuli makoasai.
29 Tau rungkaya nikangalikangi lanri kagassinganna, na nipakalompo tau toaya lanri uwanna.
30 Nia’ wattunna na pangalamang paika allu’luki kaja’dallanga, siagang natangkasi atinna rupataua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA