Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Panonggoran ni si Obaja. Sonon do hata ni Tuhan Jahowa pasal Edom, domma ibogei hanami sada barita humbani Jahowa, anjaha domma isuruh sada utusan hu tongah-tongah ni bangsa-bangsa, eta, bingkat ma hita marmunsuh dompaksi.
2 “Tonggor ma, paetekon-Ku ma ho i tongah-tongah ni bangsa-bangsa, mahiri tumang ma ho.
3 Gijang ni uhur do na paoto-otohon ho, ho na marianan ibagas liang ni batu, na gijang pariananmu, ho na mangkatahon ibagas uhurmu, ʻIse ma na boi manjombahon ahu hu tanoh?ʼ
4 Age pe gijang ho mayap-ayap songon haluhuy, anjaha asarmu ibahen ho i holangkolang ni bintang, sai dabuhonon-Ku do ho hunjai,” nini Jahowa.
5 “Anggo roh panangko bam, barang sipanrampok borngin-borngin tontu siap ma ho! Ai lang ansa na sungkup bani sidea do tangkoonni? Anggo roh sitangko anggur marayak ho, ai lang tading ope turiang bahenon ni sidea?
6 Tapi sonaha do in parsursar ni Esau, hona sungkapan do arta ponopanni!
7 Das hu parbalogan ijuar-juar ganup halak sisapanriahanmu do ho, ioto-otoi anjaha ipatunduk hasomanmu do ho, hasoman hatengeran ni uhurmu do manaon tirangkap bam. Seng dong pangarusion bani.
8 Nai ma, bani ari ai,” nini Jahowa, “siapkonon-Ku ma halak na pentar hun Edom ampa pangarusion hun dolog ni si Esau.
9 Bajoraon ma puanglimamu ale Teman, ase bois ganup hona bunuh dalahi hun dolog ni si Esau.
10 Halani hajahatonmu bani anggimu si Jakob, maningon rungkubon ni habadoron ma ho, anjaha siapkononkon ho ronsi sadokah ni dokahni.
11 Ijia, sanggah na jongjong ai ho dohor hujai, sanggah na itangkapi halak na legan ai balani, anjaha imasuki parnagori na legan ai horbanganni, anjaha mandabuh ruji-ruji sidea pasal Jerusalem, dihut do ho ijai sada humbani sidea ai.
12 Tapi seng patut namin marpuas-puas ho pasal ari ni anggimu bani ari hamagouanni; seng patut namin marmalas ni uhur ho mangidah halak Juda bani parbois ni sidea, anjaha seng patut namin mangoga-oga ho bani ari hasosakan ni sidea.
13 Seng patut namin masukanmu horbangan ni bangsang-Ku bani ari parbois ni sidea; seng patut namin marpuas-puas ho bani ari hamagouanni; anjaha seng bulih namin padurduronmu tanganmu mambuat ugas-ugasni bani ari parsiapni.
14 Seng bulih namin jongjong ho bani sirpang ni dalan, laho manraseihon na maporus humbani sidea; seng bulih namin tahihononmu sagala na maluah humbani sidea bani ari hasosakanni.
15 Dohor mando ari ni Jahowa bani ganup bangsa-bangsa. Songon na dob binahenmu, sonai ma bahenon-Ku bam, mulak bani ulumu ma pambahenanmai.
16 Ai songon parminumnima i atas dolog hapansingon-Ku, sonai ma bangsa-bangsa inggot minum, minum ma tongon sidea anjaha munjei-unjei; anjaha adong pe sidea, hira na so adong hinan do.
17 Tapi anggo i atas ni Dolog Sion, adong do holi haluahon anjaha gabe pansing do ai, anjaha teanon ni ginompar ni si Jakob do use parbagianan ni sidea ai.
18 Dob ai gabe apuy ma ginompar ni si Jakob, anjaha gabe dilah ni apuy ginompar ni si Josep, tapi gabe anggala ma ginompar ni si Esau; jadi nahitan ni sidea ma ai anjaha monsongkononni, anjaha seng dong be simasima ni ginompar ni si Esau, ai Jahowa do mangkatahon ai.
19 Jadi teanon ni sidea ma tanoh dangsina, ai ma dolog ni si Esau ampa pamah ni halak Palistim; teanon ni sidea do homa tanoh ni Efraim ampa tanoh ni Samaria; tapi si Benjamin do manean Gilead.
20 Anjaha na tarbuang humbani halak Israel do manean tanoh ni halak Kanaan das hu Sarpat, anjaha halak na tarbuang hun Jerusalem, na marianan i Separat, sidea do manean huta na i tanoh dangsina.
21 Anjaha tangkog ma sipaluah hu Dolog Sion, laho manguhum dolog ni si Esau, jadi ondos bani Jahowa ma harajaon ai.
Obaja
Video Obaja 1
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA