Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Inemen keras erbahanca kalak kurang ajar ras ngguntari kalak bodoh kap adi minem seh mabuk.

² Ula legi rawa raja, sabap rawana desken sora singa si erdengum. Mbiarlah man bana maka kam la cilaka.

³ Kerina kalak lenge mesikel ia rubat, perbahanen si terpuji eme nilahken perubaten.

⁴ Perjuma-juma si malas la idahikenna dahin tupung paksana, emaka tupung peranin kai pe la lit ulih jumana.

⁵ Perukuren jelma bali kap ras lau i bas telagah si mbages, tapi kalak si lit perukurenna ngasup njaruksa.

⁶ Nterem kalak ngataken ia setia, tapi kalak si tuhu-tuhu setia mesera njumpaisa.

⁷ Untung kap anak si erbapaken kalak bujur, dingen si ndalanken perbahanen si bujur.

⁸ Tupung raja ngadili, iperiksana kerina, dingen idahna tep-tep kejahaten.

⁹ Lit kin kalak si pang ngerana, "Nggo bersih perukurenna, aku nggo bebas i bas dosa nari?"

¹⁰ Timbangen dingen sukat-sukat si la bujur, la ngena ate TUHAN.

¹¹ Sekalak anak icidahkenna ise ia, arah perbahanenna, arah kai si ibahanna ieteh kap mehuli ntah lang biakna.

¹² Pinggel guna megiken, mata guna ngenen, duana e TUHAN kap si njadikenca.

¹³ Adi dekahen kam medem, musil me kam, kalak mejingkat cukup me nakanna.

¹⁴ Mehergasa iakap sinukur barang si itukurna, tapi kenca nggo jadi, iagahkenna kap barang si itukurna.

¹⁵ Ranan si isina pemeteh, ergan kap e asangken emas ntah mutiara.

¹⁶ Ise si nggit njamini utang kalak si la itandaina, buatlah ertana jadi jaminen padanna e.

¹⁷ Kai si iidatndu alu nipu, tangtangna e entebu nanamna, tapi dungna seri nanamna ras kersik.

¹⁸ Ope denga erbahan sada keputusen, pindolah lebe pedah, ula lebe lawes erperang adi langa ibahanndu rencana.

¹⁹ Percekurak ndigan pe la tersimpanca rahasia, sirangilah kalak si petca ngerana.

²⁰ Adi isumpahindu nande bapandu bene me geluhndu, desken lampu si nimpet i bas berngi si gelap.

²¹ Reh murahna iakap kalak muat erta, reh la ulina akibatna.

²² Ula belasken kejahaten, teklah man TUHAN, maka kam ibenarken.

²³ Timbangen dingen sukat-sukat si la bujur, ciga ate TUHAN.

²⁴ Nggo itetapken TUHAN dalan kegeluhen manusia, em sabapna lanai iangka manusia perdalanen geluhna.

²⁵ Ukurken lebe mbages-mbages ope denga erpadan mereken kahul man TUHAN, banci jadi dungna erkadiola kam.

²⁶ Raja si pentar ietehna ise si erbahan salah, iukumna kalak si bage alu la encidahken ate mekuah.

²⁷ Ibereken TUHAN man banta pusuh peraten, gelah banci si tandai dirinta jine.

²⁸ Adi sekalak raja merentah alu bujur, adil dingen setia, emaka tetap kuasana.

²⁹ Kehagan kalak nguda eme gegehna, dingen pujin man kalak si metua erkiteken ubanna.

³⁰ Mawen-mawen pengalamen si pagit e pe lit gunana, gelah kalak nggit ngobah cara geluhna.