Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Enda me nubuat Obaja: eme kata si ibelasken TUHAN si Erdolat kerna bangsa Edom. TUHAN nggo nuruh suruh-suruhenna man bangsa-bangsa janah kerina kita nggo megisa kai si ikatakenna, "Ersikapken! Ota kita erperang ras Edom!"
2 Nina TUHAN man Edom, "Kubahan maka kote kam kerina kalak megombang man bandu.
3 Ukurndu si meganjang nggo nebu-nebu kam. Kotandu si erbentengken lingling batu, rumahndu si meganjang i datas deleng-deleng; nindu i bas ukurndu, "Ise ngasup si pesusur Aku?"
4 Aminna pe ibahanndu inganndu seri ganjangna ras asar rajawali aminna tempa-tempa i tengah bintang-bintang pe inganndu, kupesusur nge kam.
5 Tupung pinangko reh berngi-berngi, kai ia perlu e ngenca ibuatna. Tupung kalak pepulung buah anggur, itadingkenna nge deba-deba. Tapi imbang-imbangndu isapuna kam kerina.
6 O, kesusuren Esau, barang-barangndu nggo irampas.
7 Teman-temanndu nggo nipu kam, nggo ipelawesna kam i bas negerindu nari. Kalak si erteman ras kam nggo naluken kam. Temanndu si sada perpangan nggo nidingi kam; nina kerna kam, 'I ja nge kebeluhenna ndube?'
8 Tupung paksa Kuukum Edom. Kukernepken me kalakna si erpengertin, Kulesapken kalak si pentar.
9 Si mbisa i Teman nari la banci lang nggirgir, kerina tentera Edom la banci lang ibunuh."
10 "Perbahan isamun dingen ibunuhndu seninandu kesusuren Jakup, la banci lang kernep kam janah ijuruken rasa lalap.
11 Tedis kam i dauh-dauh nari, i bas wari e, tupung pintu gerbang Jerusalem iruntuhken musuh, seri kam jahatna ras kalak si la itandai, eme ras kalak si ngangkut barang-barang Jerusalem, dingen mbagi-mbagikenca sapih-sapih ia.
12 Aturenna la kam senang, nandangi kiniseran si jadi man seninandu kalak Juda e. Aturenna la meriah akapndu, tupung ia iruntuhken. Aturenna la kam tawa tupung ia i bas kepiceten.
13 Aturenna la ibengketindu kota bangsangKu, ersenang-senang i bas kiniseranna, janah muati kebayakenna, tupung ia i bas kepiceten.
14 Aturenna la kam tedis i simpang-simpang nangkap ia si atena kiam. Aturenna la iendeskenndu ia man imbang-imbangna tupung ia i bas kepiceten.
15 Nggo kap ndeher warina, Aku, TUHAN, mereken ukumen man bangsa-bangsa. O Edom kai si nggo ilakokenndu, la banci lang ilakoken ka man bandu.
16 BangsangKu nggo minem calung ukumen si pagit i datas delengKu si badia. Tapi kerina bangsa-bangsa i sekelewet la banci lang minem calung ukumen si terpagiten. La banci lang kerina ia nginemsa jenari lesap.
17 Tapi i datas Deleng Sion la banci la lit kalak si pulah; deleng e la banci la jadi ingan si badia. Kalak kesusuren Jakup la banci lang dat bagin i bas negeri sikerajangenna kin.
18 Kalak kesusuren Jakup ras Jusup desken api si gurlah kap; icilukna me kerina kesusuren Esau desken api si enciluki pinugun nggala. La banci sekalak pe pulah kesusuren Esau. Aku TUHAN kap si nggo melasken ranan enda.
19 Bangsa i Selatan Juda nari la banci lang engkuasai Edom, kalak si arah Barat ture-ture deleng nari la banci lang naluken kalak Pilisti. Eperaim ras Samaria la banci la man Israel, kalak Benyamin ibuatna me Gileat.
20 Tentera si ibuang i Utara Israel nari la banci la mulih pelawes kalak Punikia, terus ku Utara Sarpat. Kalak Jerusalem si ibuang ku Sardis italukenna me kota-kota i Utara Juda.
21 Kalak Jerusalem si permenang iserangna janah ikuasaina me Edom. Dingen TUHAN jine me si jadi Rajana."
Obaja
Video Obaja 1
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA